မတ်မလီု၊ သေပ်တေမ်ဗာ (၅)
ဌာနဝန်ဇၞော် သယံဇာတ ကေုာံ ပရေၚ်ထိၚ်ဒဝ်ပွဳပွူသဘာဝ ကံၚ်ဇြဳပၞာန်ဂှ် သွက်ၚုဟ်ထဝ်သ္ဂောံစှ်ေတုဲ သွံတြးကဵုဒၟံၚ် ထဝ်တၚ်္ကာတံရောၚ် လလောၚ်တြးလဝ်ကီုလေဝ် ပ္ဍဲဗွဝ်ဖျာအပ္ဍဲဍုၚ်ဂှ် ၚုဟ်ထဝ် ၜိုတ်ထေၚ်လဝ် ဟွံစှ်ေဏီပုဟ်ဂှ် တၠကမၠောန်ထဝ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်ထဝ်အပ္ဍဲဍုၚ်တံဝွံ တုဲကၠုၚ်ဂိတုအဝ်ဂါတ် သတ္တာဟလက္ကရဴအိုတ်တေံ ဟိုတ်နူၚုဟ်ဒဝ်ဠာ သၠုၚ်တိုန်ဒၟံၚ် ဂၠိုၚ်ကဵုဆတုဲ ထဝ်ဒကောၚ် (မဳဠေန်) မွဲဒ္ကေဝ်ဂှ် ဂွံကၠုၚ်ၚုဟ် စဵုကဵု ပွဳပွူ (၃၅) ကိုဋ်ဒ္ကေဝ်တုဲ ကံၚ်ဇြဳပၞာန် သွံတြးကဵု ထဝ်တၚ်္ကာတံရောၚ် လလောၚ်တြးတုဲ တ္ၚဲလက္ကရဴဂှ် မွဲဒ္ကေဝ် ၚုဟ်စှ်ေကၠုၚ် စဵုကဵု ပွဳပွူ (၂၈) ကိုဋ်ဒ္ကေဝ်ရ။
အခိၚ်လၟုဟ် ၚုဟ်ထဝ် ကလေၚ်သၠုၚ်တိုန်ဒၟံၚ်တုဲ ပ္ဍဲဂိတုသေပ်တေမ်ဗာ (၅) ဂှ် ထဝ်ဒကောၚ် (မဳဠေန်) မွဲဒ္ကေဝ်ဂှ် သွံရာန်ဒၟံၚ် ပွဳပွူ (၃၀) ကိုဋ်ဒ္ကေဝ်ရောၚ် တၠကမၠောန်ဆေၚ်ထဝ်တံ သ္ဂးရ။
ၚုဟ်ထဝ်တံ ၜိုတ်ထေၚ်လဝ် ဟွံစှ်ေဂှ်ဝွံ ဟိုတ်နူၚုဟ်ကၠေၚ်စက် မ္ဒးသုၚ်စောဲဒၟံၚ်အဓိက ပ္ဍဲအရာမၜံက်ခါဲထဝ်တံ ဆက်သၠုၚ်တိုန်ဒၟံၚ်ကီု၊ ၚုဟ်ဒဝ်ဠာတံ ဟွံစှ်ေတံကီု မဒှ်ရဂှ် ညးတာလျိုၚ်ဂကောံတၠကမၠောန်ထဝ် ရးလ္ဂုၚ်မွဲတၠ ဟီုရ။
ၚုဟ်ထဝ် ၜိုတ်ထေၚ်လဝ်ဂှ် ဟွံစှ်ေကီုလေဝ် အပ္ဍဲဗွဝ်ဖျာဂှ် မၞိဟ်ရာန်ပကောံထဝ်ဂၠိုၚ်တုဲ ဇြဟတ်ရာန်သၠုၚ်တိုန်ဒၟံၚ်ဂှ်ရ ထဝ်သှ်ေအောန်ကြဳကၠုၚ်ရဂှ် တၠကမၠောန်ဆေၚ်ထဝ်တံ သ္ဂးအိုတ်ရ။
ကံၚ်ဇြဳပၞာန်ဂှ် ထဝ်တၚ်္ကာမွဲဒ္ကေဝ် သွံတြးကဵုဒၟံၚ် (၁၉) ကိုဋ်ပြၚ်ရောၚ် လလောၚ်တြးဒၟံၚ်ကီုလေဝ် ပ္ဍဲအခိၚ်ရာန်ဂှ် မွဲဒ္ကေဝ် ဒးရာန်ဒၟံၚ် နကဵု (၂၉၅၀၀၀၀) ဒ္ကေဝ်ရောၚ် တၠကမၠောန်ထဝ်တံ ဟီုဂးဒၟံၚ်တုဲ လ္တူကိစ္စဏံဂှ် နကဵုသြၚ်လောန်တိုၚ်(မ်) သ္ပဒတန်ဗွဲတၞဟ်ခြာ ဟွံမာန်ဏီရ။
ၚုဟ်ထဝ်ဝွံ ကၠာကံၚ်ဇြဳပၞာန် ဂွိုအ်သီအဝဵု လက်ထက်အလဵုအသဳ NLD တေံဂှ် ထဝ်ဒကောၚ်(မဳဠေန်) မွဲဒ္ကေဝ် နူပွဳပွူ (၁၃) ကိုဋ်ဓဝ် မၞုံကၠုၚ်ဂှ် လက္ကရဴဒပ်ပၞာန်သီအဝဵုတုဲဂှ် ၚုဟ်ထဝ်သၠုၚ်တိုန်ကၠုၚ် စဵုကဵု ဗ္ဒါဲ (၃) ဆတုဲ ၚုဟ်ဟွံညိၚ်ဝတ်တံလေဝ် က္တဵုဒှ်ဒၟံၚ် မွဲဏှမွဲဏှရ။
ပရိုၚ်−သြၚ်လောန်တိုၚ်(မ်)