ထဝါဲ၊ ဖေဖဝ်ဝါရဳ (၂၃)
ပ္ဍဲပေါဲဗ္တိုက်ၜါလ္ပာ် က္တဵုဒှ်ဒၟံၚ် ပ္ဍဲဒေသ(အရှေ့တော) ပွိုၚ်ဍုၚ်ထဝါဲ ရးတၞၚ်သဳဂှ် ကောန်ဂကောံဒပ်ကံၚ်ဇြဳပၞာန် ဗ္ဒါဲ(၂၀) ချိုတ်လဝ်တုဲ ကွဳစက်ပၞာန် (၆)ဖ္ဍိုက်ဂှ်လေဝ် လ္ပာ်ဒပ်ဂကောံဇြဟတ်ပံၚ်ကောံပၠန်ဂတးတံ ဗ္တိုက်သၠေက်လဝ်ရဂှ် ဂွံတီကေတ်ရ။
အကြာဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲဒေသ(အရှေ့တော)ထဝါဲ နကဵုဇြဟတ်ဒပ် ပွဳူ(၃၀၀)၊ ကွဳစက်ပၞာန် (၁၇)ဖ္ဍိုက်တံကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ်(KNLA)၊ ဒပ်စဵုဒၞါညးဍုၚ်ကွာန် (PDF)တံဂှ် နူကနေံတေံ ပေါဲဗ္တိုက်ၜါလ္ပာ်တံ သ္ကာတ်မြဟ်ကၠုၚ်လဝ် ကြပ်အလုံမွဲတ္ၚဲရ။
အတိုၚ်ဗီုဓါတ် ကေုာံ ဗဳဒဳယောသ္ကုတ် ပြးထၞာန်ကၠုၚ် ပ္ဍဲကောန်ယက်ပရေၚ်မၞိဟ်တံဂှ်မ္ဂး အပ္ဍဲပေါဲဗ္တိုက်တံဂှ် ကွဳစက်ပၞာန်ပၟတ်တူလီုလာ်ဒၟံၚ်တံ၊ ဗၠာဲသၟိၚ်ကေုာံကောန်ပၞာန်ကံၚ်ဇြဳပၞာန်တံ ဗ္ဒါဲ (၂၀) ချိုတ်မံၚ်တံကဵု ဂကောံဇြဟတ်ပၠန်ဂတးတံ သီဂွံလဝ် မကမ်လွဟ်လက်နက်တံဂှ် ဂွံဆဵုကေတ်ရ။
အတိုၚ်ကောန်သ္ဂံၚ်ပါလုပ်ပ္ဍဲပရေၚ်ပၞာန်တံ လဴထ္ၜးလဝ်ဂှ်မ္ဂး ပ္ဍဲပေါဲဗ္တိုက်ဂှ် ဒုအကြာပ်ဒပ်(၁)တၠပါလုပ်ဂှ် ကောန်ဒပ်ကံၚ်ဇြဳပၞာန် (၂)တၠဂှ်လေဝ် ရပ်ဂွံလဝ်ဂျိုၚ်ၚ်တုဲ လၟေၚ်ဒဒှ်ပေါဲဗ္တိုက်ချိုတ်တ်ပၠိုတ်တ်တံဂှ် လ္ပာ်ဂကောံဒပ်ပံၚ်ကောံတံ လလောၚ်ပ္တိတ်ကဵုအာရောၚ်ဂှ် ဟီုရ။
ပေါဲဗ္တိုက်(အရှေ့တော)ထဝါဲဂှ် ပ္ဍဲကဵုဂိတုဖေဖဝ်ဝါရဳ စၟတ်တ္ၚဲ(၂၂)ဂှ်လေဝ် ပေါဲဗ္တိုက်တံ ဆက်သ္ကာတ်မြဟ်မံၚ်တုဲ လ္ပာ်ကံၚ်ဇြဳပၞာန်တံဂှ်လေဝ် ထပ်ဗ္တိုက်ဂြာတ်ကၠုၚ်ဗမ် နကဵုက္ၜၚ်ကျာ Mi 2 တံပၠန်ရဂှ် သ္ဂးရ။
စနူဂိတုဖေဖဝ်ဝါရဳ စၟတ်တ္ၚဲ(၁၆) တုဲကၠုၚ်တေံတုဲ ဒပ်ကံၚ်ဇြဳပၞာန်ထ္ပက်ကၠုၚ်ကရောၚ်ပၞာန် အတိုၚ်ဂၠံၚ် ထဝါဲ-ထဳခဳတံ ပ္ဍဲမွဲဒမြိပ်ဂၠံၚ်ဂှ် အရိုဟ်ဒဒှ်တ္ၚဲဟီုဂွံ ဒးဒုၚ်ဗ္တိုက်မံၚ်တုဲ ဟိုတ်နူပရေၚ်ဇီုကပိုက်ချိုတ်တံ ဂၠိုၚ်မံၚ်ဂှ်ရ ဒးသုၚ်စောဲမံၚ် တရဴကျာတံအဓိကရ။
အတိုၚ်တၚ်နၚ် နူကဵုသြၚ်လောန်တိုၚ်မ် ပကောံပကေဝ်လဝ်ဂှ်မ္ဂး ပ္ဍဲပေါဲဗ္တိုက်ရးတၞၚ်သဳ က္တဵုဒှ်မံၚ် စနူသၞာံဏံမံက်တံဂှ် လ္ပာ်ကံၚ်ဇြဳပၞာန်တံ ကၠောန်သ္ပလဝ် ပရေၚ်ဗ္တိုက်တရဴကျာ ဟွံအောန်နူကဵု (၇)ဝါရ။
ပ္ဍဲရးတၞၚ်သဳဂှ် တုဲကၠုၚ်ပ္ဍဲဂိတုဂျာန္နဝါရဳဂှ် ပေါဲဗ္တိုက်ၜါလ္ပာ် ဟွံအောန်နူကဵု (၄၀)ဝါ က္တဵုဒှ်လဝ်တုဲ ပေါဲဗ္တိုက်တ္ၚဲဇမၠိၚ်တံ သာတုဲက္တဵုဒှ်ကၠုၚ်ရဂှ် ဂကောံသုတေသန FE5 Tanintharyi တံ လလောၚ်ပ္တိတ်လဝ် ပ္ဍဲလိက်ဒုၚ်စဳရေၚ် ဂိတုဖေဖဝ်ဝါရဳ စၟတ်တ္ၚဲ(၁)ဂှ်ရ။
ပရိုၚ်-သြၚ်လောန်တိုၚ်မ်
ဗီု-Social Media