ဖာအၚ်၊ ဖေဖဝ်ဝါရဳ (၂၃)
ဟိုတ်နူကဵုပရိုၚ် လုပ်ဗ္တိုက်ဍုၚ်ဖာအၚ် တွဵုရးကရေၚ်ဂှ်တုဲ ဒပ်ကံၚ်ဇြဳပၞာန်တံ သၠုၚ်ပ္တိုန်လဝ် ပရေၚ်ဂီုကၠီုလုပ်ဍုၚ်တုဲ နူကဵုသဓီုမွဲကဆံၚ် ပလံၚ်ဗ္စိုပ်ကၠုၚ်မံၚ် ဂကောံဇြဟတ်ဒပ် ခြပ်ပသဲပါတံဂှ်ရောၚ်ဂှ် ဂွံတီကေတ် အတိုၚ်ကောန်ဍုၚ်ဖာအၚ်တံ လဴထ္ၜးလဝ်ဂှ်ရ။
သ္ပတံနူတ္ၚဲတုဲကၠုၚ်အကြာတံဏံတုဲ ဟိုတ်နူကဵုပရိုၚ် ဂကောံဇြဟတ်ပၠန်ဂတးတံ လုပ်ဗ္တိုက်ဍုၚ်ဖာအၚ်တံဂှ်ကဵု ဒပ်မၚ်ပယျဵုကရေၚ် BGF တံ လုပ်စိုပ်ကၠုၚ် ပ္ဍဲဍုၚ်ဖာအၚ်တံ ဗွဲမဂၠိုၚ်ဂၠၚ်တံဂှ်တုဲ ဒပ်ကံၚ်ဇြဳပၞာန်တံ သၠုၚ်ပ္တိုန်ကၠုၚ်လဝ် ပရေၚ်ဂီုကၠီုလုပ်ဍုၚ်ရ။
ပ္ဍဲသ္ကုတ်ဂၠံၚ် စုက်ကဵုတမ်ဒပ်ကံၚ်ဇြဳပၞာန် မၞုံလ္တူဍုၚ်ဖာအၚ်တံဂှ် ကၟာတ်လဒဵုသၞောတ်ဗ္ၜတ်လဝ် အခေါၚ်အာကၠုၚ်တံတုဲ ကောန်ဂကောံဒပ်ကံၚ်ဇြဳပၞာန်တံဂှ်လေဝ် ပလေဝ်ပလေတ်လဝ် နကဵုအကာဲအရာမဒှ်ဒၟံၚ်ဒတုဲ သွက်ဂွံလုပ်ပေါဲဗ္တိုက်တံရဂှ် ဂွံတီကေတ်ရ။
သ္အာၚ်နူဂှ်ပၠန် ပ္ဍဲလ္ပာ်ကွာန်ကြပ်ကဵုဍုၚ်လ္ၚဵုတံဂှ် နူကဵုဒပ်ကံၚ်ဇြဳပၞာန် ဖျေံလဝ်ဒပ်တံ၊ မၚ်တောပ်ဗ္တိုက်မံၚ်တံ နွံမံၚ်ရဂှ် ညးဒေသတံဟီုရ။
ပ္ဍဲဂိတုဖေဖဝ်ဝါရဳ စၟတ်တ္ၚဲ(၂၁) အခိၚ်ဗ္တံဂှ်လေဝ် နူကဵုသဓီုတွဵုရးဍုၚ်မန်တံမွဲကဆံၚ် ရေၚ်ကွဳစက်ကံၚ်ဇြဳပၞာန် ကွဳစက်ခြပ်ပသဲပါတံ စိုပ်ကၠုၚ်ဍုၚ်ဖာအၚ်တုဲ ဣဏံဂှ်တှ်ေ သွက်ပရေၚ်ဂီုကၠီုဍုၚ်ဖာအၚ်ဂှ် ထပ်ပလံၚ်နၚ် ဇြဟတ်ဒပ်တံ ဒှ်မာန်ရဂှ် သ္ၚဳဂၠိပ်မံၚ်တံ နွံမံၚ်ရ။
တုဲကၠုၚ်ပ္ဍဲအကြာတ္ၚဲတံဏံဂှ်လေဝ် ပ္ဍဲဂအုပ်ဌာန တမ်ဒပ် DKBA တြေံ မၞုံကွာန်နံၚ်လုံ ဗ္ဒါဲဍုၚ်ဖာအၚ်မွဲဂှ် ဒပ်မၚ်ပယျဵုကရေၚ် BGF နုက်တိတ်လဝ်နူသၟဝ်တဲကံၚ်ဇြဳပၞာန်တံ ဗွဲမဂၠိုၚ် ဟိုတ်နူကလေၚ်လုပ်စိုပ်ဖျေံဒပ်မံၚ်တန်တဴမံၚ်ပၠန်ဂှ်ရ ပရေၚ်ကြံၚ်မ္ၚိုဟ်ကုကံၚ်ဇြဳပၞာန်တံ က္တဵုဒှ်ကၠုၚ်မာန်ရဂှ် ပရိူၚ်ဂမၠိုၚ် မံက်တိတ်ကၠုၚ်မံၚ်ရ။
သ္အာၚ်နူဂှ်ပၠန် ကောန်ကလောန် နူကဵုကၠအ်ပ္ကဴချေတ်တူမျာၚ် က္ဍိုပ်သ္ကိုပ်ဒပ်မၚ်ပယျဵု သ္ကိုပ်ဗိုလ်ဇၞော် သဝ်ချေတ်တူပိုၚ်ပြဳ ဒးဒုၚ်ကၟာတ်လဝ် ကြဴနူကာလကိုဗေတ်တံဂှ် BGF တံ ကလေၚ်စကာမံၚ်ပၠန်တုဲ ပ္ဍဲဗွိုၚ်ကၠအ်ပ္ကဴတံဂှ် ကောန်ဂကောံဒပ် BGF တံသၟးရ နွံမံၚ်ရဂှ် ညးဒေသတံဟီုရ။
ပြဟ်ဟ်ဏံဂှ် မွဲကရောံကဵု ပရိုၚ်လုပ်ဗ္တိုက်ဍုၚ်ဖာအၚ်တံမံက်တိတ်ကၠုၚ်မံၚ်တံဂှ် ဟိုတ်နူကဵုဥပဒေယိုက်ဂၠေၚ်တာလျိုၚ်ပၞာန် ကံၚ်ဇြဳပၞာန် စၞောန်ပျးလဝ်တံဂှ်တုဲ ပ္ဍဲလ္တူဍုၚ်တံကဵု ဒၞါဲပွဳူတံ မၞိဟ်အာကၠုၚ်အောန်ကၠုၚ်ရဂှ် ဂွံတီကေတ် နူညးဒေသတံရ။
ပရိုၚ်-သြၚ်လောန်တိုၚ်မ်
ဗီု-KIO FM