ဇြပ်ဗု၊ ဖေဖဝ်ဝါရဳ(၂၃)
အပ္ဍဲကဵု မၞိဟ်ဒပ်ကံၚ်ဇြဳပၞာန်ရပ်ဒက်လဝ် ပ္ဍဲဍုၚ်ဇြပ်ဗု တွဵုရးဍုၚ်မန်တံဂှ် ဖျေံစၟတ်လဝ် ဒုဟ်ဒဏ်၊ ဒဏ်ထံၚ် ကုမၞိဟ်တြုံ(၅)တၠ ကေုာံ မၞဟ်ဗြဴ(၃)တၠတံရဂှ် ဂွံတီကေတ် အတိုၚ်ဂလာန်ညးဒေသတံ လဴထ္ၜးလဝ်ဂှ်ရ။
ဒပ်ကံၚ်ဇြဳပၞာန်ဂှ် တုဲကၠုၚ်ပ္ဍဲသ္ကုတ်သၞာံအိုတ်တေံဂှ် ပ္ဍဲဍုၚ်ဇြပ်ဗုဂှ် ကြဴနူကောန်ဂကောံဒပ်စဵုဒၞါညးဍုၚ်ကွာန် ဥူမျတာန် ဒးဒုၚ်ရပ်တုဲဂှ် နကဵုတၚ်စောတ်စောဲ ဆက်စပ်ဒၟံၚ်ကဵု PDFတံရောၚ်သ္ဂးတုဲ ရပ်ဒက်လဝ် ညးဒေသ ဗ္ဒါဲ(၆၀)ရ။
အပ္ဍဲဂှ်ဂှ် ပါလုပ်သီုကိုဝ်တုၚ်ဨ ညး(၂)တၠဂှ် နကဵုၝောံပိုဒ်ပကီုပရာပ်တံဂှ် ဒဏ်ထံၚ် (၁၀)သၞာံစၟအ်အ်၊ ညးဗြဴ(၃)တၠတံဂှ် ဒဏ်ထံၚ်(၈)သၞာံစၟအ်အ်၊ ကိုဝတုတ် ကေုာံ ကိုကြက်ခုတ်မပါလုပ် (၃)တၠတံဂှ် ဒဏ်ထံၚ်မွဲသၞာံစၟအ်အ် ဖျေံစၟတ်လဝ်အမိၚ်ရဂှ် ဂွံတီကေတ်ရ။
ပ္ဍဲကဵု မၞိဟ်ဒပ်ကံၚ်ဇြဳပၞာန်ရပ်ဒက်လဝ်တံဂှ် တၠဆေၚ်ဖျာသွံကပေါတ်သိုၚ်ခၞံ ကိုတရုတ်ဂှ်တှ်ေ တုဲကၠုၚ်ပ္ဍဲဂိတုဖေဖဝ်ဝါရဳ စၟတ်တ္ၚဲ(၂၀)ဂှ် ပံက်လဝ်အမှုနကဵု ၝောံပိုဒ်ဥပဒေပကီုပရာပ် ဖျေံစၟတ်ဒဏ်ထံၚ်စဵုကဵု မွဲအာယုက်မာန်တံရ။
အတိုၚ်လဟီုညးဒေသတံဂှ်မ္ဂး ပ္ဍဲကဵုမၞိဟ်ဒပ်ကံၚ်ဇြဳပၞာန် ရပ်ဒက်ဏာတံဂှ် ၜိုတ်(၃၀)ဂှ် ၜိုန်ရကလေၚ်ဗလးကဵုလဝ်ကီုလေဝ် သှ်ေဒၟံၚ်ၜိုတ်(၃၀)တံဂှ် မၞးနူဥပဒေပတိုက်ပလီုပွပကီုပရာပ်တံဂှ် ပံက်လဝ်အမှုစၟဳတ်ဒၟံၚ် နကဵုဥပဒေၝောံပိုဒ် ရာဇသာတ်ဇၞော် ၅၀၅(က)ရဂှ် ဂွံတီကေတ်ရ။
ဒပ်ကံၚ်ဇြဳပၞာန်ဂှ် ညးဒေသဇြပ်ဗုရပ်ဒက်လဝ်တံဂှ် ဖျေံလဝ်ထံၚ် ပ္ဍဲထံၚ်စာတ်ဗဟဵုကျာ်မြဟ်တုဲ ကဵုဂကောံသ္ၚိကၟိန်တံလေဝ် ဟွံဂွံအခေါၚ်ဆဵုတုဲ ညးဒေသဒးဆေၚ်မံၚ်ဂဗုတ်တံဂှ် အခေါၚ်လိၚ်တၠပညာသၞောဝ်ဥပဒေတံလေဝ် ဟၟဲပုဟ်ဂှ် သ္ဂးရ။
အတိုၚ်တၚ်လလောၚ်တြး ဂကောံမၚ်မွဲရီုဗၚ် ကောန်ထံၚ်ပရေၚ်ဍုၚ်ကွာန် AAPPမ္ဂး ပ္ဍဲကာလသီအဝဵုဏံ ပ္ဍဲတွဵုရးဍုၚ်မန်ဂှ် ညးဒေသဟွံအောန်နူကဵု (၉၀၀)ဒးဒုၚ်ရပ်ဒက်လဝ်တုဲ ဗွဲမဂၠိုၚ်တံဂှ် ဒးဒုၚ်ဖျေံစၟတ်လဝ် ဒုဟ်ဒဏ် ဒဏ်ထံၚ်စၟအ်အ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်မ်
ဗီု-Social Media