သဓီု၊ မာချ် ၁
ပ္ဍဲကွာန် (မိုးကောၚ်း) ပွိုၚ်ဍုၚ်သဓီု တွဵုရးဍုၚ်မန် ဒးဒုၚ်ဖံက်ဗ္တိုဟ်ပလီုပလာ်လဝ်တုဲ ဒဒန် (မိုးကောၚ်း) သရိုဟ်စှ်ေလီုလာ်အာလဝ်ဂှ် ကလေၚ်ဗဝ်တိတုဲ ကဵုလဝ်အခေါၚ်တတ်ကၠောံအာကၠုၚ်ယျဂှ် ဂွံတီကေတ် အတိုၚ်ဂလာန်ညးဒေသတံကဵု ညးအာတရဴတံရ။
ဒဒန် (မိုးကောၚ်း) နွံဒၟံၚ်လ္တူဂၠံၚ်ကာ လ္ဂုၚ်−မတ်မလီုဂှ်ဝွံ ပ္ဍဲဂိတုဖေဖဝ်ဝါရဳ ၂၈ အခိၚ်နူဂယး ၜိုတ် ၁ နာဍဳဂှ် ဒးဒုၚ်ဖံက်ဗ္တိုဟ်ပလီုပလာ်လဝ်တုဲ အလုံဒဒန်မွဲတၞုၚ် သရိုဟ်စှ်ေလီုလာ်အာလဝ်ရ။
ကြဴနူဂှ်တုဲ နကဵုအမိၚ် ဥူအံၚ်ကျဳတုၚ် သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ခါန်ကၞက်ဂှ် ကမ္ပဏဳယှိုဲတာန်လွေန် ဗဝ်တိ ကုဒဒန်(မိုးကောၚ်း) မသရိုဟ်စှ်ေလီုလာ်အာလဝ် လွာဲဂှ်တုဲ နူဏေံတေံ ဇိုၚ်သဝ်တ္ၚဲဂှ် ကဵုလဝ်အခေါၚ်တတ်ကၠောံအာကၠုၚ်ရ။
အတိုၚ်ဂလာန် ညးဒေသတံဂှ်မ္ဂး ဒဒန်မိုးကောၚ်း ဗဝ်လဝ်တိမွဲကရေက်တုဲ ကဵုလဝ်အခေါၚ်တတ်ကၠောံအာကၠုၚ်ဂှ် ပလေဝ်ပလေတ်ဒၟံၚ်သွက်ဂွံထ္ပက်ဒဒန်ယာယဳတုဲ လ္ပာ်ကံၚ်ဇြဳပၞာန်လေဝ် ကေတ်လဝ်ဂီုကၠီုဂှ် ဂွံတီကေတ်ရ။
အပ္ဍဲလၟေၚ်ဒဒှ် ဒဒန်(မိုးကောၚ်း) ဒးဒုၚ်ဖံက်ဗ္တိုဟ်ဂှ် သ္ၚိဒၟံၚ် ၂ မ၊ ဗ္ဒမ်ဆေၚ်ဖျာ ၂ ဇီုကပိုက်လီုလာ်လဝ်တုဲ ညးဍုၚ်ကွာန်ကောန်အရာပ်မွဲတၠလေဝ် ဇီုကပိုက်ကလိဂွံလဝ်ဝပ်ရ။
ကြဴနူဒဒန်(မိုးကောၚ်း) ဒးဒုၚ်ဖံက်ဗ္တိုဟ်တုဲဂှ် ပ္ဍဲကဵုပွိုၚ်ဍုၚ် တွဵုးဍုၚ်မန် ဗွဲမဂၠိုၚ်ဂှ် ဟိုတ်နူပၠံၚ်ရာန်ကၠေၚ်စက်တံတုဲ ကၠေၚ်ပိုတ်အိုတ် က္တဵုဒှ်လဝ်ရ။
ဒဒန် မိုးကောၚ်းဝွံ နွံဒၟံၚ်လ္တူဂၠံၚ် မဆက်စၠောံလဝ် ပွိုၚ်ဍုၚ်သဓီုကဵု ပွိုၚ်ဍုၚ်ၜဳကလေၚ်ဂှ်တုဲ သွက်ပရေၚ်သွံရာန်ဗၞိက်လေဝ် ဒှ်ဒဒန်ပၟိက်ဇၞော်မွဲရ။
ပရိုၚ်−သြၚ်လောန်တိုၚ်(မ်)
ဗီု−CJ