မတ်မလီု၊ ဖေဖဝ်ဝါရဳ ၂၉
သွက်ကဆံၚ်ဘဝမၞိဟ် ညးဍုၚ်ကွာန် ကွာန်ရးတံ ကေုာံ ကောန်ဍုၚ်အရၚ် အပ္ဍဲတွဵုရးဍုၚ်မန်တံ ဂွံသၠုၚ်တိုန်ကၠုၚ်ဂးတုဲ အပ္ဍဲဂိတုဨပရဴကၠုၚ်စိုပ်ဏံ သွက်ဂွံဗ္တောန်ကဵု “အ” ပိမဂှ် သ္ကိုပ်ဝန်ဇၞော်တွဵုရး ကံၚ်ဇြဳပၞာန်ခါန်ကၞက်လဝ်ဂှ် ကဵုကၠုၚ်ဇြဟတ်ဂရိုဟ်ရ။
ကောံဓရီုပ္ညဳပ္ညပ်အစဳဇန် သွက်ဂွံဗ္တောန်ကဵု “အ” ပိမဂှ် တုဲကၠုၚ်ပ္ဍဲဂိတုဖေဖဝါရဳ ၂၈ တေံ ကၠောန်ဗဒှ်လဝ် ပ္ဍဲရုၚ်အလဵုအသဳတွဵုရး လ္တူဍုၚ်မတ်မလီု တွဵုရးဍုၚ်မန်ဂှ်တုဲ ဥူအံၚ်ကျဳတုၚ် သ္ကိုပ်ဝန်ဇၞော် တွဵုရးဍုၚ်မန် ကံၚ်ဇြဳပၞာန်ခါန်ကၞက်လဝ်ဂှ် သွက်ဂွံဗ္တောန် “အ” ပိမ ဟွံဒေါအ်ဟွံဂွံဂှ် စၞောန်ပ္ညုၚ်ကၠုၚ်ရ။
အပ္ဍဲကောံဓရီုဂှ် သွက်ဂွံထ္မံက်ရုပ်ရဴ အစဳဇန် “အ” ပိမဂှ် ဒက်လဝ်ကမ္မတဳကောပ်ကာဲကမၠောန် စဵုကဵုကဆံၚ်တွဵုရး၊ ခရိုၚ် ကေုာံ ပွိုၚ်ဍုၚ်တုဲဂှ်ရ သွက်ဂွံရေၚ်တၠုၚ်လၟေၚ်ကမၠောန်တံ သၠဲသၠဲလးလးဂှ် ဥူအံၚ်ကျဳတုၚ် ဟီုဂးလဝ်ရ။
အ္စာဘာ CDM မွဲတၠဂှ် ကၠောန်ဒၟံၚ် သွက်ဂွံဗ္တောန် “အ” ပိမဂှ်ဝွံ ဟွံကိတ်ညဳကဵု ခေတ်ကာလရတုဲ အစဳဇန်ဏံဝွံ ကမၠောန်ဟွံမွဲ ညံၚ်ရဴညးဖုံဍာ်ကဵုဗ္ဂဲရဏောၚ်ဂှ် ပါ်ပါဲလဝ်ရ။
“စကစဂှ်တှ်ေ ကမၠောန်ဟွံမွဲ ဖုံဒၟံၚ်ဍာ်ကဵုဗ္ဂဲဏောၚ်။ ခေတ်လၟုဟ်ဂှ်တှ်ေ ဗီုကၠာတေံလေဝ် ဟွံသေၚ်ရပုဟ်လေဝ်။ ကၠာတေံဂှ်တှ်ေ ဗှ်၊ ချူ၊ တော် ဟွံဂွံတုဲ သ္ၚောဲဒၟံၚ်ကဵုဍုၚ်ကွာန် နွံဒၟံၚ်ပ္ဍဲဂြိုပ်တေံဂှ်တုဲ ကွးဘာတက္ကသိုလ်တံဂှ် ဗက်ဗ္တောန်ကဵု။ လၟုဟ်ဂှ် ခေတ်ဏံလေဝ် ဟွံသေၚ်ရပုဟ်။ ဒးဟီုတပ်ပ်မ္ဂး “အ” ပိမဂှ် ဟွံဒးကေတ်ဒၟံၚ် တၟာလအ်ရ။ အစဳဇန်လၟုဟ်ဂှ် ကလိဂွံအံၚ်ဇၞးတံဟီုဂှ်လေဝ် ဟွံမွဲပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် အခိၚ်ကာလလၟုဟ်ဝွံ ဟိုတ်နူပေါဲဗ္တိုက် က္တဵုဒှ်ဒၟံၚ်ပ္ဍဲကဵုဒေသကွာန်ရးတံကဵု ဒေသကောန်ဍုၚ်အရၚ်တံ ဒၞါဲပြးဇးဂှ်တုဲ ဂီုကၠီုဟွံမွဲရတုဲ နကဵုညးဒေသတံလေဝ် ဟိုတ်နူဒးဂ္စါန်ဒၟံၚ်ကဵု ပရေၚ်စသုၚ်မံၚ်စံၚ်သၟးဂှ်ရ စိုတ်လုပ်စဟွံသေၚ်ပုဟ်ဂှ် ညးဆက်ဟီုရ။
သ္ကိုပ်ဝန်ဇၞော် တွဵုရးဍုၚ်မန် ကံၚ်ဇြဳပၞာန်ခါန်ကၞက်လဝ်ဂှ် သွက်ဂွံကံက်လဝ်ကဵုစရၚ် ညးဟွံလေပ်လိက် ကေုာံ ညးဟွံကေၚ်မံၚ်ဘာ အပ္ဍဲကွာန်ရးတံ ကေုာံ စရၚ်ဝိုၚ်ဗ္တောန်လိက်တံဂှ်ကီု၊ သွက်ဂွံကံက်လဝ်ကဵုစရၚ် အ္စာထ္ၜးနဲကဲဘိုၚ်ဗ္တောန်ကဵုတံဂှ် စၞောန်ပ္ညုၚ်လဝ်ရ။
အ္စာၝောံ CDM မွဲတၠဂှ် တၚ်စၞောန်ဏံဝွံ ပ္ဍဲကဵုတိဍာ်ကံၚ်ဇြဳပၞာန် ထိၚ်ဒက်ဟွံမာန်တံဂှ် ထ္မံက်ရုပ်ရဴမာန်ဟွံသေၚ်ဂှ်ရ အံၚ်ဇၞးဟွံသေၚ်ပုဟ်ဂှ် ဟီုရ။
“လ္ပာ်ရးတံဂှ်တှ်ေ ဟိုတ်နူထိၚ်ဒက်ဟွံမာန်ဂှ်ရ ဍေံတံမုစၞောန်န် ကၠောန်ညးသ္ကအ်ဟွံသေၚ်ပုဟ်။ ဍေံတံစၞောန်ပ္ညုၚ်ကၠုၚ်သာ်ဏံဂှ်လေဝ် မၞိဟ်ကြပ်ကဵုဍေံတံ မၞိဟ်ဖေက်ဍေံတံဂှ်ရ ကၠောန်အိုတ်ဏောၚ်။ ရဲသ္ၚောဲဒၟံၚ်ကဵုဍေံတံဂှ်တှ်ေ ဒ္ဂေတ်ဗက်အမိၚ်ဍေံတံ တၚ်စၞောန်ဍေံတံ ဟွံသေၚ်ပုဟ်။ ညံၚ်ဂွံစိုပ်တရဴဟွံသေၚ် ကၠောန်ဒၟံၚ်ၜိုတ်မိက်ဂွံထ္ၜးစရဂှ် ညာတ်ရ” သာ်ဝွံ သ္ဂးရ။
သွက်အစဳဇန် “အ” ပိမ ကံၚ်ဇြဳပၞာန် မရေၚ်တၠုၚ်အာဂှ် တုဲကၠုၚ်ပ္ဍဲဂိတုဖေဖဝ်ဝါရဳ ၁၉ တေံ ကံက်ဒၟံၚ်စရၚ် ကွးဘာတက္ကသိုလ်မတ်မလီုတံ အနိၚ်အပိုၚ် သွက်ဂွံဗ္တောန်ကဵု “အ” ပိမဂှ် နွံဒၟံၚ်ရ။
ကွးဘာတက္ကသိုလ်တံ ညံၚ်စိုတ်ဂွံလုပ်စ “အ” ပိမဂှ်ဂးတုဲ ထ္ၜးဒၟံၚ်ရုပ်ဂမျိုၚ် စပ်ကဵု “အ” ပိမတံ မေဂျာညးကဵုညးတုဲ မၞိဟ်ပါဗက် ပ္ဍဲအစဳဇန် “အ” ပိမတံဂှ် မ္ၚးနူကဵုပရေၚ်စသုၚ်မံၚ်စံၚ်တံဂှ် ထံက်ပၚ်ကဵုအာ သီုကဵုသြန်ထံက်ပၚ်ဏောၚ်ဂှ် စန်ဒက်ဒၟံၚ်တံ နွံဒၟံၚ်ရ။
အစဳဇန် “အ” ပိမဂှ်ဝွံ ပ္ဍဲကဵုပွိုၚ်ဍုၚ်ကျာ်ထဝ်၊ ၜဳကလေၚ်၊ သဓီု၊ ကျာ်မြဟ်၊ ဇြပ်ဗု ကေုာံ ပွိုၚ်ဍုၚ်ရေဝ် ဒၞါဲပေါဲဗ္တိုက် အကြာဒပ်ကံၚ်ဇြဳပၞာန်ကဵု ဇြဟတ်ပၠန်ဂတးတံ က္တဵုဒှ်ဒၟံၚ် မွဲဏှမွဲဏှတံဂှ် ဗ္တောန်ကဵုမာန်ဟွံသေၚ်တုဲ ၜိုတ်လ္တူဍုၚ်ညိညဓဝ်ရ ကၠောန်ကၠုၚ်ၜိုတ်ထ္ၜးစရမာန်ဂှ် သ္ၚဳဂၠိပ်ဒၟံၚ်တံ နွံဒၟံၚ်ရ။
အတိုၚ်ဂလာန် ဂကောံသုတေသန ISP-Myanmar ဂှ်မ္ဂး အပ္ဍဲကာလသီအဝဵုဏံ သၟတ်အလုံဍုၚ်မွဲ ဗွဲတွဵုမအောန် နူ ၈ ပြကောဋိကိုဋ် သၟဝ် ၁၀ ပြကောဋိကိုဋ် ဒးဆောံလေၚ်ဒၟံၚ် အခေါၚ်ဗ္တောန်ပညာဂှ် လိက်ဒုၚ်စဳရေၚ်ဂှ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−MRTV