ဍာ်ဗု၊ မာတ် ၂
ပ္ဍဲပွိုၚ်ဍုၚ်ဍာ်ဗု ရးတၞၚ်သဳဂှ် ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် လုပ်စိုပ်ကၠုၚ် နကဵုဇြဟတ်ဗွဲမဂၠိုၚ်ဂၠေၚ်ဂှ်တုဲ ဟွံအောန်နူကဵု ၆ ကွာန် ဒးဂြိပ်ဒဴပါဲဒလေတ်ဒၟံၚ် အတိုၚ်အလုံကွာန်မွဲဂှ် ဂွံတီကေတ် အတိုၚ်ဂလာန်ညးဒေသတံရ။
တုဲကၠုၚ်ပ္ဍဲဂိတုဖေဖဝ်ဝါရဳ ၂၈ တေံ ဒပ်ပၞာန်ဗထူ လုပ်စိုပ်ရပ်ဒက်ဏာ မၞိဟ် ၃ တၠ ပါလုပ်သီုကဵုဒုဂအုပ်ပါမောက္ခ တက္ကသိုလ်နဲကွတ်ပညာဂှ်တုဲ ကံၚ်ဇြဳပၞာန် ဂွံကလေၚ်ရီုပ္တိတ်ဂှ် ထ္ပက်ကၠုၚ်ကရောၚ်ပၞာန် မဒှ်ရ။
ဒပ်ကံၚ်ဇြဳပၞာန် ဇြဟတ်ဒပ် ၂၀၀ ပြၚ်ပါဂှ်ဝွံ စနူဂိတုဖေဖဝ်ဝါရဳ ၂၉ တုဲ ပ္ဍဲကဵုကွာန်ပုၚ်ယှံၚ် ကေုာံ ဒံၚ်ယှံၚ် ပွိုၚ်ဍုၚ်ဍာ်ဗုဂှ် ဂၠိုက်ဂၠါဲဒၟံၚ် ဒပ်ပၞာန်ဗထူ ဗွဲမဂတးဂတုန်ရ။
ဟိုတ်နူကရောၚ်ပၞာန်လုပ်စိုပ်ကၠုၚ်ဂှ်တုဲ ဟွံအောန်နူကဵု ၆ ကွာန် ပါလုပ်သီုကဵုဒံၚ်ယှံၚ်၊ ပုၚ်ယှံၚ်၊ သေန်နေန်ကုန်၊ သေန်ပုနစ်တံ ဒးဂြိပ်ဒဴပါဲဒလေတ်ဒၟံၚ် အလုံကွာန်မွဲရ။
ဟိုတ်နူဒပ်ကံၚ်ဇြဳပၞာန် ထ္ပက်လဝ်ကရောၚ်ပၞာန်ဂှ်တုဲ ဒဵုကဵုအခိၚ်လၟုဟ် က္တဵုဒှ်ပေါဲဗ္တိုက်ၜါလ္ပာ် ဟွံမွဲဏီကီုလေဝ် ညးဒေသတံဂှ်တှ်ေ ပေါဲဗ္တိုက်က္တဵုဒှ်ကၠုၚ်ဂှ် ဂွိၚ်ဒၟံၚ်အိုတ်ရ။
အတိုၚ်ဂလာန်ညးဒေသတံဂှ်မ္ဂး ဒပ်ကံၚ်ဇြဳပၞာန်ဝွံ လုပ်ကဴဟွံကလေၚ်ဂွံ မၞိဟ် ၃ တၠ ပါလုပ်သီုကဵုဒုဂအုပ်ပါမောက္ခ ဥူကျဝ်အံၚ်ဂှ်မ္ဂး ဂေတ်ကွာန်ထ္ပက်ပၞာန်တုဲ သွက်ဂွံဗ္တိုက်ဂှ် ကဵုလဝ်အမိၚ်ရောၚ် သ္ဂးရ။
ဒပ်ပၞာန်ဗထူဂှ် မၞိဟ် ၃ တၠ မရပ်ဒက်လဝ် ပါလုပ်သီုကဵုဒုဂအုပ်ပါမောက္ခဂှ် ထိၚ်ဒက်မၚ်မွဲကဵုလဝ် ခိုဟ်ဟ်ဂေါဝ်ဝ်ရောၚ် လလောၚ်ပ္တိတ်ကဵုလဝ်သမ္တီ ပ္ဍဲဂိတုဖေဖဝ်ဝါရဳ ၂၈ တေံရ။
ပရိုၚ်−သြၚ်လောန်တိုၚ်(မ်)
ဗီု−CJ