သဓီု၊ မာတ် ၂
သၞေဟ်ကၚ်စၟဳတ်ကံၚ်ဇြဳပၞာန် ဒဒန်ဒူရေန်သုက် ပ္ဍဲကွာန်ဒူရေန်သုက် ပွိုၚ်ဍုၚ်သဓီု တွဵုရးဍုၚ်မန်ဂှ်ကဵု တမ်ဒပ်ခလရ စၟတ် (၂၄) ဒးဒုၚ်ဗ္တိုက်ကဵုဒရုၚ်တုဲ ပရေၚ်ဇီုကပိုက်ချိုတ်တံနွံမာန်ရောၚ် ဂွံတီကေတ် ဇရေၚ်ဂကောံဒပ်စဵုဒၞါဒေသတံရ။
ပ္ဍဲဂိတုဖေဖဝ်ဝါရဳ ၂၉ အခိၚ်ဗ္တံ ၜိုတ် ၇ နာဍဳဂှ် ဒပ်ပၞာန်ဗၠးၜးကောန်ဂကူကရေၚ် KNLA ကေုာံ ဂကောံဒပ်ပံၚ်ကောံစဵုဒၞါညးဍုၚ်ကွာန်တံ ထောံလဝ်မခတိုဟ် ၆ မ နကဵုဒရုၚ်တုဲ ဗ္တိုက်လဝ် ဒပ်ကံၚ်ဇြဳပၞာန် ကေုာံ ဗ္ဒိုပ်သၞေဟ်ကၚ်တံဂှ်ရ။
အပ္ဍဲပရေၚ်ဗ္တိုက်ဏံ မခတိုဟ်ဒရုၚ် ၃ မဂှ်ဝွံ ဒတုံဗ္တိုဟ်ထ္ကးအာလဝ် လ္တူဂဒုက်ဗာန်ကာ သၞေဟ်ကၚ်စၟဳတ်တံဂှ်တုဲ မခတိုဟ်ဒရုၚ် ၃ မပၠန်ဂှ် ဒတုံဗ္တိုဟ်ထ္ကးအာလဝ် အပ္ဍဲဒပ်ခလရ (၂၄) ဂှ် သ္ဂးရ။
အပ္ဍဲလၟေၚ်ဒဒှ်ဒးဒုၚ်ဗ္တိုက်ကဵုဒရုၚ်ဂှ် ကောန်ဒပ်ကံၚ်ဇြဳပၞာန် ဟွံအောန်နူကဵု ၂ တၠ ဇီုကပိုက်ချိုတ်အာလဝ်ရောၚ် လ္ပာ်ဂကောံဒပ်စဵုဒၞါဒေသတံ ဟီုလဝ်ကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာ ဟွံမာန်ဏီရ။
ကြဴနူဒပ်ကံၚ်ဇြဳပၞာန် ကေုာံ ဗ္ဒိုပ်သၞေဟ်ကၚ်တံ ဒးဒုၚ်ဗ္တိုက်တုဲဂှ် ဒပ်ဍာ်ပ္ကတ်ပ္ကေၚ် စၟတ် (၉) ဖျေံသ္ဇိုၚ်ပွိုၚ်ဍုၚ်သဓီု ၊ ဒပ်ပၞာန်ကျာ ကေုာံ ဒပ်အမၠံက်တံ ဒၞါဲ PDF မၞုံမာန်တံဂှ် ပန်ပှော်လဝ် နကဵုလွဟ်ဇၞော် ဟွံအောန်နူကဵု ၂၀ လ္တုန်ရ။
လ္ပာ်ကံၚ်ဇြဳပၞာန် ၜိုန်ရပန်ပှော်လဝ် လွဟ်ဇၞော် ဟွံပိုတ်သ္ကုတ်ကီုလေဝ် ဂကောံဒပ်ပံၚ်ကောံ ဇြဟတ်ပၠန်ဂတးတံဂှ် ဇီုကပိုက်ဒးဟွံမွဲ ဆုတ်ကလေၚ်မာန်လဝ်ဂှ် ဂွံတီကေတ်ရ။
တုဲကၠုၚ် ပ္ဍဲဂိတုဖေဖဝ်ဝါရဳ ၁၁ တေံဂှ်လေဝ် သၞေဟ်ကၚ်ဒဒန်ဒူရေန်သုက်၊ ခလရ (၂၄) ၊ ခမရ (၁)တံ ဒးဒုၚ်ဗ္တိုက်ကဵုဒရုၚ်တုဲ ဒပ်ကံၚ်ဇြဳပၞာန် ကေုာံ ကောန်ဒပ်ဗၠာဲသၟိၚ် ၆ တၠ ဇီုကပိုက်ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု−CJ