မတ်မလီု၊ မာတ် ၂
မၞိဟ်လုပ်စိုပ်ကၠုၚ် အပ္ဍဲတွဵုရးဍုၚ်မန်တံကဵု ကၟုဲအာတရဴတံဂှ် သွက်ဂွံစၟဳတ် စရၚ်ကၟုဲ ချိုတ်တ်ပၠိုတ်တ်ဂှ် သ္ကိုပ်ဝန်ဇၞော်တွဵုရး ကံၚ်ဇြဳပၞာန်ခါန်ကၞက် ဥူအံၚ်ကျဳတုၚ် စၞောန်ပ္ညုၚ်လဝ်ရောၚ် ဂွံတီကေတ်ရ။
သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ခါန်ကၞက်ဂှ် ညံၚ်ကၟုဲအာတရဴတံ ဂွံဇူဒီုမံၚ်တန်တဴ ဗွဲမဂီုကၠီုဖျေံစိုတ်မာန် နကဵုတၚ်ထ္ၜးဟိုတ်ဏံ သွက်ဂွံပလံၚ်ဗစိုပ်စရၚ်ကၟုဲ ဗွဲမစှ်ေကဵုသၞောတ်ဂှ် စၞောန်ပ္ညုၚ်ကၠုၚ်ရ။
တုဲကၠုၚ် ပ္ဍဲဂိတုဖေဖဝ်ဝါရဳ ၂၄ တေံ အပ္ဍဲကောံဓရီု ကမ္မတဳကမၠောန်အာတရဴ စပ်ကဵုဒေသတွဵုရးဍုၚ်မန် မကၠောန်ဗဒှ်လဝ် ပ္ဍဲရုၚ်အလဵုအသဳတွဵုရး လ္တူဍုၚ်မတ်မလီုဂှ် စၞောန်ပ္ညုၚ်ကၠုၚ်ရ။
ကြဴနူစၞောန်ပ္ညုၚ် သွက်ဂွံစၟဳတ် စရၚ်ကၟုဲတံ ချိုတ်တ်ပၠိုတ်တ်တုဲဂှ် မ္ၚးနူကဵုဟဝ်တေဝ်၊ မိုဝ်တေဝ် ကေုာံ ဗ္ဒမ်ဇူဒီုတံဂှ် ပ္ဍဲကဵုကွာန် ကေုာံ အရာပ်တံဂှ်လေဝ် လ္ပာ်ကံၚ်ဇြဳပၞာန်တံ စၟဳတ်စရၚ်ကၟုဲတံ တေၚ်ဂြတ်ကၠုၚ်ဂှ် ဂွံတီကေတ် အတိုၚ်ဂလာန်ညးဒေသတံရ။
ညးဒေသမွဲတၠဂှ် ပ္ဍဲအရာလုပ်စိုပ်စၟဳတ်စရၚ်ကၟုဲဂှ် သ္ၚိ က္ဍိုပ်သ္ၚိကၠံတံ စၞောန်ထ္ၜးဏာတံဂှ် စၟဳတ်အဓိကတုဲ အာတ်မိက်ဒၟံၚ်လှုဲတံလေဝ် နွံဒၟံၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အပ္ဍဲအရာပ်ဂှ် ပြဟ်ဟ်ဏံ စၟဳတ်ဒၟံၚ်စရၚ်ကၟုဲရ။ ဆ္ဂး အဓိကဂှ်တှ်ေ သ္ၚိ က္ဍိုပ်သ္ၚိကၠံတံ စၞောန်ထ္ၜးဏာတံဂှ် လုပ်ဂၠိုၚ်ရ။ အခါစၟဳတ်တှ်ေ သ္ၚိဟွံတေၚ်လဝ်စရၚ်ကၟုဲတံဂှ် ယဝ်ရက္ဍိုပ်သ္ၚိကၠံဂှ် ကေတ်တာလျိုၚ်မ္ဂး တ္ၚဲယးတ္ၚဲတၟးတှ်ေ ချိၚ်ဖာတ်ထောံပ္ဍဲရုၚ်။ အာတ်လှုဲ။ တုဲတှ်ေ သ္ၚိဍေံတံသံသယနွံတံဂှ်တှ်ေ ဂၠါဲချိုတ်တ်ပၠိုတ်တ်ရ။ သၟာန်ကၠုၚ် စနူကဵုဖုၚ်တံ မုတံရ။ တုဲတှ်ေ သ္ၚိဂွံလှုဲမာန်တံဂှ်တှ်ေ သ္ၚိဗီုတံဏံဂှ် ဟွံထေၚ်လဝ်မွဲသာ် လုပ်စၟဳတ်တံလေဝ် နွံဒၟံၚ်ရ” သာ်ဝွံ ဟီုရ။
ဂကောံပံၚ်ကောံ ကၚ်ဇြဳပၞာန်ဂှ်ဝွံ အခိၚ်လုပ်စၟဳတ်စရၚ်ကၟုဲဂှ် ယဝ်ရဟွံတေၚ်လဝ်စရၚ်ကၟုဲမ္ဂး မၞိဟ်မွဲတၠ အောန်အိုတ် နူမသုန်ဠက်ဒ္ကေဝ် အာတ်မိက်ဒၟံၚ် စဵုကဵုကိုဋ်နွံဒၟံၚ်တုဲ ယဝ်ရဟွံကဵုလှုဲမ္ဂး ဖျေံထံၚ်ဏောၚ်ဂးတုဲ ဘပဠဒၟံၚ်တံ နွံဒၟံၚ်ရ။
ကောန်ကလောန်ဆုဲပြံၚ်မွဲတၠဂှ် ကောန်ရဲကံၚ်ဇြဳပၞာန်တံဂှ် ဟိုတ်နူစၟဳတ်ဒၟံၚ် စရၚ်ကၟုဲအပ္ဍဲအရာပ်တံ လၟေၚ်ၚ်ဂှ်ရ ဒးတေၚ်ဒၟံၚ်စရၚ်ကၟုဲလၟိုန်တုဲ ယဝ်ရတေၚ်စရၚ်ကၟုဲမ္ဂးလေဝ် ဒးကဵုဒၟံၚ်လှုဲဏောၚ်ဂှ် ဟီုရ။
“ပ္ဍဲအရာပ်တံဂှ်တှ်ေ စၟဳတ်ဒၟံၚ်ရဏောၚ်။ ပ္ဍဲအရာပ်တံဂှ်တှ်ေ သ္ကုတ်ဏံဂှ် က္ဍိုပ်သ္ၚိစှ်၊ က္ဍိုပ်သ္ၚိကၠံ စၟဳတ် သာ်ဏံနွံရ။ စၟဳတ်ဂှ်တှ်ေ လၟေၚ်ၚ်ရဏောၚ်။ စရၚ်ကၟုဲဂှ်တှ်ေ ဒးတေၚ်။ ၂၀ တ္ၚဲ ဒးတေၚ်မွဲဝါ။ တ္ၚဲၜက်အာတှ်ေ ဟီုတိုန်ကီု။ အခါအာတေၚ်တှ်ေ ဒးကဵုလှုဲ။ ခရိတ်တၞးလိက်တံ၊ လိက်တၞးစရၚ်ကၟုဲလၟေၚ်ၚ်တံဂှ် နွံဒၟံၚ်တုဲ အာတေၚ်တှ်ေ သမ္တီဒးဒၟံၚ်တုဲ ၜိုတ်စေတနာနွံ ဒးကဵုရ” သာ်ဝွံ သ္ဂးရ။
အခိၚ်လၟုဟ် ဒပ်ပၞာန်၊ ဗၠာဲသၟိၚ် ကေုာံ သ္ကိုပ်အုပ်ဓုပ်အရာပ် သၟဝ်တဲကံၚ်ဇြဳပၞာန်တံဝွံ နကဵုတၚ်ထ္ၜးဟိုတ် ပရေၚ်ဂီုကၠီုဂှ် ပ္ဍဲကဵုသ္ၚိမၞုံအပ္ဍဲအရာပ်၊ အပ္ဍဲကွာန်တံဂှ် ကြပ်အရိုဟ်ဒဒှ်တ္ၚဲ လုပ်စိုပ်စၟဳတ်ဒၟံၚ် စရၚ်ကၟုဲတံ နွံဒၟံၚ်ရ။
ပ္ဍဲဒၞါဲစၟဳတ်သာ်ဏံဂှ်လေဝ် မၞိဟ်ဟွံတေၚ်လဝ်စရၚ်ကၟုဲတံဂှ် အာတ်မိက်သြန်တုဲ ကလေၚ်ဗလးကဵုတံ ကၠောန်သ္ပဒၟံၚ်တုဲ မၞိဟ်လှုဲဟွံမာန်တံဂှ် တပ်စုတ်ၝောံပိုဒ်နာနာတုဲ ဖျေံဒၟံၚ်ထံၚ်တံ နွံဒၟံၚ်ရောၚ် ဂွံတီကေတ် အတိုၚ်ဂလာန်ညးဒေသတံရ။
အတိုၚ်သၞောဝ်စရၚ်ကၟုဲဂှ်မ္ဂး ကောန်ဂြောဝ်ဂတာဟွံသေၚ် ယဝ်ရတိက်ဗ္တံမ္ဂး ဒးတေၚ်စရၚ်ကၟုဲဏောၚ်တုဲ ယဝ်ရဟွံတေၚ်စရၚ်ကၟုဲမ္ဂး ဒးကဵုဒဏ်သြန် ၁၀၀၀၀ ဒ္ကေဝ်ဏောၚ်တုဲ ဟွံကဵုဒဏ်လှုဲမ္ဂး ဒးဒုၚ်ဒဏ်ထံၚ် ၇ တ္ၚဲဏောၚ်ဂှ် စၞောန်ပျးလဝ်ရ။
သၞောဝ်စရၚ်ကၟုဲဂှ် လက်ထက်အလဵုအသဳပၞာန်ကၠာတေံ ရပ်စပ်စကာကၠုၚ်လဝ် အဆက်က်တုဲ ပ္ဍဲလက်ထက်အလဵုအသဳ NLD ဂှ် သၞောဝ်ဏံဝွံ ဒၟါနူဟွံကိတ်ညဳကဵု အစာံအခေါၚ်အရာမၞိဟ်တံဂှ်ရ ပ္ဍဲသၞာံ ၂၀၁၆ တေံ ရုပ်သီပလီုလဝ်ရ။
ကြဴနူပၞာန်သီအဝဵုကလေၚ်မွဲဝါပၠန်တုဲ ပ္ဍဲသၞာံ ၂၀၂၁ ဂိတုဖေဖဝ်ဝါရဳဂှ် ကလေၚ်ပၠောပ်လဝ်လမျီု သၞောဝ်စရၚ်ကၟုဲဂှ်တုဲ ကုညးဍုၚ်ကွာန်ဒေသတံဂှ် စၟဳစရၚ်ကၟုဲ လၟေၚ်တ္ၚဲတုဲ ရပ်ဒက်အာတ်ဒၟံၚ်လှုဲတံ ကၠောန်သ္ပဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media