မတ်မလီု၊ မာတ် ၂
အစဳဇန် ဂွံပံၚ်တောဲစပ်ကဵုပရေၚ်ပၞာန် ကုဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် AD ဗွဲမလုပ်သၞောဝ်ဂှ် နွံကီုလေဝ် ဒဵုကဵုအခိၚ်လၟုဟ် ပ္ညဳပ္ညပ်ရေၚ်တၠုၚ်လဝ် ဗွဲမလုပ်သၞောဝ် ဟွံမွဲဏီပုဟ်ဂှ် ကံၚ်ဇြဳဖေဝ်ဒရာဍုၚ်မန် MSFC ဟီုရ။
ကောံဓရီု ကံၚ်ဇြဳဖေဝ်ဒရာဍုၚ်မန် MSFC အလန်ဒုတိယ မကၠောန်ဗဒှ်လဝ် ပ္ဍဲကဵုတိဍာ်ဗၠးၜးမွဲဒၞါဲတုဲဒှ်တုဲ ပ္ဍဲကဵုပေါဲသောၚ်ကလးလိက်ပရိုၚ် မကၠောန်ဗဒှ်လဝ်ဂှ် သ္ကိုပ်ဌာနကာစဵုဒၞါကံၚ်ဇြဳဖေဝ်ဒရာဍုၚ်မန် MSFC နာဲဍေန်ပၠဟံသာ သှ်ကဵုလဝ် တၚ်သၟာန်ဌာန်ပရိုၚ်သြၚ်လောန်တိုၚ်(မ်)ရ။
တုဲကၠုၚ် ပ္ဍဲဂိတုဖေဖဝ်ဝါရဳ ၁၄ တေံ လ္တူတၚ်လလောၚ်တြး ဗော်ဍုၚ်မန်တၟိ AD ဗ္တိုက်အာ ဒပ်ပၞာန်သီအဝဵုဏောၚ်ဂှ် ကံၚ်ဇြဳဖေဝ်ဒရာဍုၚ်မန် ပံၚ်တောဲအာ နကဵုပရေၚ်ပၞာန်ဏောၚ်တုဲ ပရေၚ်ပ္ညဳပ္ညပ် လ္ဂောံကဵုပရေၚ်ဍုၚ်ကွာန်တံဂှ်လေဝ် ဆက်ကၠောန်အာဏောၚ်ဂှ် ကဵုလဝ်သမ္တီ ပ္ဍဲတ္ၚဲဂှ်ရ။
နာဲဍေန်ပၠဟံသာဂှ် ပြဟ်ဟ်ဏံ ဗော်ဍုၚ်မန်တၟိ AD ဆိုက်ဗ္ဒက်ကၠုၚ်ဇကုတံ ဗွဲမလုပ်သၞောဝ်ဟွံမွဲကီုလေဝ် လ္ဂောံကဵုမူ နူကဵုကံၚ်ဇြဳဖေဝ်ဒရာဍုၚ်မန် သွက်ဂွံပံၚ်တောဲပရေၚ်ပၞာန်ဂှ် အစဳဇန်ဂွံဆိုက်ဗ္ဒက် ဗွဲမလုပ်သၞောဝ် နွံဂှ် ဟီုရ။
“ပိုယ်တံ သွက်ဂွံကွာ်အာ အတိုၚ်မူဏံ နွံရ။ ဆ္ဂး အတိုၚ်အကာဲအရာပြဟ်ဟ်ဏံမ္ဂး နူကဵု NMSP-AD ဗီုပြၚ်ဆိုက်ဗ္ဒက်ကၠုၚ် ဟွံမွဲကီုလေဝ် ဗီုပြၚ်ဗွဲပလး Informal စပ်ကဵုပရေၚ်ပၞာန်ဂှ်တှ်ေ နွံရ။ ဆ္ဂး ပ္ဍဲပၠန်ဂတးဏံ လ္ပာ်ပိုယ်တံ မူနွံဒၟံၚ်ဏောၚ်။ ဂကောံဗ္တိုက်ဒၟံၚ် စကစတံသီုဖအိုတ် ဒက်ပ္တန် နကဵုမဟာမိတ်တုဲ ဂွံလုပ်အာပေါဲဗ္တိုက် မူနွံဒၟံၚ်တုဲ သွက်ဂွံပံၚ်တောဲစပ်ကဵုပရေၚ်ပၞာန် ကု NMSP-AD ဂှ် ပိုယ်တံ ဂွံဆိုက်ဗ္ဒက်အာညးတံ ဗွဲမလုပ်သၞောဝ်ဂှ် အစဳဇန်ဒၟံၚ်ရ။ ဆ္ဂး ဒဵုကဵုအခိၚ်လၟုဟ် ပ္ညဳပ္ညပ်ရေၚ်တၠုၚ်လဝ် ဗွဲမလုပ်သၞောဝ် ဟွံမွဲဏီပုဟ်ဂှ် မိက်ဂွံဟီုရ” သာ်ဝွံ ညးသ္ဂးရ။
ပ္ဍဲကဵုသၟဝ်ပၠတရဴပရေၚ်ပၞာန်၊ ပရေၚ်ဍုၚ်ကွာန် ကံၚ်ဇြဳဖေဝ်ဒရာဍုၚ်မန်ဂှ် ဒက်ပ္တန်လဝ် ဒပ်ပၠန်ဂတးဍုၚ်မန် MSRF တံတုဲ ဒက်လဝ်မဟာမိတ် ကုဂကောံပၠန်ဂတးရပ်လွဟ် ဖျေံသ္ဇိုၚ်အပ္ဍဲဒေသမန်တံရ။
နာဲဗညာမန် ညးမၞုံအခေါၚ်ဟီုဂး ဗော်ဍုၚ်မန်တၟိ AD ဂှ် ဂွံပံၚ်တောဲရေၚ်တၠုၚ်အာ ကုဂကောံလုပ်ဒၟံၚ်ပေါဲဗ္တိုက် ဒစဵုဒစးဒၟံၚ် ကုကံၚ်ဇြဳပၞာန်တံဂှ် ဖျေံလဝ်မူဝါဒရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“နကဵုဗော်ဍုၚ်မန်တၟိ AD ဂွံပံၚ်တောဲရေၚ်တၠုၚ်အာ ကုဂကောံလုပ်ဒၟံၚ်ပေါဲဗ္တိုက် ကုကံၚ်ဇြဳပၞာန်တံသီုဖအိုတ်ဂှ် ပိုယ်တံ ဖျေံလဝ်မူတုဲတုဲရ။ ဒုၚ်သ္ဇိုၚ်ကဵုလ္တူဏံတုဲ ပ္ဍဲကဵုကဏ္ဍ ပိုယ်တံ ပံၚ်တောဲရေၚ်တၠုၚ်အာဂွံတံဂှ် ပံၚ်တောဲအာကဵု ဂကောံမဆေၚ်စပ်တံဂှ်ဏောၚ်” သာ်ဝွံ သ္ဂးရ။
ဗော်ဍုၚ်မန်တၟိ AD ဝွံ တုဲကၠုၚ်ပ္ဍဲဂိတုဖေဖဝ်ဝါရဳ ၂၂ တေံဂှ်လေဝ် နဒဒှ်မဟာမိတ် ဗ္တိုက်သရိုဟ်သၞောတ်တၠအဝဵုပၞာန် သွက်ဂွံပံၚ်တောဲရေၚ်တၠုၚ်အာ ပ္ဍဲကဏ္ဍပရေၚ်ဍုၚ်ကွာန်၊ ပရေၚ်ပၞာန်၊ ပရေၚ်ကလုတ်တမာန်တံဂှ် တုပ်လဝ်စိုတ် ကုအလဵုအသဳညဳသၟဟ်ဂကူ NUG ရ။
ကံၚ်ဇြဳဖေဝ်ဒရာဍုၚ်မန်ဂှ် ပရေၚ်ပံၚ်တောဲ ပရေၚ်ပၞာန်၊ ပရေၚ်ဍုၚ်ကွာန် ဇြဟတ်ဍိုန်လျဒၟံၚ် အပ္ဍဲတွဵုရးဍုၚ်မန်ဂှ် သဳကၠဳလဝ် ပ္ဍဲကဵုကောံဓရီုအလန်ဒုတိယ သၠဲသၠဲလးလးတုဲ ကမ္မတဳ၊ လၟေၚ်ကမၠောန် နွံပၟိက် သွက်ပရေၚ်ပံၚ်တောဲ ပရေၚ်ပၞာန်၊ ပရေၚ်ဍုၚ်ကွာန် သၠဲလးနူဏံ ဂွံမံက်ဂတဝ်ကၠုၚ်ဂှ် ဖျေံစၟတ်အာဏောၚ် သ္ဂးရ။
မွဲလ္ပာ်ဂှ်ပၠန် ပ္ဍဲကဵုကမ္မတဳကံၚ်ဇြဳ ၃ တန်ဂှ်လေဝ် မ္ၚးနူကဵုဂကူမန်ဂှ် ကောန်ဂကူကောန်ဍုၚ်အရၚ် ဖျေံဒၟံၚ်သ္ဇိုၚ် ပ္ဍဲဍုၚ်မန်တံ ဂကောံဇြဟတ်ပၠန်ဂတး ပါလုပ်လဝ် ပ္ဍဲပၠန်ဂတးက္ညၚ်တံ တၠကမၠောန်ပရေၚ်ပိုန်ဒြပ်တံ က္ဍိုပ်သ္ကိုပ်နူကဵုဂကောံနာနာတံဂှ် သွက်ဂွံသၠဲပ္တိုန်ဂှ် သ္ဂုတ်သွာတ်လဝ်ရောၚ် ဂွံတီကေတ်ရ။
သ္အာၚ်နူဂှ်ပၠန် ပ္ဍဲကဵုကောံဓရီု အလန်ဒုတိယ မကၠောန်ဗဒှ်လဝ်ပွိုၚ်ၜါတ္ၚဲဂှ် သၞောဝ်သ္ဇိုၚ်ဍုၚ်မန် (မူအပြောံသုည) အခိၚ်ကာလအကြာ ကာလပၠန်ဂတးဂှ်လေဝ် သ္ပဒတန်မာန်လဝ်တုဲ မူအပြောံဏံဂှ် လလောၚ်ပ္တိတ်လဝ် ဗွဲမလုပ်သၞောဝ် ဟွံမွဲဏီရ။
ပ္ဍဲကဵုမူအပြောံသၞောဝ်သ္ဇိုၚ်ဍုၚ်မန်ဂှ် မ္ၚးနူကဵုကောန်ဂကူဂမၠိုၚ် အခေါၚ်အရာဂကောံမၞိဟ်အောန်တံဂှ်လေဝ် လၞုက်ထောံလဝ်ဟွံမွဲ ချူခၞံလဝ်ရောၚ် ဥက္ကဌ ကမ္မတဳခၞံသၞောဝ် ကံၚ်ဇြဳဖေဝ်ဒရာဍုၚ်မန် မိကောန်ဆာန်နန် သှ်ကဵုလဝ် တၚ်သၟာန်သြၚ်လောန်တိုၚ်(မ်) ရ။
“အခါချူခၞံသၞောဝ်သ္ဇိုၚ် အခိၚ်ကာလအကြာဂှ်လေဝ် အဓိကဂှ်တှ်ေ မ္ၚးနူကဵုကောန်ဂကူဂမၠိုၚ် အခေါၚ်အရာဂကောံမၞိဟ်အောန်တံဂှ်လေဝ် ညံၚ်ဂွိုအ်သှ်ေအာ ပိုယ်တံ ချူခၞံလဝ်ရ။ ယဝ်ဟီု ကရေၚ်၊ ဗၟာ၊ ပအိုဝ်တှ်ေ ညအ်ဂှ် ဂကောံမၞိဟ်အောန်ဟွံသေၚ်ပုဟ်။ ဟိုတ်နူဒှ်ညးစၞး ကောန်ဂကူ မၞုံအပ္ဍဲဍုၚ်ပိုယ်တံဂှ်တုဲ အခေါၚ်အရာညးတံဂှ်လေဝ် ချူခၞံလဝ် တုပ်ပ်ကဵုအခေါၚ်အရာပိုယ်တံသီုဖအိုတ်ရဏောၚ်ဟီုဂှ် မိက်ဂွံဟီုရ” သာ်ဝွံ သ္ဂးရ။
မူအပြောံဏံဂှ် သဳကၠဳကဵု ဂကောံပၠန်ဂတး ဒစဵုဒစးဒၟံၚ် သၞောတ်တၠအဝဵုပၞာန် ဖျေံသ္ဇိုၚ်အပ္ဍဲဍုၚ်မန်တံ ဗော်ပရေၚ်ဍုၚ်ကွာန်တံတုဲ သွက်ဂွံသ္ပဒတန် သၞောဝ်သ္ဇိုၚ်ဒက်ပ္တန်ဂှ် ရေၚ်တၠုၚ်အာဏောၚ် ကဵုလဝ်သမ္တီရ။
ကံၚ်ဇြဳဖေဝ်ဒရာဍုၚ်မန် MSFC ဂှ် ပ္ဍဲသၞာံ ၂၀၂၁ သီလဝ်အဝဵု အပ္ဍဲဂိတုဨပရဴဂှ် စဒက်ပ္တန်လဝ် နဒဒှ်ကမ္မတဳပံၚ်တောဲရေၚ်တၠုၚ်ဍုၚ်မန် MSICC တုဲ ကြဴနူကောံဓရီုအလန်ပထမ မကၠောန်ဗဒှ်လဝ် ပ္ဍဲသၞာံ ၂၀၂၃ ဂိတုဂျာန္နဝါရဳတုဲဂှ် ပြံၚ်လှာဲထောံလဝ်လွေဟ်ရ။
ပရိုၚ်−သြၚ်လောန်တိုၚ်(မ်)
ဗီု−MSRF