ဘာပန်၊ မာတ် (၃)
နကဵုညးဍုၚ်ကွာန်ဒေသ မၞုံအပ္ဍဲခရိုၚ်ဘာပန် KNU ဂမၠိုၚ် ဒစဵုဒစးသၞောဝ်ယိုက်ဂၠေၚ်လျိုၚ်ပၞာန်ကံၚ်ဇြဳပၞာန်တုဲ ပွမထံက်ဂလာန်ကဵုဇြဟတ်လုပ်စိုပ် အပ္ဍဲကောန်ဒပ်ကံၚ်ဇြဳပၞာန် မပ္ကောံပ္ကေဝ်ဒၟံၚ်ဇြဟတ်ဂှ် လ္ပကၠောန်အိုတ်ညိဂှ် ပ္ဍဲခရိုၚ်ဘာပန် ဒပ်မဟာ ၅ KNU တံ လလောၚ်ပ္တိတ်လဝ်တၚ်လလောၚ်တြး နကဵုစၟတ်တ္ၚဲ ဂိတုမာတ်ချ် ၁ တေံရ။
ဂကောံတၠအဝဵုပၞာန်တံဝွံ ကြဴနူပၠံၚ်ၜးကေတ် အဝဵုကၟိန်ဍုၚ် အတေၚ်အဓမ္မတုဲ ဖန်ဗဒှ်ဒၟံၚ် ပၞာန်အပ္ဍဲဍုၚ် ညံၚ်အာယုက်ဂွံဂၠိၚ်တုဲ အပ္ဍဲပေါဲဗ္တိုက်ပၞာန်အပ္ဍဲဍုၚ်တံဂှ် ဟိုတ်နူကောန်ဒပ်ညးတံ ချိုတ်ဂျိုၚ်ကလိဂွံဝပ်တံကဵု ဖျေံလွဟ်လုပ်စိုပ်လ္ပာ်သၞတံဂှ်တုဲ ဇြဟတ်ဒပ်ဍိုန်လျစှ်ေကၠုၚ်ဒၟံၚ်ဂှ် ပါလုပ် ပ္ဍဲတၚ်လလောၚ်တြးဂှ်ရ။
ဒပ်ပၞာန် ဇြဟတ်ဍိုန်လျကၠုၚ်ဒၟံၚ်ဏံဂှ် သွက်ဂွံကလေၚ်ဗပေၚ်ဇြဟတ် ပၠောပ်လမျီုကုသၞောဝ်ယိုက်ဂၠေၚ်လျိုၚ်ပၞာန်တုဲ ကော်ကေတ်ညးဍုၚ်ကွာန်တံ နကဵုနဲကဲအဓမ္မ အနိၚ်အပိုၚ်တုဲ ကဵုဗ္တိုက်အာပၞာန်ရဏောၚ်ဂှ် ဒပ်မဟာ ၅ KNU သ္ဂးရ။
ဟိုတ်ဂှ်ရ အိုဿီုကဵုညးဍုၚ်ကွာန် ပ္ဍဲလ္တူဍုၚ်၊ ပ္ဍဲကွာန်ရး မၞုံအပ္ဍဲဒေသခရိုၚ်ဘာပန်တံ လ္ပဒ္ဂေတ်ဗက်သၞောဝ်ယိုက်ဂၠေၚ်လျိုၚ်ပၞာန်ကံၚ်ဇြဳပၞာန်ဂှ်တုဲ သွက်ဂွံဒစဵုဒစးဂှ်ကီု၊ နကဵုညးဍုၚ်ကွာန်ဒၟံၚ်လ္တူဍုၚ်တံ ယဝ်ရဒးဆေၚ်ကၠုၚ်မုက် ပွမကဵုဇြဟတ်ဂရိုဟ် အနိၚ်အပိုၚ်မ္ဂး သွက်ဂွံဂြိပ်ဒဴပါဲဒလေတ် လ္ပာ်ကွာန်ရးမကြပ်တံအိုတ်ဂှ် လလောၚ်ပ္တိတ်လဝ်ရ။
ပ္ဍဲကဵုကွာန်လုပ်စိုပ်ဇူဒီုတံဂှ် သွက်သ္ဂောံဂွံပရေၚ်မၚ်မွဲရံၚ်စံၚ် ကေုာံ စၞောန်ထ္ၜးဂၠံၚ် ဇရေၚ်ညးတာလျိုၚ်မဆေၚ်စပ်တံဂှ် သွက်ဂွံစုတ်စရၚ်ယၟုချိုတ်တ်ပၠိုတ်တ်ဂှ်ကီု၊ ယဝ်ရဒှ်ကၠုၚ်အခက်အခုဲမ္ဂး သွက်ဂွံကဵုပရိုၚ် ကုညးတာလျိုၚ်ဒေသမုက်ပၞာန် မကြပ်တံ လွာဲဂှ်အိုတ်ဂှ် ကဵုလဝ်သမ္တီရ။
ဂွံတီကေတ်တၚ်လလောၚ်တြးဏံတုဲ ဟွံဒ္ဂေတ်ဗက်မွဲသာ် ယဝ်ရဒ္ဂေတ်ဗက်ကၠောန်ၜိုတ်အာ အတိုၚ်လၟေၚ်ကမၠောန် ဂကောံကံၚ်ဇြဳပၞာန် တၠအဝဵုပၞာန်တံဂှ်မ္ဂး ဒးဒုၚ်စၟတ်သမ္တီ နဒဒှ်ကောန်ဂကောံတၠအဝဵုပၞာန် ရေၚ်တၠုၚ်တဴအတိုၚ်ပၟိက်တၠအဝဵုပၞာန်တံဏောၚ်ဂှ် ဂွံတီကေတ် အတိုၚ်တၚ်လလောၚ်တြးဂှ်ရ။
ဗော်သွးကောန်ဂကူကရေၚ် KNU ဗဟဵုဂှ်လေဝ် ဒစဵုဒစးသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်တုဲ နကဵုညးဍုၚ်ကွာန်တံလေဝ် သွက်ဂွံပံၚ်တောဲပါလုပ် ပ္ဍဲကဵုကမၠောန်ဗ္တိုက်သရိုဟ်ဒစဵုဒစး သၞောဝ်ယိုက်ဂၠေၚ်လျိုၚ်ပၞာန်တံအိုတ်ဂှ် ဖ္တိုက်ဖ္အောဝ်လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−KNU