မတ်မလီု၊ မာတ် ၈
ဟိုတ်နူအကြေပ်အဂြတ် စပ်ကဵုပရေၚ်ဗ္စာရဏာမၞိဟ်တံဂှ်တုဲ သွက်ညးဒးဒုၚ်ဒဝ်လဝ် သီုညးဗြဴ ကေုာံ ကောန်ၚာ်သၟတ်ဗြဴတံဂှ် အရာပကီုပရာပ် ညံၚ်သ္ဂောံသ္အးဇ္ၚးတုဲ ဘဝမၞိဟ် သ္ဂောံဍိုက်ပေၚ်မာန်ဂှ် နွံပၟိက်ကဵုပရေၚ်ဓလိုက်တမ်ရိုဟ် ဗွဲမပြဟ်ပြေဟ်ဏောၚ်ဂှ် ကံၚ်ဇြဳဖေဝ်ဒရာဍုၚ်မန် MSFC ဟီုရ။
နဒဒှ်စၟတ်သမ္တီတ္ၚဲညးဗြဴအလုံဂၠးကဝ် ပ္ဍဲဂိတုမာတ် ၈ ဏံဂှ်တုဲ ဆေၚ်စပ်ကဵုညးဗြဴဂမၠိုၚ် ကေုာံ ကောန်ၚာ်သၟတ်ဗြဴဂမၠိုၚ် မၞုံအပ္ဍဲကၟိန်ဍုၚ်တအ် သ္ပတိုၚ်ကဵု ပရေၚ်ဖောအ်ဗြေဝ်တောတက် ကေုာံ ဓဝ်ဗ္စာရဏာ ပရေၚ်မၞိဟ်တုဲ သွက်ဂွံထံက်ရီုအာဂှ် ကံၚ်ဇြဳဖေဝ်ဒရာဍုၚ်မန် လလောၚ်ပ္တိတ်ကၠုၚ် ဂလာန်ပၟိက်ဇၞော်ဂမၠိုၚ်ရ။
ပ္ဍဲကဵုဂလာန်ပၟိက်ဇၞော်တံဂှ် အကြာတၚ်ကြေပ်ဂြတ် သၞာံဗွဲမလအ်လ အပ္ဍဲကွပ်နာနာ သွက်ပရေၚ်ဂွံဒတူလိုၚ်အာ အခေါၚ်အရာညးဗြဴတံ အခိၚ်ဏံ သာတုဲပၟိက်ဇၞော်ကၠုၚ်ဂှ် ကံၚ်ဇြဳဖေဝ်ဒရာဍုၚ်မန် ညာတ်လဝ်ရ။
အကြာအကြေပ်အဂြတ်နာနာ မသ္ကဵုဇီုကပိုက်တဴ ကဏ္ဍဘဝမၞိဟ် မက္တဵုဒှ်ဒၟံၚ်အပ္ဍဲဍုၚ်တံဂှ် ပ္ဍဲသၞာံဏံ ညးဗြဴ ကေုာံ သၟတ်ဗြဴ ဍုၚ်ဗၟာ ၉ ဒဿမ ၇ ပြကောဋိကိုဋ်ဝွံ နွံပၟိက်ဒၟံၚ်ကဵု အရီုဗၚ်စပ်ကဵုပရေၚ်ဗ္စာရဏာမၞိဟ်တံရောၚ်ဂှ် သ္ဂးရ။
သၞာံ ၂၀၂၄ ဏံ အပ္ဍဲကၟိန်ဍုၚ် က္တဵုဒှ်ဒၟံၚ် အကြာပရေၚ်ကြေပ်ဂြတ် ကွပ်ဇဳဒိုဟ်တအ်ဝွံ ဇီုကပိုက်ကၠုၚ် ကဏ္ဍဘဝဒၟံၚ်မၞိဟ်နာနာတုဲ မၞိဟ်ဗြဴ ကေုာံ ကောန်ၚာ်သၟတ်ဗြဴ ပ္ဍဲကၟိန်ဍုၚ် လၟိဟ် ၉ ဒဿမ ၇ ပြကောတိကိုဋ်တအ် နွံပၟိက်ဒၟံၚ် အရီုဗၚ်ထံက်ပၚ်ဓဝ်ဗ္စာရဏာ ပရေၚ်မၞိဟ်တံရောၚ်ဂှ် သ္ဂးရ။
ကၟိန်ဍုၚ်ပိုယ် ဒးဆဵုဂဗဒၟံၚ် အခက်အခုဲနာနာ၊ ပွမဒးဒုၚ်ဇီုကပိုက် ဘဲဒဒိုက်ဇၞော်ဇၞော် ပ္ဍဲပွဳပွူ မဟာဇန်တံ ဂွံပသောၚ်သ္အးဗွဲမပြဟ်မာန်ဂှ် နွံဒၟံၚ်ပၟိက် ဇၞော်ကဵုဇြဟတ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
သ္အာၚ်နူဂှ်ပၠန် ပ္ဍဲကဵုကဏ္ဍပရေၚ်မဟာဇန်ဇဳဒိုဟ်တံဏံ သွက်ဂွံဒုၚ်ဂိုၚ်ကေတ် ပရေၚ်တုပ်သၟဟ် တြုံဗြဴ ကေုာံ ကဏ္ဍဒးဖျေံသ္ဂုတ်သွာတ်တံဂှ် ညံၚ်မၞိဟ်ဗြဴဂမၠိုၚ် ဂွံပါလုပ်ကၠုၚ်ဂၠိုၚ်ၚ်မာန် နွံပၟိက်ဒးဗပေၚ်ဇြဟတ် ရေၚ်တၠုၚ်ကဵုဏောၚ်တုဲ နူကဵုအစောံစရာဲဒြဟတ်ညးဗြဴတံ ပတဝ်ဏာကဵု ပရေၚ်ၜိုဟ်လလမ် ဂွံတန်တဴအာဗွဲမခိုၚ်ဗိုန် ကေုာံ ပရေၚ်ဖောအ်ဗြေဝ်ညံၚ်သ္ဂောံတောတက်တံဂှ် ဆက်စပ်ရေၚ်တၠုၚ်အာမာန်ရောၚ်ဂှ် သ္ဂးရ။
ပ္ဍဲတ္ၚဲညးဗြဴအလုံဂၠးကဝ် သၞာံဏံဂှ် အစောံသတ္တိညးဗြဴဍုၚ်ဗၟာ မပၠန်ဂတးဒစဵုဒစးဒၟံၚ် ကုတၠအဝဵုပၞာန်တံဂှ် သီုအမေရိကာန် မပါလုပ် ဍုၚ်ထပှ်ဍုၚ် သ္ပတဴစၟတ်သမ္တီ ပ္တိုန်ဂုန်စရာဲဂှ် လလောၚ်ပ္တိတ်လဝ် တၚ်လလောၚ်တြးရ။
အပ္ဍဲပၞာန်သီအဝဵုပွိုၚ်ပိသၞာံဏံ ပ္ဍဲဍုၚ်ဗၟာ ညးဗြဴ ၈၀၀ ပြၚ် ချိုတ်အာလဝ်တုဲ ဟွံအောန်နူကဵု ၃၃၀၀ ဇီုကပိုက်ကလိဂွံလဝ်ဝပ်တုဲ ညးဗြဴ ဗ္ဒါဲ ၈၀၀ ဒးဒၟံၚ်ထံၚ်ဂှ် ဂွံတီကေတ် အတိုၚ်တၚ်လလောၚ်တြးဂှ်ရ။
ပရိုၚ်−သြၚ်လောန်တိုၚ်(မ်)
ဗီု−AFP