ဗြဝတဳ၊ မာတ် ၉
မွဲဒမြိပ်ဒေသတေန်ဂါန်ညဳနံၚ် ပွိုၚ်ဍုၚ်ဗြဝတဳ တွဵုရးကရေၚ်ဂှ် ဒပ်ကံၚ်ဇြဳပၞာန် ကေုာံ အကြာဒပ်ပံၚ်ကောံပၠန်ဂတး KNLA တံ ပေါဲဗ္တိုက် ဆက်က္တဵုဒှ်လဝ် ဗွဲမသ္ကာတ်မြဟ်ရောၚ် ဂွံတီကေတ် နူကဵုပရိုၚ်တမ်ရိုဟ်ဗလးတိတံရ။
တမ်ဒပ် ခမရ ၃၅၅ သၟဝ်တဲကံၚ်ဇြဳပၞာန် ဖျေံသ္ဇိုၚ်တေန်ဂါန်ညဳနံၚ်ဂှ် စနူဂိတုမာတ် ၇ တုဲ ဒပ်ပံၚ်ကောံပၠန်ဂတး KNLA တံ လုပ်စိုပ်ထ္ပက်ပၞာန်ဗ္တိုက်ဂှ် ပေါဲဗ္တိုက်ၜါလ္ပာ် က္တဵုဒှ်လဝ် ဗွဲမသ္ကာတ်မြဟ်တုဲ အပ္ဍဲပေါဲဗ္တိုက်ဂှ် လ္ပာ်ဒပ်ကံၚ်ဇြဳပၞာန် ရပ်စပ်စကာလွဟ်ဇၞော်တံကဵု ပၞာန်ကျာတံတုဲ ဗ္တိုက်လဝ်ရ။
အပ္ဍဲပေါဲဗ္တိုက် ဂိတုမာတ် ၇ ဂှ် လွဟ်ဇၞော် ဒတုံဗ္တိုဟ်ထ္ကးအာလဝ်တုဲ ညးဗြဴဒေသမွဲတၠ ချိုတ်အာလဝ်တုဲ ၃ တၠ ဇီုကပိုက်ကလိဂွံလဝ်ဝပ်ဂှ် ညးဒေသတေန်ဂါန်ညဳနံၚ်တံ ဟီုရ။
ပ္ဍဲကဵုပယျာံဂယး ဂိတုမာတ် ၈ ပေါဲဗ္တိုက်သ္ကာတ်မြဟ်ဒၟံၚ်ဂှ်လေဝ် ဟိုတ်နူပရေၚ်ဗ္တိုက်ပၞာန်ကျာ ဒပ်ကံၚ်ဇြဳပၞာန်တံတုဲ ဒတုံဗ္တိုဟ်ထ္ကးအာလဝ် ပ္ဍဲရုၚ်ဂဥုဲ (သဘာဝတရားရိပ်သာ) ကွာန်တၟိ ဗ္ဒါဲတေန်ဂါန်ညဳနံၚ်ဂှ်တုဲ မိဇၞော်ပါဇၞော်ၜါတၠ ချိုတ်တုဲ ဟွံအောန်နူကဵု ၁၁ တၠ ဇီုကပိုက်ကလိဂွံလဝ်ဝပ်ဂှ် ဂွံတီကေတ် အတိုၚ်ဂလာန်ညးဒေသတံရ။
ပ္ဍဲဒေသတေန်ဂါန်ညဳနံၚ်ဂှ် ဟိုတ်နူပေါဲဗ္တိုက်သ္ကာတ်မြဟ်ကၠုၚ်မာန်ဂှ်ရ နကဵုညးဍုၚ်ကွာန်ဒေသ ကွာန်ညဳနံၚ်၊ ကွာန်တၟိ၊ ဍုၚ်တၟိ၊ မေဝ်ကနေဝ်တံ သွက်ဂွံပါဲဒဴလေတ်အိုတ်ဂှ် ညးဍုၚ်ကွာန်ဒေသရေၚ်သ္ကအ် ကဵုဒၟံၚ်သတိတံ နွံဒၟံၚ်တုဲ ဟိုတ်နူပေါဲဗ္တိုက်တုဲ ညးဍုၚ်ကွာန်ဒေသဗွဲမဂၠိုၚ်ဂၠေၚ်လေဝ် ဒးဂြိပ်ဒဴပါဲဒလေတ် လ္တူဍုၚ်ဗြဝတဳတံရ။
အပ္ဍဲပေါဲဗ္တိုက်တေန်ဂါန်ညဳနံၚ်ဂှ် ဒပ်ပံၚ်ကောံ KNLA တံ ဗ္တိုက်သီဂွံလဝ် တမ်ဒပ် ခမရ ၃၅၅ ကံၚ်ဇြဳပၞာန်ဂှ်တုဲ ဆက်ထ္ပက်ဒၟံၚ်ပၞာန် ဗ္တိုက်ဒၟံၚ် တမ်ဒပ် ခမရ ၃၅၆ ဗ္ဒါဲဗ္ဒါဲဂှ်ရောၚ် ပရိုၚ်တမ်ရိုဟ်ပရေၚ်ပၞာန်တံ ဟီုဂးဒၟံၚ်ကီုလေဝ် ပြဟ်ဟ်ဏံ ဒပ်ၜါလ္ပာ်တံ လလောၚ်ပ္တိတ်လဝ်ပရိုၚ်ဂှ် ဟွံဂွံဆဵုကေတ်ဏီရ။
အပ္ဍဲပေါဲဗ္တိုက်ဂှ် လ္ပာ်ဒပ်ကံၚ်ဇြဳပၞာန် ဇီုကပိုက်ချိုတ်အာလဝ် ဗွဲမဂၠိုၚ်ဂၠေၚ်တုဲ လ္ပာ်ဒပ်ပံၚ်ကောံ KNLA တံလေဝ် ဇီုကပိုက်ချိုတ်ဒၟံၚ်တံ နွံဒၟံၚ်ဂှ် ဂွံတီကေတ် နူကဵုပရိုၚ်တမ်ရိုဟ်ပရေၚ်ပၞာန်တံရ။
ဒေသတေန်ဂါန်ညဳနံၚ် ပေါဲဗ္တိုက်က္တဵုဒှ်လဝ် ဗွဲမသ္ကာတ်မြဟ်ဂှ်ဝွံ နွံဒၟံၚ် လ္တူဂၠံၚ်ဇၞော်အာယှ ဗြဝတဳ−ကအ်ကြိက် ဂၠံၚ်တရဴသွံရာန်ဗၞိက်တံကဵု တၞုၚ်ဂၠံၚ်ကာ ထိုအ်ဂဝ်ကိုဝ်−ကျဝ်ခိုဝ်−တေန်ဂါန်ညဳနံၚ်တံတုဲ သီုကဵုဒှ်ဒေသ ပၟိက်ဇၞော် သွက်ပရေၚ်သွံရာန်ဗၞိက်ပယျဵုမွဲရ။
ပရိုၚ်−သြၚ်လောန်တိုၚ်(မ်)
ဗီု−KNLA