မတ်မလီု၊ မာတ် ၉
အတိုၚ်သၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် ပၠောပ်လဝ်လမျီုဂှ်မ္ဂး ကဵုအာတန်ဗ္တောန်ကွတ်ပၞာန် သၟတ်အပ္ဍဲတွဵုရးဍုၚ်မန်တံ ပ္ဍဲ ၄ ပွိုၚ်ဍုၚ်မာန်ဂှ် ဂွံတီကေတ် အတိုၚ်ဂလာန် ဗွိုၚ်ဒပ်ပၞာန်တံရ။
ကံၚ်ဇြဳပၞာန် မကျဗြံဒၟံၚ်ဂှ်ဝွံ စၞောန်ပျးသၞောဝ်ယိုက်ဂၠေၚ်လျိုၚ်ပၞာန်တုဲ ကၠာဂွိုအ်ပေၚ်မွဲဂိတုဏီ သွက်ဂွံကော်ကောန်ဍုၚ်အာယုက်ပေၚ်တုဲတံ ဂွံယိုက်ဂၠေၚ်လျိုၚ်ပၞာန် ဗွဲမပြဟ်ဂှ် ပ္တိတ်ကၠုၚ်ဇြဟတ်ရ။
သွက်ဂွံကော်ပကောန်ပၞာန် ဗွဲမပြဟ်ဂှ် ချူခၞံလဝ် နဲဥပဒေတံကဵု လၟေၚ်ကမၠောန်တံတုဲယျတုဲ ဖန်ဇန်လဝ်ဘာတန်ဗ္တောန်တံ တုဲယျဂှ် အပ္ဍဲကောံဓရီု မကၠောန်ဗဒှ်လဝ် ပ္ဍဲဂိတုမာတ် ၄ ဂှ် သ္ကိုပ်ဗိုလ်ဇၞော် ဝန်ဇၞော်ကာစဵုဒၞါကံၚ်ဇြဳပၞာန် တေန်အံၚ်သာန် ဟီုဂးလဝ်ရ။
ကံၚ်ဇြဳပၞာန်တံ ဖန်ဇန်လဝ် ဘာတန်ဗ္တောန်ဂှ်တှ်ေ သွက်ဂွံကဵုအာတန်ဗ္တောန် ပ္ဍဲပွိုၚ်ဍုၚ်ဇြပ်ဗု၊ မတ်မလီု၊ သဓီု ကေုာံ ၜါသွာၚ်တံဂှ် နွံဒၟံၚ်ရ။
ပ္ဍဲကဵုဏံ ပွိုၚ်ဍုၚ်ဇြပ်ဗုဂှ် ဘာတန်ဗ္တောန်ပ္ကတ်ပ္ကေၚ်ကဆံၚ်သၠုၚ်၊ ပွိုၚ်ဍုၚ်သဓီုဂှ် ဘာတန်ဗ္တောန်ပ္ကတ်ပ္ကေၚ်ကွတ်ပၞာန်သ္ဇိုၚ်၊ ပွိုၚ်ဍုၚ်မတ်မလီုဂှ် ဘာတန်ဗ္တောန်ပရေၚ်ပညာ စၟတ် (၆) ကေုာံ ပွိုၚ်ဍုၚ်ၜါသွာၚ်ဂှ် ဘာတန်ဗ္တောန်ပရေၚ်စန်ဒက်သ္ဂောံလုပ်ပေါဲဗ္တိုက် စၟတ် (၆) တံ နွံဒၟံၚ်ရ။
ကောန်သ္ဂံၚ်တြေံမွဲတၠဂှ် ပ္ဍဲကဵုဘာတန်ဗ္တောန် ပွိုၚ်ဍုၚ်သဓီုတံကဵု ပွိုၚ်ဍုၚ်ဇြပ်ဗုတံဂှ်ဟေၚ် ကဵုတန်ဗ္တောန်ကွတ်ပၞာန်မာန်တုဲ မၞိဟ်ဂၠိုၚ်မ္ဂး ပ္ဍဲကဵုဘာတန်ဗ္တောန် ပွိုၚ်ဍုၚ်မတ်မလီုတံကဵု ပွိုၚ်ဍုၚ်ၜါသွာၚ်တံဂှ်လေဝ် ကဵုတန်ဗ္တောန် ဂွံယိုက်ဂၠေၚ်လျိုၚ်ပၞာန်ဂှ်မာန်ရောၚ် ဟီုရ။
“ကဵုတန်ဗ္တောန် မၞိဟ်တၟိတၟိတံဂှ်တှ်ေ ပ္ဍဲဝါကလိကဵု ဘာတန်ဗ္တောန်ပ္ကတ်ပ္ကေၚ်ကွတ်ပၞာန်သ္ဇိုၚ် စခမ (၉) တံရဏောၚ်။ ပ္ဍဲကဵုၜါဒၞါဲဏံဂှ်တှ်ေ ကဵုဒၟံၚ်လၟိုန်။ ဆ္ဂး မၞိဟ်ဂၠိုၚ်မ္ဂး ပ္ဍဲမတ်မလီု ဘာပရေၚ်ပညာ စၟတ် (၆) ကဵု ပ္ဍဲၜါသွာၚ် ဘာတန်ဗ္တောန်ပရေၚ်စန်ဒက် ဂွံလုပ်ပေါဲဗ္တိုက် စၟတ် (၆) တံ ၜါဒၞါဲဏံ ထပ်ကဵုမာန်ဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် ကံၚ်ဇြဳပၞာန်ဝွံ သွက်ဂွံကဵုတန်ဗ္တောန် ကုညးသၟတ်တံဂှ် ပလေဝ်ပလေတ်လဝ် ဘာတန်ဗ္တောန်တံ တုဲဒှ်အိုတ်ဂှ်ရ အပ္ဍဲဂိတုဨပရဴကၠုၚ်စိုပ်ဏံ ဂွံကော်တန်ဗ္တောန်ကွတ်ပၞာန်ဂှ် ချိုတ်ပၠိုတ်ဒၟံၚ်ယျဂှ် ညးဆက်ဟီုရ။
ဗိုလ်ဇၞော် CDM လေန်ထက်အံၚ်ဂှ် ကၠောန်ၜိုတ်ဒၟံၚ် ညံၚ်ညးဍုၚ်ကွာန်တံ ဂွံလုပ်ပၞာန် အိုတ်ဍာ်ဂှ်ဝွံ ဟိုတ်နူဗီုပြၚ်ဒက်ပ္တန်ဒပ်ပၞာန် လီုလာ်အာတၟာဂလိုၚ် မဒှ်တုဲ ကဵုတန်ဗ္တောန်ကွတ်ပၞာန် ကုညးဍုၚ်ကွာန်တံ အခိၚ်ဍန်န်တုဲ ကဵုဗ္တိုက်ပၞာန်ဏောၚ်ဂှ် သ္ၚဳဂၠိပ်လဝ်ရ။
“အဓိကဂှ်တှ်ေ ပ္ဍဲကဵုဒပ်ပၞာန်ဂှ် ဇြဟတ်ပရေၚ်ပၞာန်ဍိုန်ဒၟံၚ်ဏောၚ်။ တုဲပၠန် ဇြဟတ်ဒပ်ပၞာန်ဂှ်ဝွံ ပကောံပ္ကေဝ်ဟွံဂွံဟဂှ်ရ။ တုဲပၠန် ဗီုပြၚ်ဒက်ပ္တန်ဒပ်ဂှ်လေဝ် လီုအာဒၟံၚ်ကွေံကွေံယျဂှ် ပိုယ်မိက်ဂွံဟီုရ။ အေ ဂှ်တှ်ေ ဍေံတံ ရပ်စပ်စကာ သၞောဝ်ယိုက်ဂၠေၚ်လျိုၚ်ပၞာန်ဏံဂှ်တှ်ေ အဓိကဂှ် မိက်ဂွံစကာ ဇြဟတ်ပရေၚ်ဗ္တိုက် ဍေံတံနွံပၟိက်ဒၟံၚ်တံဂှ်တုဲ ရပ်စပ်သၞောဝ်ယိုက်ဂၠေၚ်လျိုၚ်ပၞာန်ဂှ် ဟီုဂွံချိုတ်ပၠိုတ်ရ။ ကဵုတန်ဗ္တောန်ကွတ်ပၞာန်တံ ၜိုတ်မွဲၜါဂိတုဏောၚ်။ တုဲတှ်ေ ဗလးဏာမုက်ပၞာန်တေံတုဲ ကဵုဗ္တိုက်ဏောၚ်” သာ်ဝွံ သ္ဂးရ။
လ္ဂောံကဵုသၞောဝ်ယိုက်ဂၠေၚ်လျိုၚ်ပၞာန်ဂှ်မ္ဂး ဇၟာပ်ကောန်ဍုၚ်အာယုက်ပေၚ်တုဲ အောန်အိုတ် နူ ၂သၞာံ စဵုကဵု ၅ သၞာံ ဒးယိုက်ဂၠေၚ်လျိုၚ်ပၞာန်ဏောၚ်တုဲ ယဝ်ရဟွံလုပ်ယိုက်ဂၠေၚ်လျိုၚ်မ္ဂး ဖျေံစၟတ်အာ ဒဏ်ထံၚ်သၠုၚ်အိုတ် စဵုကဵု ၅ သၞာံမာန်ဂှ် စၞောန်ပျးလဝ်ရ။
အတိုၚ်ဂလာန်ကံၚ်ဇြဳပၞာန်တံ ဟီုလဝ်ဂှ်မ္ဂး ပ္ဍဲတွဵုရးဍုၚ်မန် ဒးယိုက်ဂၠေၚ်လျိုၚ်ပၞာန်ဂှ် မွဲမွဲလၟေၚ် အောန်အိုတ် ဗ္ဒါဲ ၅၀၀ ကော်အာမာန်ဂှ် ဂွံတီကေတ်ရ။
ကံၚ်ဇြဳပၞာန်ဂှ် လၟေၚ် (၁) သၞောဝ်ယိုက်ဂၠေၚ်လျိုၚ်ပၞာန်ဂှ် အတးလောန်မ္ဂး စအာဏောၚ်တုဲ မွဲမွဲလၟေၚ် နကဵုလၟိဟ်မၞိဟ် ၅၀၀၀၊ မွဲသၞာံ မၞိဟ် ၆၀၀၀၀၀ ကော်အာဏောၚ်ဂှ် ထ္မံက်ပ္တိတ်ဟီုဂးကၠုၚ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−ထလဳဂရာမ် တြးဝါဒကံၚ်ဇြဳပၞာန်