ဗြဝတဳ၊ မာတ် ၁၀
ဇြဟတ်ပၠန်ဂတး KNLA တံ ဗ္တိုက်သီဂွံလဝ် ဗ္ဒိုပ်ဗၠာဲသၟိၚ် ကေုာံ တမ်ဒပ်ကံၚ်ဇြဳပၞာန် ခမရ ၃၅၅ အပ္ဍဲပေါဲဗ္တိုက်တေန်ဂါန်ညဳနံၚ်ဂှ်တုဲ သီဂွံလဝ် လွဟ်လက်နက်မကမ် ဗွဲမဂၠိုၚ်ဂၠေၚ်ဂှ် ဂွံတီကေတ် အတိုၚ်ဂလာန်ပရိုၚ်တမ်ရိုဟ်ဗလးတိတံရ။
စနူဂိတုမာတ် ၇ တုဲကၠုၚ်တေံတုဲ ဒပ်ကံၚ်ဇြဳပၞာန် ခမရ ၃၅၅ ဖျေံသ္ဇိုၚ်တေန်ဂါန်ညဳနံၚ် ပွိုၚ်ဍုၚ်ဗြဝတဳ တွဵုရးကရေၚ်ဂှ် ဂကောံဇြဟတ်ပၠန်ဂတး ဒပ်ပၞာန်ဗၠးၜးကောန်ဂကူကရေၚ်တံ စလုပ်ဗ္တိုက်လဝ်တုဲ ပေါဲဗ္တိုက်ၜါလ္ပာ် က္တဵုဒှ်လဝ် ဗွဲမသ္ကာတ်မြဟ်ရ။
ပေါဲဗ္တိုက်တေန်ဂါန်ညဳနံၚ် စဒှ် နူဂိတုမာတ် ၇ စဵုကဵု ဂိတုမာတ် ၉ အပ္ဍဲပေါဲဗ္တိုက်ပွိုၚ်ပိတ္ၚဲဂှ် လ္ပာ်ကံၚ်ဇြဳပၞာန် ရပ်စပ်စကာ လွဟ်ဇၞော် ကေုာံ ပၞာန်ကျာအရီုဗၚ်တံတုဲ ညံၚ်ကုန်ဗ္ဒိုပ်ဗျူဟာ တမ်ဒပ် ဂွိုအ်စှ်ေအာဂှ် ဗ္တိုက်ဒၟံၚ်ဟွံဇူဟွံယီုကီုလေဝ် ပြဟ်ဟ်ဏံ ဂကောံဒပ်ပံၚ်ကောံ KNLA တံ သီဂွံလဝ် ဗ္ဒိုပ်ဗၠာဲသၟိၚ်တေန်ဂါန်ညဳနံၚ် ကေုာံ တမ်ဒပ် ခမရ ၃၅၅ ရ။
အပ္ဍဲပေါဲဗ္တိုက်ဂှ် ကောန်ဒပ်ကံၚ်ဇြဳပၞာန်တံသီုဖအိုတ် ထောံလသာဗ္ဒိုပ် ဂြိပ်ဒဴအာလဝ်တုဲ လွဟ်လက်နက်မကမ်တံဂှ်လေဝ် သီဂွံလဝ် လၟိဟ်ဗွဲမဂၠိုၚ်ဂၠေၚ်ဂှ် ကောန်သ္ဂံၚ်ပၠန်ဂတး ပ္ဍဲဗလးတိတံ ဟီုရ။
ပ္ဍဲဂိတုမာတ် ၉ တေံဂှ်လေဝ် ဒပ်ပံၚ်ကောံ KNLA တံ ဆက်ဗ္တိုက်ဒၟံၚ် ကုန်ဗျူဟာကံၚ်ဇြဳပၞာန် ဖျေံသ္ဇိုၚ်တေန်ဂါန်ညဳနံၚ်ဂှ်တုဲ ပေါဲဗ္တိုက်ၜါလ္ပာ် က္တဵုဒှ်ဒၟံၚ် ဗွဲမသ္ကာတ်မြဟ်တုဲ လ္ပာ်ဒပ်ကံၚ်ဇြဳပၞာန်ဂှ်လေဝ် ပန်ပှော်ဒၟံၚ်နကဵုလွဟ်ဇၞော် ကေုာံ ထောံမခတိုဟ်နကဵုက္ၜၚ်ကျာတံဂှ် ကၠောန်ၜိုတ်ဒၟံၚ်အဆက်က်ရောၚ် ဂွံတီကေတ်ရ။
အပ္ဍဲပေါဲဗ္တိုက်တေန်ဂါန်ညဳနံၚ်ဂှ် ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော် ကေုာံ ဗ္တိုက်ဂြာတ်ဗုမ်နကဵုက္ၜၚ်ကျာတံဂှ်တုဲ ညးဍုၚ်ကွာန်ဒေသ ၄ တၠ ချိုတ်အာလဝ်တုဲ ၁၀ တၠပြၚ် ဇီုကပိုက်ကလိဂွံလဝ်ဝပ်တုဲ သ္ၚိဒၟံၚ်ဗွဲမဂၠိုၚ်ဂၠေၚ် ပၟတ်တူလီုလာ်အာတုဲ ညးဍုၚ်ကွာန်ဗွဲမဂၠိုၚ်လေဝ် ဒးဂြိပ်ပါဲဒလေတ်အာ လ္ပာ်လ္တူဍုၚ်ဗြဝတဳ ဇူဒီုဒၟံၚ်ရ။
ပ္ဍဲဒေသတေန်ဂါန်ညဳနံၚ်ဂှ် တမ်ဒပ်သၟဝ်တဲ စကခ ၁၂ ဌာန်ဂအုပ်ကောပ်ကာဲပရေၚ်ပၞာန် မပ္တံကဵု တမ်ဒပ်ခမရ ၃၅၅၊ ခမရ ၃၅၆၊ ခမရ ၃၅၇ ကေုာံ ဗျူဟာတေန်ဂါန်ညဳနံၚ်တံ နွံတုဲ လ္ဂောံကဵုပရေၚ်ပၞာန်လေဝ် လတေၚ်ဆီ ဍုၚ်ဗြဝတဳ ဍုၚ်ပယျဵုမွဲလေဝ် ဒှ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media