အပ္ဍဲပေါဲဗ္တိုက်တေန်ဂါန်ညဳနံၚ် ကောန်အရာပ်ဒးပြဟ်လလုဲ သၠုၚ်တိုန်ကၠုၚ်

ဗြဝတဳ၊ မာတ် ၁၆

ပ္ဍဲဒေသတေန်ဂါန်ညဳနံၚ် ပွိုၚ်ဍုၚ်ဗြဝတဳ တွဵုရးကရေၚ်ဂှ် အပ္ဍဲပေါဲဗ္တိုက်ၜါလ္ပာ် က္တဵုဒှ်ဒၟံၚ် ဗွဲမသ္ကာတ်မြဟ်ဂှ် ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော် ကေုာံ တရဴကျာတံဂှ်တုဲ ကောန်အရာပ်ဇီုကပိုက်ချိုတ်တံ သာဂၠိုၚ်ကၠုၚ်ဂှ် ညးဒေသတံ ဟီုရ။

ပ္ဍဲဂိတုမာတ် ၁၄ ဇိုၚ်သဝ်တ္ၚဲဂှ် လ္ပာ်ကွာန်ဝှေ့ရှမ်း ဗ္ဒါဲဒပ်ကံၚ်ဇြဳပၞာန် ခမရ ၃၅၇ ဖျေံသ္ဇိုၚ်တေန်ဂါန်ညဳနံၚ်ဂှ် ဒပ်ကံၚ်ဇြဳပၞာန်ကဵု ဒပ်ပံၚ်ကောံပၠန်ဂတး KNLA တံ က္တဵုဒှ်လဝ်ပေါဲဗ္တိုက်ဗွဲမသ္ကာတ်မြဟ်တုဲ လ္ပာ်ဒပ်ကံၚ်ဇြဳပၞာန် သုၚ်စောဲလွဟ်ဇၞော် ကေုာံ က္ၜၚ်ကျာရီုတံတုဲ ဗ္တိုက်ဒၟံၚ်ရ။

ပ္ဍဲဂိတုမာတ် ၁၅ ဂှ်လေဝ် ပ္ဍဲကွာန်ဝှေ့ရှမ်း ပေါဲဗ္တိုက်ၜါလ္ပာ်တံ ဆက်သ္ကာတ်မြဟ်ဒၟံၚ်တုဲ အပ္ဍဲပေါဲဗ္တိုက်ဂှ် ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော် ကေုာံ က္ၜၚ်ကျာတံတုဲ လွဟ်ဇၞော်ဒတုံဗ္တိုဟ်ထ္ကးအာလဝ် လ္တူသ္ၚိဒၟံၚ်မွဲမတုဲ ကောန်အရာပ် ၂ တၠ ချိုတ်တုဲ ၂ တၠ ကလိဂွံလဝ်ဝပ်ဂှ် ဂွံတီကေတ် ဇရေၚ်ညးဒေသတံရ။

ဒပ်ပံၚ်ကောံပၠန်ဂတး KNLA တံ ဆက်ထ္ပက်ဒၟံၚ်ပၞာန်ဗ္တိုက်ဒၟံၚ် တမ်ဒပ်ကံၚ်ဇြဳပၞာန် ခမရ ၃၅၇ ဖျေံသ္ဇိုၚ်တေန်ဂါန်ညဳနံၚ် ကေုာံ ဗျူဟာတံဂှ်တုဲ ပေါဲဗ္တိုက်ၜါလ္ပာ် က္တဵုဒှ်လဝ် ဗွဲမသ္ကာတ်မြဟ်ရောၚ် ညးဒေသတံ သ္ဂးရ။

အခိၚ်ပေါဲဗ္တိုက်တေန်ဂါန်ညဳနံၚ် လအ်ကၠုၚ်ပွိုၚ်မွဲသတ္တာဟဂှ် ဒပ်ပံၚ်ကောံပၠန်ဂတး KNLA တံ ဗ္တိုက်သီဂွံလဝ် ဗ္ဒိုပ်ဖလူ ဗ္ဒါဲပယျဵုသေံ−ဗၟာ ကေုာံ ဗ္ဒိုပ်ဗၠာဲသၟိၚ်တိဍာ်၊ ဗ္ဒိုပ်ဒပ်ကံၚ်ဇြဳပၞာန် ခမရ ၃၅၅ တံဂှ်တုဲ အပ္ဍဲပေါဲဗ္တိုက်ဂှ် လ္ပာ်ဒပ်ကံၚ်ဇြဳပၞာန်လေဝ် ကလေၚ်တဝ်စၞေဟ်ဒၟံၚ် ဗွဲမသ္ကာတ်မြဟ်ဂှ် ဂွံတီကေတ်ရ။

ညံၚ်တေန်ဂါန်ညဳနံၚ် ဂွိုအ်စှ်ေအာဂှ် ဟိုတ်နူဒပ်ကံၚ်ဇြဳပၞာန် ဒုၚ်တဝ်စၞေဟ်ဒၟံၚ် ဗွဲမသ္ကာတ်မြဟ်တုဲ ကောန်အရာပ် ၁၀ တၠ ချိုတ်တုဲ ဗွဲမဂၠိုၚ် ကလိဂွံလဝ်ဝပ်တုဲ ညးဍုၚ်ကွာန်ဒေသဂၠိုၚ်ကဵုလ္ၚီ ဒးဂြိပ်ဒဴပါဲဒလေတ်ဒၟံၚ်ဒၞါဲဗၠးဘဲတံ ပါလုပ်သီုကဵုဍုၚ်ဗြဝတဳရ။

ပရိုၚ်−သြၚ်လောန်တိုၚ်(မ်)

ဗီု−U Zaya Megga