ကျာ်ဍုၚ်၊ မာတ် ၁၆
အပ္ဍဲပေါဲဗ္တိုက်သီကုန်ဗ္ဒိုပ်ဗျူဟာဒပ်ကံၚ်ဇြဳပၞာန် ဍုၚ်ကျာ်ဍုၚ် ပွိုၚ်ဍုၚ်လှာဒကှ် တွဵုရးကရေၚ်ဂှ် ပါလုပ်သီုကဵုသ္ကိုပ်ဗျူဟာဂှ် ၆၀ တၠပြၚ် ဖျေံလွဟ်ဒုၚ်ကျလဝ်တုဲ ဂကောံဇြဟတ်ပၠန်ဂတး KNLA တံ သီဂွံလဝ် လွဟ်လက်နက်မကမ်ဗွဲမဂၠိုၚ်ဂၠေၚ်ဂှ်လေဝ် ဂွံတီကေတ် နူကဵုတမ်ရိုဟ်ပရိုၚ်အပ္ဍဲဒေသတံရ။
ကုန်ဗ္ဒိုပ်ဗျူဟာကျာ်ဍုၚ် ဒပ်ကံၚ်ဇြဳပၞာန် မၞုံအပ္ဍဲတိဍာ်ဒပ်မဟာ ၆ KNU ဂှ် စနူဂိတုဂျာန္နဝါရဳ ၂၇ တုဲကၠုၚ်တေံတုဲ ဂကောံဇြဟတ်ပၠန်ဂတး KNLA တံ စဗ္တိုက်လဝ်တုဲ ပေါဲဗ္တိုက်ပရေၚ်ပၞာန်ၜါလ္ပာ် က္တဵုဒှ်လဝ် ပွိုၚ် ၁ ဂိတုပြၚ်တုဲ အပ္ဍဲပေါဲဗ္တိုက်ဂှ် ဒပ်ကံၚ်ဇြဳပၞာန် ရပ်စပ်စကာလွဟ်ဇၞော် ကေုာံ အရီုဗၚ်ပၞာန်ကျာတံတုဲ ဗ္တိုက်ဒၟံၚ်ဗွဲမသ္ကာတ်မြဟ်ရ။
ဗ္ဒိုပ်ဗျူဟာ ဒပ်ကံၚ်ဇြဳပၞာန် ဍုၚ်ကျာ်ဍုၚ်ဂှ် ဂကောံဇြဟတ်ပၠန်ဂတး KNLA တံ ဘိုၚ်ကၟာတ်လဒဵု ဗ္တိုက်လဝ်တုဲ နူကဵုဗလးတိဏံ ဟိုတ်နူကၠုၚ်စိုပ်ပလံၚ်ဗစိုပ်ကဵု ဇွောံမ ကေုာံ ပၞာန်ရီု ဇရေၚ်ဒပ်ကံၚ်ဇြဳပၞာန် မၞုံဒၟံၚ်ပ္ဍဲဗျူဟာတံ ဟွံဂွံတုဲ ဒပ်ကံၚ်ဇြဳပၞာန်တံ မ္ဒးကၠုၚ်စိုပ်ပလံၚ်လဝ် ဇွောံမ နကဵုက္ၜၚ်ကျာရ။
ဗ္ဒိုပ်ဗျူဟာ ဒပ်ကံၚ်ဇြဳပၞာန် ဖျေံသ္ဇိုၚ်ကျာ်ဍုၚ် နူကဵုဇြဟတ်ပၠန်ဂတး KNLA တံ ဘိုၚ်ကၟာတ်လဒဵုလဝ်ဂှ် ပ္ဍဲဂိတုမာတ် ၁၃ အခိၚ်နူဂယး ၆ နာဍဳ စဗ္တိုက်လဝ်တုဲ နကဵုကောန်ဒပ်ကံၚ်ဇြဳပၞာန် မၞုံအပ္ဍဲဗျူဟာတံ ဖျေံလွဟ်ဒုၚ်ကျတုဲ သ္ဂောံကၠုၚ်ပံၚ်တောဲရေၚ်တၠုၚ်ဂှ်လေဝ် ဂကောံဒပ်ပံၚ်ကောံပၠန်ဂတး KNLA တံ ကော်ဘိက်လဝ်ဂှ် ပရိုၚ်တမ်ရိုဟ်မွဲတၠ သ္ဂးရ။
အခိၚ်ဗ္တိုက်ဒၟံၚ်ဏံ ပ္ဍဲဂိတုမာတ် ၁၄ အခိၚ်ဇိုၚ်သဝ်တ္ၚဲဂှ် လ္ပာ်ဒပ်ကံၚ်ဇြဳပၞာန် ပါလုပ်သီုကဵုသ္ကိုပ်ဗျူဟာဂှ် ၆၀ တၠပြၚ် ဖျေံလွဟ်ဒုၚ်ကျတုဲ သီဂွံလဝ် သီုကဵုလွဟ်ဇၞော် ၁၂၀ မမဂှ် လွဟ်လက်နက်မကမ်ဗွဲမဂၠိုၚ်ရောၚ် ဂွံတီကေတ်ရ။
ကြဴနူပေါဲဗ္တိုက်သီဗ္ဒိုပ်ဗျူဟာပၞာန်ကျာ်ဍုၚ်တုဲ ဒပ်ကံၚ်ဇြဳပၞာန် ဗ္တိုက်ဂြာတ်လဝ်မခတိုဟ် ကုန်ဗျူဟာပၞာန် နကဵုက္ၜၚ်ကျာဂျက်ဖိုက်တာ ဗ္ဒါဲ ၁၀ ဝါဂှ် တမ်ရိုဟ်ပရိုၚ်တံ ဟီုရ။
ဟိုတ်နူပေါဲဗ္တိုက် က္တဵုဒှ်လဝ် ပ္ဍဲဍုၚ်ကျာ်ဍုၚ် ပွိုၚ် ၁ ဂိတုဂှ်တုဲ ညးဍုၚ်ကွာန်ဒေသဗွဲမဂၠိုၚ်ဝွံ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရ။
ဍုၚ်ကျာ်ဍုၚ်ဝွံ ဒှ်ဍုၚ်ပ္ဍဲပွိုၚ်ဍုၚ်လှာဒကှ်မွဲတုဲ လ္ပာ်ဗျူဟာပၞာန်လေဝ် ဒှ်ဍုၚ်ပၟိက်ဇၞော်မွဲဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media