ကျာ်မြဟ်၊ မာတ် ၁၆
ဗော်ဍုၚ်မန်တၟိ AD ဗ္တိုက်သရိုဟ်အာ ဒပ်ပၞာန်သီအဝဵုဏောၚ် လလောၚ်တြးတုဲ ပေၚ်မွဲဂိတုဂှ် ဗ္တိုက်လဝ် ဒပ်ကံၚ်ဇြဳပၞာန် အပ္ဍဲပွိုၚ်ဍုၚ်မုဟ်ဍုၚ်ကဵု ပွိုၚ်ဍုၚ်ကျာ်မြဟ်တံ ၜါဒၞါဲဂှ် ဗော် လလောၚ်ပ္တိတ်ကဵုလဝ်သမ္တီရ။
ဗော်ဍုၚ်မန်တၟိ (ဗ္တိုက်သရိုဟ်တၠအဝဵုပၞာန်) NMSP-AD ဂှ်ဝွံ ပ္ဍဲဂိတုမာတ် ၁၄ အခိၚ်နူဂယး ၜိုတ် ၁၀ နာဍဳဝိုက် လုပ်စိုပ်ပန်ပှော်ဗ္တိုက်လဝ် ကောန်ဂကောံဒပ်ကံၚ်ဇြဳပၞာန် ဖျေံသ္ဇိုၚ် ပ္ဍဲကွာန်ဂူၜဴ ပွိုၚ်ဍုၚ်ကျာ်မြဟ်ဂှ်ရ။
ပ္ဍဲကဵုလၟေၚ်ဒဒှ်ကျာ်မြဟ်ဂှ် လုပ်စိုပ်ဗ္တိုက်လဝ် ဗ္ဒိုပ်ကံၚ်ဇြဳပၞာန် ဇြဟတ်အကြာ ၁၅ ကဵု ၂၀ ဂှ် နာဲဗညာမန် ညးမၞုံအခေါၚ်ဟီုဂး ဗော်ဍုၚ်မန်တၟိ AD ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပ္ဍဲကျာ်မြဟ်ဂှ်တှ်ေ ပိုယ်တံ လုပ်ပန်လဝ်ဗ္ဒိုပ် ဇြဟတ်သၞ အကြာ ၁၅ ကဵု ၂၀ ဖျေံလဝ်သ္ဇိုၚ် ဗ္ဒါဲဂူၜဴ ဗ္ဒါဲ(ကြာအင်းကွေ့ချောင်း) ဂှ်ရ။ အခိၚ်လ္ပာ်သၞတံ ကလေၚ်ပန်ကဵုလွဟ်ဇၞော်ဂှ် အာဒးလဝ် ရုၚ် MUP ပ္ဍဲတၟအ်ဗြဴတေံတုဲ လီုလာ်အာလဝ်ဂှ် ပိုယ်တံ ဂွံလဝ်ပရိုၚ်ရ” သာ်ဝွံသ္ဂးရ။
သ္အာၚ်နူဂှ်ပၠန် ပ္ဍဲကဵုတ္ၚဲဂှ် အခိၚ်ဇိုၚ်သဝ်တ္ၚဲ ၆ နာဍဳဂှ်လေဝ် ဗော်ဍုၚ်မန်တၟိ AD လုပ်ကြတ်ဗ္တိုက်လဝ် ရေၚ်ယာန်ကောန်ဒပ်ဗၠာဲသၟိၚ် ကံၚ်ဇြဳပၞာန် အကြာကွာန်ယာန်ဒံၚ် ကဵု ကွာန်လှာ လ္တူဂၠံၚ်ကွဳစက်ဇၞော် ရေဝ်−မတ်မလီု ပွိုၚ်ဍုၚ်မုဟ်ဍုၚ်ဂှ်ရ။
နာဲဗညာမန်ဂှ် “နူဏေံတေံ ၜိုတ် ၆ နာဍဳ ဒပ်ပိုယ်တံ ဗ္တိုဟ်မာၚ်ဗ္တိုက်လဝ် ကွဳစက်သ္ကိုပ်ဗၠာဲသၟိၚ် ၜါဖ္ဍိုက် စဴကၠုၚ်နူကွာန်လှာဂှ်ရ။ စပ်ကဵုပရေၚ်ပန်ပှော်ဏံတုဲ ဗၠာဲသၟိၚ်တံ ဂြိပ်အာအိုတ်တုဲ ပိုယ်တံ သီဂွံလွဟ် MA1 မွဲဇကိုအ် ကဵု ကွဳစက်ၜါဖ္ဍိုက်ရ။ ကွဳစက်ၜါဖ္ဍိုက်ဂှ် ဒပ်ပိုယ်တံ စံၚ်ပလီုထောံလဝ်ရ။ သီဂွံလဝ် MA1 ကဵု ကပေါတ်အရပ်စပ်ပၞာန်တၞဟ်ဟ်တံရ” သာ်ဝွံ သ္ဂးရ။
စပ်ကဵုလၟေၚ်ဒဒှ်ပရေၚ်ဗ္တိုက် ဗော်ဍုၚ်မန်တၟိ AD ဍုၚ်မုဟ်ဍုၚ် ကေုာံ ကျာ်မြဟ်တံဂှ်တုဲ လ္ပာ်ဒပ်ကံၚ်ဇြဳပၞာန်တံ ဇီုကပိုက်ကလိဂွံဝပ်ဂှ် ဆက်ဂၠိုက်ဂၠါဲဒၟံၚ်ဖိုဟ်ရောၚ် နာဲဗညာမန် ဟီုရ။
ပ္ဍဲကဵုထလဳဂရာမ်ချာန်နေဝ်တြးဝါဒတံဂှ် ဂကောံသ္ကိုပ်ဗၠာဲသၟိၚ်ကၟာဝက်၊ ပွိုၚ်ဍုၚ်မုဟ်ဍုၚ် အခိၚ်စဴနူဇြပ်ဗု စိုပ်အကြာကွာန်လှာကဵု ကွာန်ယာန်ဒံၚ်ဂှ် ဒပ်မန်ပါ်တိတ်တံ ဗ္တိုဟ်မာၚ်ကြတ်ဗ္တိုက်လဝ်ဂှ် ထ္မံက်ထ္ၜးလဝ်ရ။
ကြဴနူဂှ်တုဲ ပၞာန်ရီုနူကဵုဒပ်ဍုၚ်ဇြပ်ဗုတံ ဗက်ကၠုၚ်တုဲ ဟိုတ်နူလ္ပာ်ဗော်ဍုၚ်မန်တၟိ AD တံ ဗိုၚ်ဗ္တိုက်လဝ်တုဲ ကောန်ဒပ်ကံၚ်ဇြဳပၞာန်တံ ဒးဂြိပ်တုဲ စံၚ်ပလီုလဝ်ကွဳစက်တံဂှ် မဒှ်ရ။
ဗော်ဍုၚ်မန်တၟိ AD ဝွံ ပ္ဍဲဂိတုဖေဖဝ်ဝါရဳ ၁၄ တေံ ပံၚ်တောဲကဵု ဂကောံပၠန်ဂတးကောန်ဍုၚ်အရၚ် လုပ်ဒၟံၚ်ပေါဲဗ္တိုက်ဒစဵုဒစးဒၟံၚ် ကံၚ်ဇြဳပၞာန််တံ၊ ဇြဟတ်ပၠန်ဂတးက္ညၚ်တံဂှ်တုဲ ဗ္တိုက်သရိုဟ်အာ ဒပ်ပၞာန်သီအဝဵုဏောၚ်ဂှ် လလောၚ်တြးလဝ်ရ။
ပ္ဍဲဂိတုမာတ်မံက်တေံ ရပ်ဒက်က္ဍိုပ်သ္ကိုပ်ပၞာန်ပျဳတုသေတ်ပိတၠ သၟဝ်တဲကံၚ်ဇြဳပၞာန် နူကဵုကွာန် ပွိုၚ်ဍုၚ်မုဟ်ဍုၚ်တံဂှ်တုဲ သီဂိုၚ်ဂွံလဝ် လွဟ်လက်နက်မကမ်ဂမၠိုၚ်တုဲ ပ္ဍဲဂိတုမာတ် ၄ ဂှ်လေဝ် ပ္ဍဲပရေၚ်ထောံမခတိုဟ် ထံၚ်ကျာ်မြဟ် ကရောံဒပ်မဟာမိတ်တံဂှ် ပံၚ်တောဲပါလုပ်လဝ်ရ။
နကဵုဗော်ဍုၚ်မန်တၟိ AD ပ္ဍဲဂိတုမာတ် ၁၃ အခိၚ်ဇိုၚ်သဝ်တ္ၚဲ ၄ နာဍဳဝိုက်ကဵု ဗ္တံ ၈ နာဍဳဂှ် ပံၚ်တောဲကဵု ဒပ်မဟာမိတ်အပ္ဍဲဒေသတံတုဲ လုပ်စိုပ်ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် ဖျေံသ္ဇိုၚ်တဂေါန်ဒေၚ်၊ အခၠဵုတံဂှ် နူကဵုဗော် လလောၚ်ပ္တိတ်လဝ်ပရိုၚ်ရ။
ပရိုၚ်−သြၚ်လောန်တိုၚ်(မ်)
ဗီု−NMSP-AD