တၞၚ်သဳ၊ မာတ် ၁၇
လ္ပာ်ကံၚ်ဇြဳပၞာန် ကၠုၚ်စိုပ်ထောံဏာလဝ်မခတိုဟ် ဒၞါဲကဵုတန်ဗ္တောန်ပၞာန် ဒပ်ပၞာန်ကဝ်တူလေဝ် KTLA ဗ္ဒါဲဍုၚ်မဝ်ဒံၚ် ရးတၞၚ်သဳ ဍုၚ်ပယျဵုသေံ−ဗၟာဂှ် ဂွံတီကေတ် ဇရေၚ်ကရောၚ်ပၞာန် ဒပ်ပံၚ်ကောံကောဒေံသၠုၚ်ကျာ SBA ရ။
တုဲကၠုၚ် ပ္ဍဲဂိတုမာတ် ၁၅ အခိၚ်နူဂယး ၁၁ နာဍဳ ဒပ်ကံၚ်ဇြဳပၞာန် ထောံလဝ်မခတိုဟ် ၆ မ နကဵုက္ၜၚ်ကျာ ၂ ဖ္ဍိုက် ဒၞါဲကဵုတန်ဗ္တောန်ပၞာန် KTLA မဆက်စပ်ဒၟံၚ်ကဵု ဒေသ(နေကျော်) ရ။
ဟိုတ်နူဒးဒုၚ်ထောံလဝ်မခတိုဟ်ဂှ်တုဲ စမြိုၚ်လ္ၚဵု မၞုံပ္ဍဲခဠာတ်တန်ဗ္တောန်ပၞာန်ဂှ် ဇီုကပိုက်လီုလာ်လဝ်တုဲ တၞံဇဗၠုညးဒေသတဵုလဝ်တံကီု သၞေဝ်ကေဝ်သတ်ဆုတံလေဝ် လီုလာ်ဆောံလေၚ်အာလဝ်ရ။
အပ္ဍဲပရေၚ်ထောံမခတိုဟ်ကံၚ်ဇြဳပၞာန် တိဨကဗ္ဒါဲကဝက် လီုလာ်အာလဝ်ဂှ် ကောန်ဒပ် KTLA မွဲတၠ ကလိဂွံလဝ်ဝပ် ဟွံဒးဂွိၚ်ဂှ် ကိုဝ်သာၚ်ညဳ လျိုၚ်လလောၚ်ပရိုၚ် ကရောၚ်ပၞာန်ဒပ်ပံၚ်ကောံကောဒေံသ္ကုတ်သၠုၚ်ကျာ SBA ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုဖေဖဝ်ဝါရဳတေံဂှ်လေဝ် ဒပ်ကံၚ်ဇြဳပၞာန် ထောံလဝ်မခတိုဟ်ဗ္တိုက်လဝ် ဒၞါဲကဵုတန်ဗ္တောန်ပၞာန် KTLA နကဵုက္ၜၚ်ကျာသၞေၚ်ဝဲ Mi 2 မခတိုဟ် ၁၁ မကီုလေဝ် ဇီုကပိုက်ကလိဂွံဝပ် ဟွံမွဲပုဟ်ဂှ် ဂွံတီကေတ်ရ။
ပ္ဍဲရးတၞၚ်သဳဂှ် စနူသၞာံဏံမံက်တုဲ ဒပ်ကံၚ်ဇြဳပၞာန်ဝွံ ပ္ဍဲကဵုပေါဲဗ္တိုက်ဆေၚ်မုက်ၜါလ္ပာ်ဂှ် စရပ်စပ်ဒၟံၚ်ပရေၚ်ဗ္တိုက်ပၞာန်ကျာတံတုဲ ဗ္တိုက်ထောံလဝ်မခတိုဟ် ပ္ဍဲကဵုပွိုၚ်ဍုၚ် ၄ ပွိုၚ်ဍုၚ်ရ။
ဒပ်ပၞာန်ကဝ်တူလေဝ် KTLA ဝွံ သ္ကိုပ်က္ဍိုက်ပ်ပၞာန် ဒပ်ပၞာန်စဵုဒၞါကောန်ဂကူကရေၚ် KNDO သဝ်နာဒါမျ ဒက်ပ္တန်လဝ်တုဲ သီုကဵုဒှ်ဒပ်ရပ်လွဟ်ကရေၚ် ဗ္တိုက်သရိုဟ်ဒၟံၚ် ဒပ်ကံၚ်ဇြဳပၞာန်မွဲရ။
ပရိုၚ်−သြၚ်လောန်တိုၚ်(မ်)