ထဝါဲ၊ သေပ်တေမ်ဗာ (၁၂)
အပ္ဍဲပွိုၚ်ဍုၚ်ထဝါဲ ရးဒေသဇၞော်တၞၚ်သဳဂှ် ကောန်ဂကောံ ကမ္မတဳထ္ၜးဆန္ဒညးသၟတ် (၂) တၠ မကၠောန်သ္ပဒၟံၚ် ပေါဲဗ္တိုက်ဗကပ်ဗဗေၚ် ဒစဵုဒစးကံၚ်ဇြဳပၞာန်သီအဝဵု နကဵုဂၠံၚ်ဍာန် ဟွံပကီုပရာပ်တံဂှ် ဒပ်ကံၚ်ဇြဳပၞာန် ကၠုၚ်စိုပ်ရပ်ဒက်ဏာလဝ်ဂှ် ကမ္မတဳထ္ၜးဆန္ဒညးသၟတ်ထဝါဲတံ လလောၚ်ပ္တိတ်လဝ်ရ။
ကိုဝ်အံၚ်ကိုဝ်ဝ်လွေန် မဒှ်ကောန်ဂကောံ ကမ္မတဳထ္ၜးဆန္ဒညးသၟတ်ထဝါဲဂှ် အပ္ဍဲဂိတုသေပ်တေမ်ဗာ (၉) တုဲကၠုၚ်တေံ ဒပ်ကံၚ်ဇြဳပၞာန်တံ ရပ်ဂွံလဝ် အပ္ဍဲဍုၚ်ထဝါဲရ။
ဗွဲကြဴဂှ် ဒပ်ကံၚ်ဇြဳပၞာန်ဝွံ ပ္ဍဲဂိတုသေပ်တေမ်ဗာ စၟတ်တ္ၚဲ (၁၀) ပယျာံဂယးဂှ် ကော်နၚ်ကိုဝ်အံၚ်ကိုဝ်ဝ်လွေန် မဒးဒုၚ်ရပ်လဝ်ဂှ်တုဲ ထပ်ရပ်ဒက်ဏာလဝ် ကိုဝ်ဟုၚ်ဇြေအံၚ် မဒှ်ကောန်ဂကောံ ကမ္မတဳထ္ၜးဆန္ဒ အရာပ် (ဘုံကျွန်း) ဍုၚ်ထဝါဲဂှ်ပၠန်ရ။
ကိုဝ်အံၚ်ကိုဝ်ဝ်လွေန်ဂှ် နူဏေံတေံ ဒးဒုၚ်ရပ်ဏာလဝ် ပ္ဍဲဒၞါဲဂၠံၚ်မွဲဒၞါဲဂှ် ထေၚ်ရ၊ ရပ်ဂွံညးတုဲ ကၠုၚ်ရပ်ဒက်ဏာလဝ် ကိုဝ်ဟုၚ်ဇြေအံၚ်ရ၊ ဂကောံကံၚ်ဇြဳပၞာန်ဂှ် ကဵုဇြဟတ်ဂရိုဟ် ကုကိုဝ်အံၚ်ကိုဝ်ဝ်လွေန်တုဲ ကဵုဗက်ထ္ၜး သ္ၚိဒၟံၚ်ကိုဝ်ဟုၚ်ဇြေအံၚ်ရဂှ် ညးတာလျိုၚ်ကမ္မတဳ ထ္ၜးဆန္ဒညးသၟတ်ထဝါဲမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူကောန်ဂကောံ ကမ္မတဳထ္ၜးဆန္ဒညးသၟတ်ထဝါဲ (၂) တၠ ဒးဒုၚ်ရပ်ဂှ်ရ နကဵုညးမဆေၚ်စပ်တံ သွက်ဂွံပါဲဒလေတ်ကဵု ဗွဲမပြဟ်ဂှ်ကီု သွက်ဂွံမံၚ်စံၚ်ကဵု ဒၞါဲဂီုကၠီုတံအိုတ်ဂှ် ကမ္မတဳထ္ၜးဆန္ဒညးသၟတ်ထဝါဲတံ ဖ္တိုက်ဖ္အောဝ်လဝ်ရ။
ကံၚ်ဇြဳပၞာန် ရပ်ဒက်ထိၚ်ဒဝ်လဝ် ကုကောန်ကမ္မတဳညးသၟတ်ထဝါဲ (၂) တၠ မဒးဒုၚ်ရပ်တံ ဒၞါဲလဵုရောဟီုဂှ် ဟွံဂွံတီကေတ်ဏီတုဲ ကောန်သ္ၚိကၟိန်ညးတံလေဝ် ဂွိၚ်ဂွါဲဒၟံၚ်အိုတ်ရ။
အခိၚ်လၟုဟ် ကံၚ်ဇြဳပၞာန်ဝွံ အပ္ဍဲပွိုၚ်ဍုၚ်ထဝါဲဂှ် ပတေၚ်ကၠုၚ် ပရေၚ်ဂီုကၠီုတုဲ နကဵုညးမဆက်စပ်ကဵု ဒပ်စဵုဒၞါညးဍုၚ်ကွာန်တံ မပါလုပ် သီုကဵုပွမချဳဒရာၚ်ဒစဵုဒစး တၠအဝဵုပၞာန်တံဂှ် သာတုဲကၠောန်သ္ပရပ်ဒက်ကၠုၚ်ရ။
အပ္ဍဲပွိုၚ်ဍုၚ်ထဝါဲဂှ် စနူဂိတုအဝ်ဂါတ် သတ္တာဟတတိယတုဲကၠုၚ်တေံ စဵုကဵုဂိတုသေပ်တေမ်ဗာ (၉) ဂှ် သီုကဵုညးဗြဴမၞုံကဵုဒၟုၚ်ဒၠေၚ်မွဲတၠ မပါလုပ် မၞိဟ်ဒးဒုၚ်ရပ် နွံကၠုၚ် (၃၀) ပြၚ်တုဲ မၞိဟ်ဒးဒုၚ်ရပ်ဏာသ္ၚိတ်တ် မၞိဟ်ဟွံတီတံလေဝ် မၞုံဒၟံၚ်ရ။
ပရိုၚ်−သြၚ်လောန်တိုၚ်(မ်)