မတ်မလီု၊ သေပ်တေမ်ဗာ (၁၂)
ပ္ဍဲတမ်ဒပ် ကံၚ်ဇြဳပၞာန်သီအဝဵု မၞုံအပ္ဍဲတွဵုရးဍုၚ်မန်တံဂှ် ဟိုတ်နူဇြဟတ်ဂကောံဒပ် အောန်ကၠုၚ်ဒၟံၚ်ဂှ်ရ ပရေၚ်ဂီုကၠီုတမ်ဒပ်တံဂှ် သမ္ဘာကောန်ဒပ်တံ ဒးမၚ်ကဵုဒၟံၚ်ကၚ်ပရေၚ်ဂီုကၠီုတံ နကဵုသၞောတ်စှ်ေအလန်တံရဂှ် ညးမစုက်လုက်ကဵု ဒပ်ကံၚ်ဇြဳပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အလဵုအသဳညဳသၟဟ်ဂကူ NUG ဂှ် သၞာံတုဲကၠုၚ် ပ္ဍဲဂိတုသေပ်တေမ်ဗာ (၇) တေံ ဒဒှ်ရစလဝ် ပၞာန်တဝ်စၞေဟ်ပၠန်ဂတးရောၚ် လလောၚ်တြးတုဲဂှ် ပ္ဍဲကဵုရးဒေသ ကေုာံ တွဵုရးဗွဲမဂၠိုၚ်တံဂှ် ဂကောံဒပ်ပံၚ်ကောံစဵုဒၞါညးဍုၚ်ကွာန်ဒေသတံ ကဵု ဒပ်ကံၚ်ဇြဳပၞာန်တံ မွဲလ္ပာ်ကုမွဲလ္ပာ် ပေါဲဗ္တိုက်တံ သာတုဲသ္ကာတ်မြဟ်ကၠုၚ်လဝ်ရ။
ပ္ဍဲကဵုပေါဲဗ္တိုက်တံဏံဂှ် ကောန်ဒပ်ကံၚ်ဇြဳပၞာန်တံ ဒးဂိလဝ်တုဲ ပြဟ်လလုဲအာလဝ်နွံရ၊ သ္ပပတံနူ အခိၚ် NUG လလောၚ်တြး ဒဒှ်ရပၞာန်ပၠန်ဂတး စတုဲဂှ် ကောန်ဒပ်ကံၚ်ဇြဳပၞာန် (၂၀,၀၀၀) ပြၚ် ချိုတ်အာလဝ်ဂှ် သမ္မတယာယဳ ဒူဝါလယှဳလ ဟီုလဝ်ဂလာန် ပ္ဍဲဂိတုသေပ်တေမ်ဗာ (၇) တေံရ။
အခိၚ်အကာဲအရာဗီုလၟုဟ်ဂှ် ကောန်ပၞာန်မသှ်ေဒၟံၚ် ပ္ဍဲဂကောံဒပ် တမ်ဒပ်ကံၚ်ဇြဳပၞာန်တံဂှ် ထပ်ဒးပလံၚ်ဒၟံၚ် မုက်ပၞာန်တေံဂှ်ရ နွံပၟိက်ဒၟံၚ်ကဵု သွက်ပရေၚ်ဂီုကၠီုဂကောံဒပ် တမ်ဒပ်တံ မၞုံဒၟံၚ်ရ။
ဟိုတ်ဂှ်ရ သွက်ပရေၚ်ဂီုကၠီုတမ်ဒပ်တံဂှ် ကံၚ်ဇြဳပၞာန် စၞောန်လဝ် ကုသမ္ဘာကောန်ဒပ်တံ ကဵု ကောန်ဇာတ်ဂမၠိုၚ် ဟွံဒေါအ်ဟွံဂွံ သွက်ဂွံမၚ်ကၚ်ကေတ်တာလျိုၚ်ဂှ် ညးမစုက်လုက်ကဵု ဒပ်ကံၚ်ဇြဳပၞာန်တံ သ္ဂးရ။
“လၟုဟ် ပ္ဍဲတမ်ဒပ်တံဂှ် ဇြဟတ်အောန်ဒၟံၚ် ကွေံကွေံယျ၊ ဟိုတ်ဂှ်ရ ကဵုပိုယ်တံ ကေတ်တာလျိုၚ် သွက်ဂွံမၚ်ကၚ်ပရေၚ်ဂီုကၠီုရ၊ ကၠာတေံဂှ် ဒးမၚ်ကၚ်ဗီုဏံ နွံကီုရ၊ မွဲသတ္တာဟမှ ၜိုတ်မွဲတ္ၚဲရ နွံ၊ လၟုဟ်ဂှ် အရိုဟ်ဒဒှ်တ္ၚဲ ဒးလုပ်ဂျူတဳရောၚ် ဟီုဒၟံၚ်ရ၊ ယဝ်ခါရ ကောန်ဇာတ်နွံတုဲ ဇကုဆန္ဒနွံမ္ဂး စၞးမိဂှ် ကောန်ဇာတ်တံ မၚ်ကဵုဂွံရ” သာ်ဝွံ ညးသ္ဂးရ။
သွက်တာလျိုၚ် မၚ်ကၚ်ပရေၚ်ဂီုကၠီုဂှ် ပ္ဍဲသၞေဟ်ကၚ်မွဲဒၞါဲဂှ် မၞိဟ်ဗြဴ (၂) တၠကဵု မၞိဟ်တြုံကောန်ဒပ် (၄) တၠ ပါလုပ်တုဲ ပ္ဍဲကဵုဒပ်လ္ၚဵုတံမ္ဂး ညးဗြဴ (၅) တၠ ကေုာံ ကောန်ဂကောံဒပ် (၃) တၠဝွံ မွဲတ္ၚဲ လလအ်ပွိုၚ် (၆) နာဍဳဂှ် ဒးမၚ်ကဵု (၂) အခိၚ်ရ။
နကဵုကောန်ဇာတ်သမ္ဘာ ကောန်ဂကောံဒပ်ကံၚ်ဇြဳပၞာန်တံ သွက်ဂွံယိုက်ဂၠေၚ် တာလျိုၚ် မပအပ်ပြာပ်လဝ်တံဂှ် ယဝ်ရလီုလာ်အာမ္ဂး ထပိုတ်ဒၟံၚ်ဗၞိက်စၞစသ္ဇိုၚ် နူကဵုဌာတမ်ဒပ်တံ မထံက်ပၚ်ကဵုဒၟံၚ် လၟေၚ်ဂိတုတံဂှ်ရ။
“ပါဲနူကိစ္စပရေၚ်ထတ်ယုက်တုဲ လီုလာ်အာမ္ဂး အထံက်အပၚ်မဂွံဒၟံၚ် လၟေၚ်ၚ်တံဂှ် ဒးဒုၚ်ထပိုတ် ပွိုၚ်မွဲဂိတုရောၚ်၊ ယဝ်ရတ္ၚဲလီုဟွံမွဲမ္ဂး ကဵုအခေါၚ်ဒုၚ်စသိုၚ် မွဲမွဲသာ်ရောၚ်၊ ဍာ်ဇမၠိၚ်လီုကၠုၚ်ဂၠိုၚ်မ္ဂး ကောန်ဂကောံဒပ် မဒှ်တြုံတၠသ္ၚိ သမ္ဘာတံဂှ် အခေါၚ်ဒုၚ်စသိုၚ် ကဆံၚ်တိုန်တံကီု၊ သြန်ဂိတုပေန်ရှေန်တံ သြန်ထံက်ပၚ်တံကီုဂှ် သ္ကဵုသာအာ ဟွံသေၚ်ပုဟ်” သာ်ဝွံ ညးမစုက်လုက်ကဵု ဒပ်ကံၚ်ဇြဳပၞာန်တံ သ္ဂးရ။
ဟိုတ်နူအကာဲအရာတံဏံတုဲ ကောန်သ္ၚိကၟိန်ဂကောံဒပ်ဗွဲမဂၠိုၚ်ဝွံ မိက်ဂွံဂြိပ်တိတ်နူ ဂကောံဒပ်တမ်ဒပ်တံကီုလေဝ် ညံၚ်ဂွိုအ်ဂြိပ်တိတ် လောဲလောဲသွာသွာမာန်ဂှ် လ္ပာ်ကံၚ်ဇြဳပၞာန် မၚ်ကျောဝ်ဒၟံၚ် ချိုတ်တ်ပၠိုတ်တ်ဂှ်လေဝ် ညးဟီုရ။
ဗွဲကြဴဒပ်ပၞာန်သီအဝဵုတုဲ သၞာဲဒဴမၞုံကဵုကဆံၚ် ကံၚ်ဇြဳပၞာန်တံ မပ္တံ သ္ကိုပ်ဗိုလ်၊ ဗိုလ်ဇၞော် ကေုာံ ဗိုလ်ဂမၠိုၚ် ဒစဵုဒစးကံၚ်ဇြဳပၞာန်တုဲ ပါလုပ်ကၠုၚ် ပ္ဍဲချဳဒရာၚ် CDM တံ မပါလုပ် ကောန်ဒပ်ကံၚ်ဇြဳပၞာန်တံ ကေုာံ ကောန်ဂကောံဒပ်ဗၠာဲသၟိၚ်တံ ဗ္ဒါဲ (၈၀၀၀) နွံကၠုၚ်ရဂှ် ဂကောံညးဍုၚ်ကွာန်တံ လလောၚ်ပ္တိတ်လဝ်ရ။
ပ္ဍဲကဵုတမ်ဒပ်ကံၚ်ဇြဳပၞာန် မွဲဒပ်ဂှ် သီုကဵုသၞာဲဒဴတံမပါလုပ် ဇြဟတ်တိတ်ပၞာန် အောန်အိုတ် (၈၅) တၠ ဒးနွံရောၚ် စၟတ်သမ္တီလဝ်ရ၊ ဆ္ဂး လ္တူနူဇြဟတ်တိတ်ပၞာန် (၈၅) တၠဂှ် အောန်ကြဳဒၟံၚ်ဂှ်ရ သွက်လၟိဟ်ဂၞန်တံဏံ ဂွံဍိုက်ပေၚ်ဂှ် ဒဒှ်ရကဵုဒၟံၚ်ဇြဟတ်ဂရိုဟ် ကုဂကောံဒပ် တမ်ဒပ်သၟဝ်တဲ ဇၟာပ်ပ်ဂအုပ်ဌာန်ပၞာန် ကံၚ်ဇြဳပၞာန်တံဂှ်လေဝ် ပရိုၚ်သ္ပဒတန်ဟွံမာန်တံ သ္ဂးလဝ်ရ။
ပရိုၚ်−သြၚ်လောန်တိုၚ်(မ်)