မတ်မလီု၊ သေပ်တေမ်ဗာ (၁၂)
ပရေၚ်ပၠန်ဂတးဥတုက္ညၚ်ဝွံ လၟိုန်အခိၚ်ပၟိက်ဇၞော်ဂှ်ရ စွံၚုဟ်မးလၟိုန်အခိၚ်တုဲ သွက်ဂွံကၠောန်ကမၠောန်အိုတ် နွံပၟိက်ဂှ် သ္ကိုပ်ဝန်ဇၞော် အလဵုအသဳညဳသၟဟ်ဂကူ မာန်ဝေန်ခိုၚ်တာန် ဟီုရ။
ပ္ဍဲလၟေၚ်စၟတ်ကောံဓရီု ကမ္မတဳဗဟဵု ထ္မံက်ရုပ်ရဴ ပရေၚ်အုပ်ဓုပ် ညးဍုၚ်ကွာန်ဒေသန္တရ အခိၚ်အကြာ အလဵုအသဳညဳသၟဟ်ဂကူ (၂၈/၂၀၂၂) ဂှ် ဟီုလဝ်ဗီုဏံရ။
“ပရေၚ်ပၠန်ဂတးဏံဝွံ လၟိုန်အခိၚ် ပၟိက်ဇၞော်ဒၟံၚ်တုဲ စွံၚုဟ်မးလၟိုန်အခိၚ်တုဲ သွက်ဂွံကၠောန်ကမၠောန်အိုတ်ဂှ် နွံပၟိက်ရ၊ လိက်ဒုၚ်စဳရေၚ် ကမ္မတဳပေၚ်မွဲသၞာံဂှ် ပ္တိုန်ထ္ၜးပ္ဍဲ Cabinet တုဲ သွက်ဂွံကေတ်ကသပ် လၟေၚ်ကမၠောန်ဂတတံ သ္ဂောံတုဲဒှ်ပိုတ်အာတံရ” ဂှ် သ္ကိုပ်ဝန်ဇၞော်မာန်ဝေန်ခိုၚ်တာန် ဟီုရ။
သ္အာၚ်နူဂှ်ပၠန် ကမ္မတဳဗဟဵုထ္မံက်ရုပ်ရဴ ပရေၚ်အုပ်ဓုပ်ညးဍုၚ်ကွာန်ဒေသန္တရအခိၚ်အကြာဂှ်ဝွံ မ္ၚးနူကောံဓရီုတံဂှ် ဟိုတ်နူရေၚ်တၠုၚ်ဒၟံၚ် ကောံဓရီု က(၃) မတံ၊ ကောံဓရီုပရေၚ်သၠဲပ္တိုန်အုပ်ဓုပ်ညးဍုၚ်ကွာန်တံ ၊ ကောံဓရီု ကုကၠတ်ထဝ်၊ ကုကံၚ်ဇြဳကဵုကသပ်တံ ဟွံပိုတ်သ္ကုတ်ဂှ်ရ ဒှ်ကမ္မတဳ ပွမစုက်လုက်ဟွံပိုတ်သ္ကုတ်ကဵု ဗလးတိတံရဂှ် ဟီုလဝ်ဏီရ။
ဟိုတ်နူကမၠောန် ပ္ဍဲကဵုဌာနဝန်ဇၞော်ကာစဵုဒၞါတံ ၊ ဌာနဝန်ဇၞော်အပ္ဍဲဍုၚ်တံကဵု ပရေၚ်ကောပ်ကာဲမၞိဟ်လုပ်တံ ဂၠိုၚ်ဒၟံၚ်ဂှ်ရ သွက်ဂွံကဵုတာလျိုၚ် ကုညးမကၠောန် ဗွဲမစှ်ေကဵုသၞောတ်တံမာန် နွံပၟိက်ဂှ် သ္ကိုပ်ဝန်ဇၞော် NUG သ္ဂးရ။
ကောန်ဂကောံကမ္မတဳဗဟဵု ထ္မံက်ရုပ်ရဴပရေၚ်အုပ်ဓုပ်ညးဍုၚ်ကွာန်ဒေသန္တရ အခိၚ်အကြာတံဝွံ စပ်ကဵုတၚ်သ္ဂုတ်သွာတ်၊ လၟေၚ်ကမၠောန်ဂတ မဖျေံစၟတ်လဝ် ပ္ဍဲ (၂၇/၂၀၂၂) တံဂှ်တုဲ သောၚ်ကလးသဳကၠဳလဝ် ကုအကာဲအရာတုဲဒှ်တံကဵု လၟေၚ်ကမၠောန်သွက်ဂွံရေၚ်တၠုၚ်မသှ်ေဒၟံၚ်တံရဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)