မိုဝ်ဗျာ၊ သေပ်တေမ်ဗာ (၁၃)
ပ္ဍဲပေါဲဗ္တိုက်မိုဝ်ဗျာ ပယျဵုသေံဇၞော်−ကရေၚ်ဍာဲဂှ် ဟိုတ်နူဒပ်ကံၚ်ဇြဳပၞာန် ဗ္တိုက်ကဵုက္ၜၚ်ကျာ၊ ပန်ပှော်ကဵုလွဟ်လက်နက်ဇၞော်တံတုဲ သ္ၚိဒၟံၚ်နူအရာပ်လ္တူဍုၚ်တံ (၁၀၀) ပြၚ် လီုလာ်အာလဝ်ဂှ် ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်ပါဲဒဴဘဲပၞာန်တံ ကေုာံ ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုသေပ်တေမ်ဗာ စၟတ်တ္ၚဲ (၈) တုဲကၠုၚ်တေံတုဲ ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် လ္တူဍုၚ်မိုဝ်ဗျာဂှ်ရ အကြာဒပ်ပံၚ်ကောံစဵုဒၞါဒေသတံဂှ် က္တဵုဒှ်လဝ် ပေါဲဗ္တိုက်တုဲ စဵုကဵုလလအ်ပွိုၚ် (၄) တ္ၚဲ ပေါဲဗ္တိုက်တံ ဆက်သ္ကာတ်မြဟ်ဒၟံၚ်ရ။
အပ္ဍဲပေါဲဗ္တိုက်ဂှ် ဒပ်ကံၚ်ဇြဳပၞာန်ဝွံ ဒၞါဲသ္ၚိဒၟံၚ်ညးဍုၚ်ကွာန် ကောန်အရာပ်တံ မံၚ်စံၚ်ဂှ် နကဵုတၚ်ရန်တၟံနွံနွံ မ္ၚးနူဂၠံၚ်က္ၜၚ်ကျာဂှ် သီုကဵုပန်ပှော်ဒၟံၚ်လွဟ်လက်နက်ဇၞော်တံဂှ်ရ သ္ၚိမၞိဟ်ဒၟံၚ် (၁၀၀) ပြၚ် ဇီုကပိုက်လီုလာ်လဝ်ရ။
“ပ္ဍဲပေါဲဗ္တိုက်လ္တူဍုၚ် မက္တဵုဒှ်ဒၟံၚ်လၟုဟ်ဂှ် ဒပ်ကံၚ်ဇြဳပၞာန်တံ စွံပွန်ဗ္တိုက်ဒၟံၚ် ကုဂကောံဒပ်စဵုဒၞါညးဍုၚ်ကွာန်တံ ဟွံသေၚ် နကဵုတၚ်ရန်တၟံနွံနွံဂှ် စွံပွန်ဗ္တိုက်ဒၟံၚ် ကုညးဍုၚ်ကွာန်တံရဂှ် ဂွံဆဵုကၠုၚ်ရ” သာ်ဝွံ ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်ပါဲဒဴဘဲပၞာန်မွဲတၠ ဟီုရ။
ဟိုတ်နူပေါဲဗ္တိုက်ဂှ်တုဲ ညးဍုၚ်ကွာန်ဒေသ (၅၀၀၀) ပြၚ်ဝွံ အပ္ဍဲဍုၚ်ကွာန် မကြပ်တံကဵု ပ္ဍဲဘာလကျာ် ဒၞါဲဗၠးဘဲတံဂှ် ဒးဂြိပ်ဒဴပါဲဒလေတ်ဒၟံၚ် နဂအုံဗွဝ်ရ။
ဟိုတ်နူပေါဲဗ္တိုက်တံတုဲ ညးဒေသ ၜိုတ် (၅) လ္ၚီဝွံ ဒးပါဲဒဴဒၟံၚ်ဘဲပၞာန် လ္တူဍုၚ်တၞဟ်ဟ်တံကဵု ဘာလကျာ်ဗဒါဲဗဒါဲတံ နဂအုံဗွဝ်ရ။
အပ္ဍဲပေါဲဗ္တိုက် ပွိုၚ်ပန်တ္ၚဲဂှ် ကောန်ဂကောံဒပ်စဵုဒၞါဒေသ (၂) တၠ ပြဟ်လလုဲအာလဝ်တုဲ လ္ပာ်ကံၚ်ဇြဳပၞာန် ဟွံအောန်နူကဵု (၆၀) ဒးချိုတ်အာလဝ်ဂှ် ဂွံတီကေတ် အတိုၚ်ပရိုၚ်မပလံၚ်နၚ် နူဗလးတိတံရ။
အခိၚ်လၟုဟ် လ္တူဍုၚ်မိုဝ်ဗျာဂှ် ပေါဲဗ္တိုက်တံ ညိၚ်ဝတ်ဒၟံၚ်ချိုန်ခဏတုဲ ကောန်ဂကောံဒပ်ကံၚ်ဇြဳပၞာန်တံ ဖျေံဒပ်မံၚ်စံၚ်ဒၟံၚ် ပ္ဍဲဘာကျာ်ပွိုၚ်တိုက် ကာဒ်တရေတ်ဂှ်ရ။
ပရိုၚ်−သြၚ်လောန်တိုၚ်(မ်)