တယိတ်ချံၚ်၊ သေပ်တေမ်ဗာ (၁၃)
လ္တူဂၠံၚ်ဇၞော် ထဝါဲ−တယိတ်ချံၚ်၊ ကွာန်ဥုတ္တူယဲ၊ ပွိုၚ်ဍုၚ်တယိတ်ချံၚ်၊ ရးဒေသဇၞော်တၞၚ်သဳဂှ် ညးဒေသမွဲတၠ ဒေါအ်တုဲ မဒးဒုၚ်စၟဳစၟတ်ဒၟံၚ်ကဵု ကွဳလိုန်ဓာတ်မွဲဖ္ဍိုက်ဂှ် ဒပ်ကံၚ်ဇြဳပၞာန် ပန်ဂစိုတ်ထောံလဝ် ကဵုသေနာတ်ရဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုသေပ်တေမ်ဗာ (၁) ၜိုတ်ဇိုၚ်သဝ်တ္ၚဲ (၅) နာဍဳဂှ် အခိၚ်ဒပ်ကံၚ်ဇြဳပၞာန်တံ စၟဳစၟတ်ဒၟံၚ် မၞိဟ်အာကၠုၚ်ကွာ်ဂၠံၚ်တံဂှ် ဗဒေါအ်စၟဳစၟတ်လဝ် ကိုဝ်တာၚါ( ကိုသားငယ်) အာယုက် (၃၀) ဒၟံၚ်ကွာန် ယၚာ ( ရငဲ) မဒဳကၠုၚ်ကဵု ကွဳလိုန်ဓာတ်ဂှ်ရ။
လက္ကရဴဂှ် ဒပ်ကံၚ်ဇြဳပၞာန်တံ ကဵုကိုဝ်တာၚာ ပံက်ဗုၚ်ကွဳဂှ် ဟွံပံက်ကဵုဂးတုဲ ပန်ဂစိုတ်လဝ် ကဵုသေနာတ်ကြပ်ပ်ရ။
“ လ္ပာ်ကံၚ်ဇြဳပၞာန်ဂှ် ဟီု ကဵုပံက်ဗုၚ်ကွဳလိုန်ဓာတ်ဂှ် ဟွံပံက်ကဵုတုဲ ပန်ပှော်လဝ်ရ၊ ကံၚ်ဇြဳပၞာန်ဂှ် ပန်ပှော်တုဲ တိတ်အာလဝ်အတိုၚ်ဏံရ၊ နူဂယးဂှ်ရ ဂွံအာကပှ်ကေတ် ဇွဂှ်” သာ်ဝွံ ညးဒေသမွဲတၠ ဟီုရ။
ဟိုတ်နူဒးဒုၚ်ပန်ကဵုသေနာတ်တုဲ ကိုဝ်တာၚာဝွံ ပ္ဍဲဒၞါဲဒှ်ပရူဂှ်ရ ဒးချိုတ်အာလဝ်တုဲ ဇွဂှ်တှ်ေ ပ္ဍဲဂိတုသေပ်တေမ်ဗာ (၁၂) ဗ္ဂါပ်ဂယးဂှ် ဂကောံရီုဗၚ်ဟံၚ်ပြာ်တံ ကၠုၚ်စိုပ်ကပှ်ကေတ်တုဲ ပလံၚ်ဗစိုပ်လဝ် ရုၚ်ဂဥုဲတယိတ်ချံၚ်ရ။
အတိုၚ်ဂလာန် ဂကောံသုတေသန Southern Monitor ဂှ်မ္ဂး ပ္ဍဲရးဒေသဇၞော်တၞၚ်သဳဂှ် ကြဴနူဒပ်ပၞာန်သီအဝဵု စနူဂိတုဖေဖဝ်ဝါရဳ (၁) သၞာံတုဲကၠုၚ်တေံ စဵုကဵုဂိတုသေပ်တေမ်ဗာ သတ္တာဟပထမ သၞာံဏံဂှ် ကောန်အရာပ်ချိုတ်အာ မၞုံကၠုၚ် (၂၄၀) ပြၚ်ရဂှ် သ္ဂးလဝ်ရ။
ပရိုၚ်−သြၚ်လောန်တိုၚ်(မ်)