မတ်မလီု၊ သေပ်တေမ်ဗာ (၁၃)
အပ္ဍဲတွဵုရးဍုၚ်မန် ဂကောံမကဵုလဝ်ယၟု ကရောၚ်ပၞာန်ဇၞော် (၅) ကရောၚ် နူကဵုသၞာဲဒဴဂမၠိုၚ် မပါလုပ်ကၠောန်ကဵုဒၟံၚ် ပရေၚ်ဒေသဖောအ်ဗြေဝ် နူဇၟာပ်ပ်ဌာနမဆေၚ်စပ် သၟဝ်တဲကံၚ်ဇြဳပၞာန်သီအဝဵုတံဂှ်ဝွံ သွက်ဂွံပံၚ်တောဲကဵု ဒပ်ပၞာန်ဗၟာတံကီု သီုသ္ဂောံကဵုပရိုၚ် တိဍာ်တံဂှ်တုဲ ဗက်စန်ဒက်ဒၟံၚ်ရောၚ် ညးဒေသတံ ဟီုရ။
ဂကောံ ဇၞော်သ္ကိုပ်သၞာဲဒဴ နူဌာနမဆေၚ်စပ် (၂၁) ဌာန ကဆံၚ်ပွိုၚ်ဍုၚ် အပ္ဍဲတွဵုရးဍုၚ်မန်တံဂှ် နကဵုတၚ်ထ္ၜးဟိုတ် မပ္တံကဵု ဍုၚ်ကွာန်သ္ဂောံၜိုဟ်သြိုဟ်သာယာ၊ သၞောဝ်ဥပဒေ သ္ဂောံအုပ်လဒံ၊ ပရေၚ်ဂီုကၠီု၊ ပရေၚ်ပညာ၊ ပရေၚ်ထတ်ယုက်၊ ပရေၚ်မၞိဟ်၊ ပရေၚ်လွဳလွတ် တဵုလွဳတံ၊ အန္တရာယ်ကူသာန်သွံရာန်မၞိဟ်တံ၊ ညံၚ်ဂွံထ္ပက်ဂဥုဲစဵုဒၞါကဝ်ဝေဒ်(၁၉) လတုန်ပေၚ်ၚ်မာန်တံတုဲ စနူဂိတုဏံ သတ္တာဟဒုတိယတုဲဂှ် ဗက်စန်ဒက်ဒၟံၚ် ညးဒေသတံရ။
ပ္ဍဲဗလးတိဍာံဍာံဏံဂှ် ညးဍုၚ်ကွာန်ဒေသတံ ညံၚ်ဂွံပံၚ်တောဲကဵု ဂကောံသၟဝ်တဲကံၚ်ဇြဳပၞာန်တံတုဲ ပ္ဍဲပရေၚ်ဂီုကၠီုဍုၚ်ကွာန်တံဂှ် သွက်ဂွံပါလုပ်ပူဗိုၚ်ကဵု မွဲကရောံမွဲစွံဂှ်ဟေၚ် ဟီုဂးလဝ်အဓိကရောၚ်ဂှ် ညးဒေသမတိုန်စိုပ်လဝ် ပေါဲဆဵုဂဗမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဍေံတံ ကၠုၚ်ဟီုဂှ်တှ်ေ ဂကောံကရောၚ်ပၞာန် (၅) ကရောၚ်ဂှ်ဝွံ ဒှ်ဂကောံ မရေၚ်တၠုၚ် သွက်ညးဍုၚ်ကွာန်တံဂးတုဲ သွက်ဂွံအာတိုန် ကောံဓရီုဂှ်ရ၊ စိုပ်လေဝ်စိုပ်အတေံဂှ် ဍေံတံ ဟီုဒၟံၚ် ကိစ္စပရေၚ်ဂီုကၠီုဂှ် အဓိကရ၊ သွက်ဍုၚ်ကွာန်ဇကုဂွံဂီုကၠီုဂှ် ညးဒေသတံ ပၟိက်ဇၞော်အိုတ်ရ၊ သွက်ဂွံပံၚ်တောဲကဵု ကောန်ဒပ်ပၞာန်တံကဵု ကောန်ဗၠာဲသၟိၚ်တံဂှ် နွံပၟိက်ရ၊ ပ္ဍဲကွာန်ဇကု တၟေၚ်ဟ်တဴမွဲမွဲမ္ဂးလေဝ် သွက်ဂွံပလံၚ်ပရိုၚ်ဗွဲမပြဟ်ဂှ် ဟီုလဝ်ရ၊ ထေၚ်ဂှ်တှ်ေ ထ္ၜးဟိုတ် ရေၚ်တၠုၚ်ကဵုညးဍုၚ်ကွာန်တံတုဲ ကဵုသမ္တီကိစ္စပရေၚ်ဂီုကၠီုတုဲ စကာကဵုပါလုပ်ရောၚ်ဂှ် ထေၚ်ရ” သာ်ဝွံ ညးဟီုရ။
သ္အာၚ်နူဂှ်ပၠန် သွက်ပေါဲရုဲမာဲကံၚ်ဇြဳပၞာန် မကၠောန်ဗဒှ် အပ္ဍဲသၞာံ ၂၀၂၃ ဂှ်လေဝ် ကိစ္စညးဍုၚ်ကွာန်တံ သ္ဂောံပါလုပ်ပူဗိုၚ်ကဵုဂှ်ကီု ကိစ္စမၚ်မွဲရံၚ်စံၚ်ပရေၚ်ထတ်ယုက် သွက်ညးဍုၚ်ကွာန်တံကီုဂှ် ဂကောံပံၚ်ကောံကံၚ်ဇြဳပၞာန်တံ ဟီုစုတ်လဝ်ဏီဂှ် ဂွံတီကေတ်ရ။
အစဳဇန်ဏံဂှ် ဗက်စန်ဒက်အာ ဇၟာပ်ပွိုၚ်ဍုၚ် နကဵုစၞောန် ဥူဇြဝ်လေန်ထောန် သ္ကိုပ်ဝန်ဇၞော် ကံၚ်ဇြဳပၞာန် မခါန်ကၞက်လဝ်ဂှ်တုဲ အခိၚ်လၟုဟ် ရေၚ်တၠုၚ်ဒၟံၚ် ပ္ဍဲပွိုၚ်ဍုၚ်မတ်မလီုတံကဵု ပွိုၚ်ဍုၚ်ကျာ်မြဟ်တံရ။
ပွိုၚ်ဍုၚ်မသှ်ေဒၟံၚ်တံဂှ် တန်တဴကဵု လ္တူအကာဲအရာတိဍာ်တုဲ ရေၚ်တၠုၚ်အာရောၚ်ဂှ် ညးမပါလုပ်ဒၟံၚ် ပ္ဍဲကရောၚ်ပၞာန် (၅) ကရောၚ် မွဲတၠ ဟီုရ။
သွက်ဂွံကလေၚ်ခၠေဝ် ကုအလဵုအသဳညဳသၟဟ်ဂကူ NUG ကဵု ဂကောံဒပ်စဵုဒၞါညးဍုၚ်ကွာန် PDF တံမာန်ဂှ် ဒဒှ်ရ က္ဍိုပ်သ္ကိုပ်ပၞာန်သီအဝဵု မေန်အံၚ်လှာၚ် စၞောန်ပ္ညုၚ်ကၠုၚ်လဝ် တၚ်ပိတၚ်ဂှ် ဂွံဆဵုကေတ် ပ္ဍဲကဵုတၚ်စၞောန်မွဲ မမံက်ပြိုဟ်တိတ်လဝ် အပ္ဍဲဂိတုဖေဖဝ်ဝါရဳ သၞာံဏံဂှ်ရ။
ပ္ဍဲတၚ်စၞောန်ပ္ညုၚ်ဏံဂှ် သွက်ဂွံဒက်ပ္တန် ဂကောံပၞာန်ညးဍုၚ်ကွာန် ပါလုပ်သီုကဵု ကောန်ပၞာန်တြေံတြေံတံ ကေုာံ ဗၠာဲသၟိၚ်တြေံတြေံတံတုဲ၊ နကဵုကရောၚ်ပၞာန် (၅) ကရောၚ် သွက်ဂွံစှ်ေစန်ဒက် တိဍာ်တံဂှ်ကဵု သ္ဂောံဂွံပရိုၚ် PDF တံတုဲ သွက်ဂွံရေၚ်တၠုၚ်အာ နဲကဲနာနာသာ်တံ ဒှ်တမ် တၚ် (၃) တၚ် ပါလုပ်ရ။
ပ္ဍဲကရောၚ်ပၞာန် (၅) ကရောၚ်ဂှ် ပရေၚ်အုပ်ဓုပ်၊ ပရေၚ်ဍုၚ်ကွာန်၊ ပရေၚ်ဒေသဖောအ်ဗြေဝ်၊ ပရေၚ်မၞိဟ် ကေုာံ ပရေၚ်စန်ဒက်တံ ဒှ်တမ် ဂကောံ (၅) ဂကောံပါလုပ်ရ၊ ပ္ဍဲကဵုကရောၚ်ပၞာန် ပရေၚ်အုပ်ဓုပ်ဂှ် ဌာနက္ဍိုက်ပ် ပရေၚ်အုပ်ဓုပ်ကာနာနာ၊ သၞာဲဒဴသၞောဝ်ဥပဒေ ပွိုၚ်ဍုၚ်၊ ဗၠာဲသၟိၚ် ပွိုၚ်ဍုၚ်တံ၊ ဌာနပရေၚ်ဖောအ်ဗြေဝ် ကွာန်ရးတံ ကေုာံ သၞာဲဒဴပေါဲရုဲမာဲ ပွိုၚ်ဍုၚ်တံ ပါလုပ်ရ။
တာလျိုၚ် ကရောၚ်ပၞာန်ဏံဂှ် ဒှ်ဂကောံဒးဟီုတွံ သွက်ဂွံရီုဗၚ်ကဵု ညံၚ်သ္ကိုပ်အုပ်ဓုပ်ကွာန်တံ ဂွံယိုက်ဂၠေၚ်တာလျိုၚ်မာန်ကီု၊ သွက်ဂွံဒ္ဂေတ်ဗက်အမိၚ် ကံၚ်ဇြဳပၞာန် မလလောၚ်ပ္တိတ်လဝ်တံဂှ် ဂွံတီကေတ်ရ။
ပ္ဍဲကရောၚ်ပၞာန် ပရေၚ်ဍုၚ်ကွာန်ဂှ် သ္ကိုပ်ဗိုလ် ဒပ်ကံၚ်ဇြဳပၞာန် သ္ကိုပ်သ္ကတုဲ ကောန်ဂကောံ နူဂကောံပရေၚ်အုပ်ဓုပ် ပွိုၚ်ဍုၚ်တံ ပါလုပ်ရ၊ တာလျိုၚ်ဂကောံဏံဂှ် သွက်ဂွံဟီုတွံ တြးဝါဒ လၟေၚ်ကမၠောန်ဂတ (၅) သာ် က္ဍိုပ်သ္ကိုပ်ပၞာန် သီအဝဵု မဖျေံစၟတ်လဝ်ဂှ်ကဵု တၚ်ပ္တဝ်က္ဍိုပ် (၉) သာ်တံရ။
ပ္ဍဲကရောၚ်ပၞာန် ပရေၚ်ဖောအ်ဗြေဝ်ဒေသတံဂှ် ဌာနက္ဍိုက်ပ်ဂၠံၚ်ဍာန် ကွာန်ရးပွိုၚ်ဍုၚ်တံ ဒးအာက္ဍိုပ်တုဲ ပ္ဍဲကရောၚ်ပၞာန်ပရေၚ်မၞိဟ်ဂှ် သၞာဲဒဴနူဌာနပရေၚ်ထတ်ယုက် ကေုာံ ဌာနပရေၚ်ပညာ ပွိုၚ်ဍုၚ်တံ သ္ပသ္ကိုပ်သ္ကတုဲ အာက္ဍိုပ်ရောၚ်။
ပ္ဍဲကဵုကရောၚ်ပၞာန် (၅) ကရောၚ် မစှ်ေခဠာတ်စန်ဒက်ဒၟံၚ် အပ္ဍဲတွဵုရးဍုၚ်မန်တံဂှ် သ္ကိုပ်ဗိုလ် ဒပ်ကံၚ်ဇြဳပၞာန် က္ဍိုက်ပ်တုဲ ဇြဟတ်ကောန်ဂကောံ (၃၀) ပြၚ် နွံဂှ် ဂွံတီကေတ်ရ။
ပ္ဍဲဂကောံကရောၚ်ပၞာန် (၅) ကရောၚ်ဂှ် ၜိုန်ရသၞာဲဒဴ ဌာနမဆေၚ်စပ် သွက်ဖောအ်ဗြေဝ်ပရေၚ်ပညာ၊ ပရေၚ်ထတ်ယုက်၊ ပရေၚ်ဖောအ်ဗြေဝ်ဒေသ ကွာန်ရးတံ ပါလုပ်ဒၟံၚ်ကီုလေဝ် ပ္ဍဲဗလးတိဏံဂှ် သွက်သ္ဂောံဂွံ ပရိုၚ်ဂကောံ PDF တံကဵု သွက်ဂွံပံၚ်တောဲကဵု ဒပ်ကံၚ်ဇြဳပၞာန်တံဟေၚ် စွံအဓိကတုဲ စန်ဒက်ဒၟံၚ်ဂှ်လေဝ် ညးဒေသတွဵုရးဍုၚ်မန်တံ ဟီုရ။
ပရိုၚ်−သြၚ်လောန်တိုၚ်(မ်)