ရေဝ်၊ မေ ၂၆
တွဵုရးဍုၚ်မန် ပ္ဍဲပွိုၚ်ဍုၚ်ရေဝ် ကၠေၚ်စက်ပိုတ်က္တဵုဒှ်ဒၟံၚ်တုဲ ဆေၚ်သွံကၠေၚ်စက်ဇၞော်ဇၞော်တံသီုဖအိုတ်ဂှ် ကၟာတ်လဝ်ရောၚ် ညးဒေသတံ ဟီုကဵု ဌာန်ပရိုသြၚ်လောန်တိုၚ်(မ်) ရ။
ဟိုတ်နူကၠေၚ်စက်ပိုတ်တုဲ ဆေၚ်ကၠေၚ်စက်ဇၞော်ဇၞော်တံဝွံ စဵုကဵုဂိတုမေ ၂၅ အခိၚ်နူဂယးဂှ် သွံတြးကဵုဒၟံၚ် နကဵုဗ္ၜတ်ကီုလေဝ် ၜိုတ်အခိၚ်လဒေါဝ်တ္ၚဲဂှ် ဆေၚ်ကၠေၚ်သီုဖအိုတ် ကၠေၚ်ပိုတ်အာဂှ်ရ ဒးကၟာတ်ထောံလဝ်ရောၚ် သ္ဂးရ။
ကၠေၚ်စက်ပိုတ်ဂှ်ဝွံ ကြဴနူဒဒန်ကြုၚ်အုက်ကဵု ဒဒန်မသဝ် နွံလ္တူဂၠံၚ်လ္ဂုၚ်−မတ်မလီု ပွိုၚ်ဍုၚ်ၜဳကလေၚ် ဒးဒုၚ်ဖံက်ခတိုဟ်မာၚ်တုဲဂှ် ကွဳစက်ဖ္ဍိုက်ကၠေၚ်တံ ဟွံစိုပ်ရဂှ်တုဲ ကၠေၚ်စက်ပိုတ်ဒၟံၚ်ဂှ် ဂွံတီကေတ်ရ။
ဟိုတ်နူကၠေၚ်စက်ပိုတ်တုဲ ပ္ဍဲဆေၚ်ကၠေၚ်သ္ကဲဂၠံၚ်တံဂှ် မွဲလဳတာ ဒးရာန်ဒၟံၚ် ၅၀၀၀ ဒ္ကေဝ်တုဲ ပ္ဍဲဆေၚ်တံဏံဂှ်လေဝ် ကၠေၚ်စက် စပိုတ်ဒၟံၚ်ယျဂှ် ဂွံတီကေတ် အတိုၚ်တၚ်လလောၚ်တြး ညးဒေသတံရ။
ပ္ဍဲဆေၚ်ကၠေၚ်စက် နူပွိုၚ်ဍုၚ်ရေဝ်တံဂှ် သွံတြးဒၟံၚ် ကၠေၚ်စက် မပၠောပ်ပ္တိုန်နၚ် နူလ္ဂုၚ်ကဵု ဍုၚ်သေံတံ ဂၠိုၚ်အိုတ်တုဲ ဟိုတ်နူကၠေၚ်ပိုတ်တုဲ ညးဍုၚ်ကွာန်တံ ဒးဒုၚ်စသိုၚ်ဒၟံၚ် ဘဲၚုဟ်ဖျာက္ဍၚ်တံရ။
ဟိုတ်နူကၠေၚ်စက်ပိုတ်တုဲ ကမ္ပဏဳပူဂဵု သွံတြးကဵုဒၟံၚ်ဓာတ်လလဳ ပ္ဍဲပွိုၚ်ဍုၚ်ရေဝ်တံဂှ်လေဝ် ဒးဖအောန်ဖျေံလဝ် အခိၚ်ကဵုပၟတ်ရောၚ် ဂွံတီကေတ်ရ။
အခိၚ်လၟုဟ် ဟိုတ်နူကၠေၚ်စက်ပိုတ်တုဲ ပရေၚ်ဇီုကပိုက် လ္တူကမၠောန်ပရေၚ်မၞိဟ်၊ ပရေၚ်ပိုန်ဒြပ် ကေုာံ ကမၠောန်ပရေၚ်ထတ်ယုက် ညးဍုၚ်ကွာန်ဒေသတံ နွံဒၟံၚ်တုဲ ကမၠောန် SME လ္ၚဵု ကမၠောန်ဂေတ်ဂြိပ် ဒေါအ်ဒေၚ်အာယျဂှ် ဂွံတီကေတ်ရ။
ပွိုၚ်ဍုၚ်ရေဝ် ပ္ဍဲတွဵုရးဍုၚ်မန် မလလောၚ်တြးလဝ် ပရေၚ်အုပ်ဓုပ်ပၞာန် မွဲဓဝ်ဂှ်ဝွံ သီုကဵုဒှ်ဒေသ ဟွံဂွံပၟတ်အလဵုအသဳမွဲရ။
ပရိုၚ်−သြၚ်လောန်တိုၚ်(မ်)
ဗီု−CJ