ၜဳကလေၚ်၊ မေ ၂၆
ပေါဲဗ္တိုက်ဟွံမွဲမွဲသာ် ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော် ပ္ဍဲကွာန် (တောင်သူဌေးကုန်း) ပွိုၚ်ဍုၚ်ၜဳကလေၚ် တွဵုရးဍုၚ်မန်ဂှ်တုဲ ညးဍုၚ်ကွာန်ကောန်အရာပ် ၂ တၠ ချိုတ်တုဲ ၂ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် ဇရေၚ်ညးတာလျိုၚ် ခရိုၚ်သဓီု KNU ရ။
ဂိတုမေ ၂၄ အခိၚ်ဗ္တံ ၜိုတ် ၁၁ နာဍဳဂှ် နူတမ်ဒပ် ခမရ ကံၚ်ဇြဳပၞာန် စၟတ် ၃ ဖျေံသ္ဇိုၚ်ကွာန်နာတ်ကျဳဂှ် ပန်ဏာလဝ် လွဟ်ဇၞော် ၅ မ ပ္ဍဲကွာန်ကဒဳပု ကဵု ကွာန် (တောင်သူဌေးကုန်း) ရ။
လွဟ်ဇၞော် ဒပ်ကံၚ်ဇြဳပၞာန် ပန်ဏာလဝ် ၂ မဂှ်ဝွံ ဒတုံဗ္တိုဟ်ထ္ကးအာလဝ် ပ္ဍဲကွာန် (တောင်သူဌေးကုန်း) ဂှ်တုဲ ညးဍုၚ်ကွာန်ဒေသ ၂ တၠ ချိုတ်တုဲ ၂ တၠ ကလိဂွံလဝ်ဝပ်ရောၚ် ပဒိုဝ်သဝ်အေနာၚ် ညးမၞုံအခေါၚ်ဟီုဂး ခရိုၚ်သဓီု KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုမေ ၁၁ တုဲ သီုဗ္တံသီုတ္ၚဲ ဒပ်ကံၚ်ဇြဳပၞာန် ပန်ဒၟံၚ်လွဟ်ဇၞော် ပ္ဍဲပွိုၚ်ဍုၚ်ၜဳကလေၚ်ဂှ်ရ ညးဒေသတံ ဇီုကပိုက်ချိုတ်အာ သီုဂြိပ်ဒဴပါဲဒလေတ်တံ နွံဒၟံၚ်ရ။
ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တုဲ ညးဍုၚ်ကွာန်ဒေသ ဗ္ဒါဲ ၅၀၀၀ နူကဵုပွိုၚ်ဍုၚ်ၜဳကလေၚ် ပါလုပ်သီုကဵုကွာန်ယှိုဲယံၚ်ပျ၊ ဒံက်ယိတ်၊ အဝန်ကျဳ ဟွံအောန်နူကဵု ၈ ကွာန်တံ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရ။
အတိုၚ်တၚ်နၚ် နူသြၚ်လောန်တိုၚ်(မ်) ပ္ကောံပ္ကေဝ်ဂွံလဝ်ဂှ်မ္ဂး အပ္ဍဲဂိတုဏံ ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော် ပ္ဍဲပွိုၚ်ဍုၚ်ၜဳကလေၚ်ဂှ်တုဲ ကောန်အရာပ် ၄ တၠ ချိုတ်တုဲ ဟွံအောန်နူကဵု ၁၆ တၠ ဇီုကပိုက်ကလိဂွံလဝ်ဝပ်ရ။
ကွာန်ဒပ်ကံၚ်ဇြဳပၞာန် ပန်ပှော်လဝ် လွဟ်ဇၞော်တံဂှ်ဝွံ ဒှ်ကွာန် နူတိဍာ်ထိၚ်ဒဝ် ခရိုၚ်သဓီု ဒပ်မဟာ ၁ KNU တုဲ ဂကူကရေၚ် မံၚ်ဒၟံၚ် ဂၠိုၚ်အိုတ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−KHRG