မတ်မလီု၊ မေ ၃
အခိၚ်ညးဂမၠိုၚ် လုပ်ဒၟံၚ်ပေါဲဗ္တိုက် ကုကံၚ်ဇြဳပၞာန် ဇြဟတ်ဍိုန်လျကၠုၚ်ဒၟံၚ်ဂှ် သွက်ဂွံကလေၚ်ဒက်ပ္တန်ဍုၚ်မန်ဟံသာဝတဳတၟိမာန် အလုံကောန်ဂကူမန်မွဲ သွက်ဂွံပါလုပ်ညးသ္ကအ်အိုတ်ဂှ် ဂကောံဇြဟတ်ပၠန်ဂတးမန်တံ ဖ္တိုက်ဖ္အောဝ်လဝ်ရ။
စပ္တံနူသက္ကရာဇ်ဍုၚ် ၁၁၁၉ သၞာံ၊ ဂိတုပသာ် (၈) စွေက်တေံ သၟိၚ်ဗၟာအံၚ်ဇေယျတအ် ဗ္တိုက်သီ ပၠံၚ်ၜးကေတ်ဏာ ဍုၚ်မန်ဟံသာဝတဳတုဲ တ္ၚဲဏံမ္ဂး ပေၚ်ကၠုၚ် ၂၆၇ သၞာံရ။
ပ္ဍဲကဵုအခိၚ် သၟိၚ်ဗၟာအံၚ်ဇေယျတံ စံၚ်ယတ်ကုဂကူမန်ဂှ်မ္ဂး ကောန်ၚာ်သၟတ် ဟွံသှ်ေ ပ္ဍဲခြေၚ် ဟွံစွံ စဵုကဵု ခမဳသၚ်တၠပညာမန် ညးဍုၚ်ကွာန်ဂကူမန်ပိုယ် ဂၠိုၚ်ကဵုကိုဋ်သၚ်ဃဲတအ် ဒးဒုၚ်ဂစိုတ်ကမၠက် ကၠုၚ်တုဲ သ္ၚိဌာန်ဍုၚ်ကွာန်မန်၊ လိက်ပတ်မန် မၞုံကုၚုဟ်မးတအ်လေဝ် ဒးဒုၚ်စံၚ်ပလီုကၠုၚ်ရ။
သၟိၚ်ဨကရာဇ်ဗၟာ၊ တၠအဝဵု အဆက်က်တအ် ပ္ဍဵုပ္ဍိုက်ကၠုၚ် ဂကူမန်ပိုယ်၊ စံၚ်ဒၟံၚ်သ္ၚိဌာန် ကွာန်မန်ပိုယ် စဵုကဵုတ္ၚဲဏံရောၚ် ဂွံဆဵုကေတ် ပြာပြာကတ်တ် ပ္ဍဲကဵုကွာန်ဓမ္မသဂှ် ကံၚ်ဇြဳဖေဝ်ဒရာဍုၚ်မန် သ္ဂးရ။
ဇၟာပ်တ္ၚဲဟံသာဝတဳလီု ရန်ကဵုသွက်ဂကူမန် မ္ဒးသၠးလဝ်လမျီုတံဂှ်တုဲ ကဵုဒါန်ဖာပ်သၚ် ပါ်ပရအ်ကုသဵု ဒှ်တ္ၚဲဒှ်လၞီ မွဲတ္ၚဲတုဲ မွဲအခိၚ် သွက်ဂွံကလေၚ်ဒက်ပ္တန်ဍုၚ်မန် မၞုံကဵုအခေါၚ်စၞောန်ပျးအုပ်ဓုပ်အပိုၚ်ဂှ် ဒှ်တ္ၚဲဖ္တိုက်ဖ္အောဝ်ကဵုဇြဟတ်မွဲတ္ၚဲရ။
ဥက္ကဌ ကမ္မတဳပရေၚ်အုပ်ဓုပ် ကံၚ်ဇြဳဖေဝ်ဒရာဍုၚ်မန် MSFC နာဲမန်သာၚ်ဂှ် ပ္ဍဲအရာဂ္စါန်ကလေၚ်ဒက်ပ္တန်ဍုၚ်မန် အပ္ဍဲကၟိန်ဍုၚ်ပံၚ်ကောံဖေဝ်ဒရာဂှ် ကောန်ဂကူမန်တံသီုဖအိုတ် ထေက်ကဵုဒးပါလုပ်ညးသ္ကအ်အိုတ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဒၞါဲဌာန်ဒေသတိုပ်သုက်ဇကု ဒၞါဲဂကူဇကု ဖျေံသ္ဇိုၚ်မံၚ်တန်တဴတံဂှ် အောန်အိုတ် တွဵုရးပိုယ်တံဂှ် ညံၚ်ဂွံဒက်ပ္တန် အပ္ဍဲကၟိန်ဍုၚ်ပံၚ်ကောံဖေဝ်ဒရာမာန် ဒးပ္တိတ်အာဇြဟတ်ဏောၚ်။ ပ္ဍဲကဵုဏံ ကောန်ဂကူမန်ပိုယ်တံသီုဖအိုတ် ထေက်ကဵုဒးပူဗိုၚ်ပါလုပ်ရ။ ပါလုပ် ပ္ဍဲပၠန်ဂတးဏံမာန်ရ။ သွက်အခေါၚ်ဗၠးၜးပိုယ်တံဂှ် ဒးရေၚ်တၠုၚ်အာ ပၠန်ဂတးဏံ နကဵုနဲကဲနာနာသာ်ဏောၚ်။ လုကဴပိုယ်တံ ဟွံဂွံအခေါၚ်စၞောန်ပျးအပိုၚ်မ္ဂး ဂကူမန်ဂှ်တှ်ေ ဒးကၠေံကၠက်အာ သိုက်က်ဂှ်လေဝ် ဒးဂွိၚ်တဴဗွဲတၟေၚ်ရ။ ဟိုတ်ဂှ်ရ အခိၚ်ကာလလၟုဟ်ဏံ သီုညးဖအိုတ်သွက်ဂွံပါလုပ်ကဵုအိုတ်ဂှ် မိက်ဂွံဖ္တိုက်ဖ္အောဝ်ရ” သာ်ဝွံ သ္ဂးရ။
ဂကူမန်သှ်ေဒၟံၚ်တံဂမၠိုၚ်ဝွံ ကြဴနူဟံသာဝတဳလီုတုဲ ဒးမံၚ်ကၠုၚ် သၟဝ်အုပ်ဓုပ်သၟိၚ်ဨကရာဇ်ဗၟာ သီုကဵုရဲသၠဲတိ ဂကူအၚ်္ဂလိက်၊ သီုသၟဝ်အုပ်ဓုပ်တၠအဝဵုပၞာန် နကဵုဘဝဍိက်ဂှ် ၂၆၀ သၞာံပြၚ်ကၠုၚ်ဂှ်ရ ဒးဆောံလေၚ်အာလဝ် အခေါၚ်စၞောန်ပျးအပိုၚ်တံရောၚ်ဂှ် နာဲမန်သာၚ် ထံက်ထ္ၜးလဝ်ရ။
မွဲလ္ပာ်ဂှ်ပၠန် အခိၚ်တိဍာ်ဒေသဇကု အခေါၚ်စၞောန်ပျးအုပ်ဓုပ်အပိုၚ်တံ ဒးဆောံလေၚ်အာသာ်ဏံဂှ် ဂကူမန် နူရးဨရာဝတဳကဵု ရးဗဂေါတံဂှ်လေဝ် ဒးဒုၚ်ကၠာဲအာ ဗၟာတုဲ သီုလိက်ပတ်ယေန်သၞာၚ် သက်သဳသာဓက ဂကူမန်နွံတန်တဴလဝ်တံဂှ်လေဝ် ဗွဲမဂၠိုၚ်ဂၠေၚ် ဒးကၠေံခၞၚ်အာအိုတ်ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ်လေဝ် အခေါၚ်ဗၠးၜး၊ အခေါၚ်အရာ၊ အခေါၚ်ဖန်ဖက် ကံကုသိုလ်ဇကုဇကု မဒးဆောံလေၚ်အာတံဂှ်ဝွံ အာတ်မိက်သဳကၠဳကေတ်ဟွံဂွံဂှ်ရ ပံၚ်ကောံတုဲ သွက်ဂွံဗ္တိုက် ကုပၞာန်ဗၟာတံ ညဳညဳသာသာအိုတ်ဂှ် ဖ္တိုက်ဖ္အောဝ်လဝ် ညးသၟတ်တံရ။
“မိက်ဂွံဟီု ကုညးဍုၚ်ကွာန်မန်တံသီုဖအိုတ်ဂှ်တှ်ေ အခေါၚ်အရာပိုယ်တံ ဒးဆောံအာလဝ် အခေါၚ်ဗၠးၜး အခေါၚ်အုပ်ဓုပ်ဖန်ဖက်ကေတ်တ်တံဂှ် အာတ်ကေတ်ဟွံဂွံပုဟ်။ သဳကၠဳကေတ် ဟွံဂွံပုဟ်၊ ဟီုဗီုမၞိဟ် ဟွံဂွံပုဟ်။ ကုက္ဍိုပ်သ္ကိုပ်ပၞာန် ဟီုဗီုမၞိဟ်ဟွံဂွံဏံဂှ် ပိုယ်တံ ပံၚ်တောဲတုဲ သ္ဂောံဗ္တိုက်ညဳညဳသာသာဂှ် ဒှ်အခိၚ်ခိုဟ်အခါပြဲရ။ ဟိုတ်ဂှ်ရ နကဵုညးသၟတ်ဂမၠိုၚ် လုပ်စိုပ်ဂကောံပၠန်ဂတးနာနာတံတုဲ နွံပၟိက် ဒးယိုက်ဂၠေၚ်တာလျိုၚ်ဏောၚ်” ဂှ် သ္ဂးရ။
သ္အာၚ်နူဂှ်ပၠန် ဂကူမန်သီုဖအိုတ် ပံၚ်တောဲညးသ္ကအ် ညဳညဳသာသာတုဲ ညံၚ်ဂွံစိုပ် တ္ၚဲဒက်ပ္တန်ဍုၚ်မန် မွဲတ္ၚဲ ဗွဲမပြဟ်မာန်ဂှ်ကီု ညံၚ်ပၠန်ဂတးဂွံတုဲဒှ်အာဗွဲမပြဟ်မာန် ပံၚ်တောဲထံက်ပၚ်ကဵုတုဲ သွက်ဂွံလုပ်အာပေါဲဗ္တိုက် ကုကံၚ်ဇြဳပၞာန် ဇြဟတ်ဍိုန်လျဒၟံၚ်ဂှ် ညးထပ်ဖ္တိုက်ဖ္အောဝ်လဝ်ရ။
ညးဍုၚ်ကွာန်ကောန်ဍုၚ်ဗၟာ ဒးဒုၚ်စသိုၚ်လဝ် နူကဵုတၠအဝဵုပၞာန်အဆက်က် မအုပ်ဓလီုရပ်ကၠုၚ်လဝ်ဇုက်တံဂှ်ဝွံ ကြက်ရှ်သာဒဳမဝ်ကရေဇြဳ ကောန်အရာပ်ဍက်က် အုပ်ဓုပ်လဝ်ဂှ် ပွိုၚ်မသုန်သၞာံဓဝ်ဟေၚ် ဂွံအခေါၚ်စမ်ရှ်တုဲ ဒးတုဲဒှ်အာလဝ် နကဵုပရေၚ်ပၞာန်သီအဝဵုကလေၚ်မွဲဝါပၠန် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ်ရ။
ဂကူဗၟာ ဒစဵုဒစးပၠန်ဂတးလဝ် ကုပၞာန်သီအဝဵုတံကီု ဇၟာပ်ပ်ကောန်ဂကူ မံၚ်တန်တဴဒၟံၚ်အပ္ဍဲဍုၚ်တံဂှ် ဂကောံပၞာန်တံ ရပ်ဒက်ပျဲပျာံ ဂစိုတ်ဂယိုၚ်လဝ် ကုညးဍုၚ်ကွာန်ဂမၠိုၚ် နကဵုနဲကဲ မကြမ်ကြယုတ်ဓဇန်တံဂှ်ဝွံ သက်သဳသာဓက ဂၠးတိတီညာတ် ကယျာန်ပါဲဟွံဂွံတံဂှ် နွံဒၟံၚ်ဗွဲမဂၠိုၚ်ဂၠေၚ်ရ။
ဣဏံဝွံ ပြဝအံၚ်ဇေယျကဵု ကောန်ရဲတဝ်ခွါဂမၠိုၚ် ဗ္တိုက်လဝ် ဂကူမန်တံ လောန်ကၠုၚ် အပ္ဍဲပွိုၚ်၂၆၀ သၞာံပြၚ်ဂှ်ကဵု ပြဝဂကောံပၞာန် သၟဝ်ပၠတရဴက္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ်ဝွံ ဟွံတၞဟ်ခြာကွေံပုဟ်ဂှ် သၟာပရေၚ်ပၠန်ဂတးမန်တံ ညာတ်လဝ်အိုတ်ရ။
ကံၚ်ဇြဳဖေဝ်ဒရာဍုၚ်မန်ဂှ် သွက်ဂွံဒက်ပ္တန်ဍုၚ်မန်အနာဂတ်ဂှ် သ္ဂောံကဵုပရေၚ်က္ဍိုက်ပ်ပရေၚ်ဍုၚ်ကွာန်မာန် ပလေဝ်ပလေတ်ဂ္စါန်ဒၟံၚ်တုဲ ညးဍုၚ်ကွာန်မန်အိုဿီုတံ သွက်ဂွံကလေၚ်ဒက်ပ္တန်ဍုၚ်မန်ဟံသာဝတဳ (တၟိ) မွဲမာန် ညးညးအဲအဲ ကေတ်တာလျိုၚ် ဒၞါဲညးကဵုညးတုဲ ဘိုၚ်ပူဗိုၚ်အာ ကရောံဂကောံဇြဟတ်ပၠန်ဂတးတံအိုတ်ညိဂှ် ဆဝ်ဗ္ၚုဟ်ဏာလဝ် ဗွဲမဇြိုဟ်နက်ရ။
ပရိုၚ်−သြၚ်လောန်တိုၚ်(မ်)
ဗီု−Voice TV