မတ်မလီု၊ မေ ၃၁
ၚုဟ်သြန်ဗၟာစှ်ေတုဲ ကြဴနူၚုဟ်သြန်ၝာတ်သေံ သၠုၚ်တိုန်ကၠုၚ်တုဲဂှ် ၚုဟ်ကပေါတ်ဗၞိက်သေံဂမၠိုၚ် ထ္ပက်တိုန်ကၠုၚ်ဒၟံၚ် အဆက်က်ရောၚ်ဂှ် သၟာဗၞိက်ပယျဵုတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂိတုမေ သတ္တာဟဒုတိယတေံ ၚုဟ်သြန်ၝာတ်သေံ မွဲၝာတ် ဗ္ဒါဲ ၁၀၀ ဒ္ကေဝ်နွံဂှ်ဝွံ ဂိတုမေ ၃၀ ဂှ် မွဲၝာတ် ၚုဟ်သၠုၚ်တိုန်ကၠုၚ် စဵုကဵု ၁၃၅ ဒ္ကေဝ် ဒှ်အာလဝ်ၚုဟ် ဟွံကေၚ်ဂဗမွဲလှ်ေရ။
ကရောံၚုဟ်ဒဝ်ဠာသၠုၚ်တိုန်ကၠုၚ်ဂှ် နူဍုၚ်ဗၟာ ပလံၚ်ပ္တိုန်ဗၞိက် လ္ပာ်ဍုၚ်သေံ ဟွံဂွံရတုဲ ၚုဟ်သြန်ၝာတ်သေံဝွံ ဒးဂဗဒၟံၚ်ကဵု အကာဲအရာၚုဟ်သၠုၚ်တိုန်ကၠုၚ်ရ။
ၚုဟ်သြန်ၝာတ်သေံ သၠုၚ်တိုန်ကၠုၚ်တုဲ ပ္ဍဲသ္ကုတ်ဂၠံၚ်သွံရာန်ဗၞိက် ပယျဵု သေံ−ဗၟာဂှ် ဟိုတ်နူဗြဲဂူတုဲ ဂၠံၚ်လီုက္တဵုဒှ်ဒၟံၚ်ဂှ်ရ ကပေါတ်ဗၞိက်လုပ်တုဲ ၚုဟ်ထ္ပက်တိုန်ကၠုၚ်ဒၟံၚ်ရ။
သၟာဗၞိက်ပယျဵုမွဲတၠဂှ် ၚုဟ်သြန်ၝာတ်သေံ သၠုၚ်တိုန်ကၠုၚ် ကဵုဆတုဲ ဒေါအ်ဇူလဝ် ပရေၚ်သွံရာန်တုဲ ဒးမၚ်ရံၚ်ဒၟံၚ် အကာဲအရာရောၚ်ဂှ် ဟီုရ။
“ဂၠံၚ်ကွဳစက်လၟုဟ်ဂှ်လေဝ် ကၟာတ်ဒၟံၚ်တုဲ ဂွံဒှ်ဒဒိုက် ဂၠိုၚ်နူဓမ္မတာဂှ်နွံတုဲ ပိုယ်တံတှ်ေ ဒးမၚ်ရံၚ်ဒၟံၚ်ဏီဏောၚ်။ ဟွံသွံရာန်မွဲသာ် မၚ်ရံၚ်အာ ၜိုတ်မွဲဂိတုဏီဏောၚ်။ သၟာဗၞိက် ဗွဲမဂၠိုၚ်ဂှ်တှ်ေ ပါဲနူကဵုမၞိဟ်ဟွံဒေါအ်ဟွံဂွံတံဂှ်တုဲ မၞိဟ်သှ်ေ ဗွဲမဂၠိုၚ်ဂှ်တှ်ေ ဒှ်ဒၟံၚ်အကာဲအရာ ဒးမၚ်ကျောဝ်အာရ” သာ်ဝွံ သ္ဂးရ။
ၚုဟ်သြန်ၝာတ်သေံ သၠုၚ်တိုန်တုဲ ဒၟါနူအခက်အခုဲ ပရေၚ်ပလံၚ်ဗစိုပ်ဂမၠိုၚ်တုဲ ကပေါတ်ဗၞိက်သေံဂမၠိုၚ်ဝွံ အပ္ဍဲဗွဝ်ဖျာဂှ် တန်တဴကဵု ဂကူအဇာတုဲ အောန်အိုတ် နူ ၃၀၀၀ ဒ္ကေဝ် စဵုကဵု ၁၀၀၀၀ ဒ္ကေဝ်ပြၚ် ၚုဟ်သၠုၚ်တိုန်ကၠုၚ်ဒၟံၚ်ရောၚ် ဂွံတီကေတ်ရ။
အတိုၚ်ဂလာန် သၟာဗၞိက်ပယျဵုတံဂှ်မ္ဂး အဟိန်ၚုဟ်သြန်ၝာတ်သေံ ဟွံညိၚ်ဝတ်ဂှ် ဟိုတ်နူအခက်အခုဲ ပရေၚ်ဆက်စၠောံဂၠံၚ်ဍာန်တုဲ အပ္ဍဲဒေသ ကပေါတ်ဗၞိက်သေံလ္ၚဵု ပိုတ်အိုတ်ဂှ်ကဵု ဘဲဒဏ်ၚုဟ်ဗၞိက်ဖျာက္ဍၚ်တံဂှ် ညးဍုၚ်ကွာန်တံ ထပ်ဒးဒုၚ်စသိုၚ်မာန်ရောၚ် သ္ၚဳဂၠိပ်ဒၟံၚ်တံ နွံဒၟံၚ်ရ။
ဍုၚ်ဗၟာဝွံ ဗၞိက်စၞစသိုၚ်သ္ဇိုၚ်၊ ဂဥုဲဇဗ၊ ဗၞိက်ပယျေဝ်၊ ဗၞိက်မၞိဟ်အရပ်စပ် ကေုာံ ကပေါတ်ဗၞိက်အရပ်စပ် သွက်ပရေၚ်သိုၚ်ခၞံတံ မပါလုပ် သီုကဵုကပေါတ်ဗၞိက်နာနာ နူဍုၚ်သေံတံဂှ် စွံအဓိကတုဲ ဒးပၠောပ်ပ္တိုန်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ