မတ်မလီု၊ ဂျောန် ၁
ပ္ဍဲကဵုပွိုၚ်ဍုၚ် မၞုံပ္ဍဲခရိုၚ်သဓီု တွဵုရးဍုၚ်မန် မပ္တံကဵုပွိုၚ်ဍုၚ်ကျာ်ထဝ်၊ ပွိုၚ်ဍုၚ်ၜဳကလေၚ် ကေုာံ ပွိုၚ်ဍုၚ်ပံၚ်တံဂှ် ဂွံယိုက်ဂၠေၚ်လျိုၚ်ပၞာန် ကော်မၞိဟ်ဟွံဂွံတုဲ ညးသၟတ်တၞီလုပ် ပ္ဍဲအာယုက်အပိုၚ်အခြာလုပ်ပၞာန်ဂွံတံဂှ် သွက်ဂွံလုပ်ရပ် စဵုကဵုအပ္ဍဲသ္ၚိဂှ် ပလေဝ်ပလေတ်ဒၟံၚ်ရောၚ် ဂွံတီကေတ် ဇရေၚ်ညးမစုက်လုက်ကဵု ကံၚ်ဇြဳပၞာန်တံရ။
သွက်တန်ဗ္တောန်ကွတ်ပၞာန် လၟေၚ် (၁) ကဵု လၟေၚ် (၂) ဂှ် အတိုၚ်လၟိဟ်မၞိဟ်စၟတ်လဝ်ဂှ် နူအရာပ်၊ နူကွာန် မဆေၚ်စပ်တံ ကဵုဟွံမာန်တုဲ ဂကောံကော်ကဵုယိုက်ဂၠေၚ်လျိုၚ်ပၞာန် ကံၚ်ဇြဳပၞာန် ကဆံၚ်ဗဟဵု ကဵုကၠုၚ်ဇြဟတ်ဂရိုဟ်တုဲ သွက်ဂွံလုပ်စိုပ်ရပ်ဒက်ဂှ် ပလေတ်ပလေတ်ဒၟံၚ်ရ။
အတိုၚ်ဂလာန် ညးမစုက်လုက်ကဵု ကံၚ်ဇြဳပၞာန်တံဂှ်မ္ဂး မွဲပွိုၚ်ဍုၚ်မ္ဂး သွက်မွဲမွဲလၟေၚ်ဂှ် စၟတ်လဝ် သ္ဒးကဵုမၞိဟ် ၅၀ တၟံကၠံကီုလေဝ် မွဲပွိုၚ်ဍုၚ် ၜိုတ် ၂၀ တၟံကၠံဂှ် ကဵုဟွံမာန်တုဲ စဳဇန်ကၠုၚ်သာ်ဏံရောၚ် သ္ဂးရ။
နကဵုညးစရၚ်ပါဒၟံၚ် သ္ဂောံယိုက်လျိုၚ်ပၞာန်တံဂှ် ထ္ၜးဟိုတ်နာနာ ပါဲဒလေတ်ကၠုၚ်နွံမ္ဂး သွက်ဂွံပံက်လဝ်ဂဗုတ်ဂှ်ကီု၊ ကုပူဂဵုရပ်ဂွံတံဂှ် သွက်ဂွံပလံၚ်ဗစိုပ် တန်ဗ္တောန်ကွတ်ပၞာန်တံ လွာဲဂှ်ဂှ် စၞောန်ပ္ညုၚ်လဝ်ရောၚ် ညးမစုက်လုက်ကဵုကံၚ်ဇြဳပၞာန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အခိၚ်လၟုဟ် ညးကံက်ဒးလဝ်မာဲ သွက်ဂွံလုပ်ပၞာန်တံဂှ်ကဵု ညးစရၚ်ယၟုပါလဝ်တံဂှ် အခိၚ်အာကော်စိုပ်ပ္ဍဲသ္ၚိ သ္ဂောံတိုန်ကွတ်ပၞာန်ဂှ် ဟွံမွဲပ္ဍဲသ္ၚိမွဲသာ် ဂြိပ်ဒဴပါဲဒလေတ်ဒၟံၚ်အိုတ်ဂှ်ရ ဂကောံအုပ်ဓုပ်ကံၚ်ဇြဳပၞာန်တံ ဒှ်ဒၟံၚ်အခက်အိုတ်ရ။
မွဲလ္ပာ်ဂှ်ပၠန်လေဝ် လ္ပာ်ဂကောံဇြဟတ်ပၠန်ဂတးတံ ကၠောန်ကၠုၚ်ဒၟံၚ် ပရေၚ်ၚးတး ကုညးပါလုပ်ရေၚ်တၠုၚ်ဒၟံၚ် ပ္ဍဲကိစ္စသ္ဂောံယိုက်လျိုၚ်ပၞာန်တံ အဆက်က်ဂှ်ရ ကောန်ဂကောံအုပ်ဓုပ်ကွာန်အရာပ်ဂမၠိုၚ်ဝွံ ဒးအောပ်မာမံၚ်တန်တဴဒၟံၚ်အိုတ်တုဲ ဒးဂဗဒၟံၚ်ကဵု အကာဲအရာ ဟွံဂွံလၟိဟ်အတိုၚ်စၟတ်လဝ် သွက်ဂွံယိုက်ဂၠေၚ်လျိုၚ်ပၞာန်တံဂှ်ရောၚ် ဂွံတီကေတ်ရ။
ညးချဳဒရာၚ်ကတိုၚ်ကၟဟ်ပရေၚ်ဒဳမဝ်ကရေဇြဳတံဂှ် နကဵုကံၚ်ဇြဳပၞာန် သွက်ဂွံယိုက်ဂၠေၚ်လျိုၚ်ပၞာန်ဂှ် ယဝ်ဟွံဂွံလၟိဟ်မၞိဟ် အတိုၚ်မစၟတ်လဝ်ဂှ်မ္ဂး ရပ်ဒက်ညးသၟတ်ဒေသ အာကၠုၚ်လ္တူဂၠံၚ်တံဂှ်တုဲ ပလံၚ်ဗစိုပ်ကၠုၚ် တန်ဗ္တောန်ကွတ်ပၞာန်တံမာန်ဂှ်ရ စွံသတိဗွဲတၟေၚ်တုဲ သွက်ဂွံအာကၠုၚ်မံၚ်စံၚ်အိုတ်ဂှ် ဖ္တိုက်ဖ္အောဝ်လဝ်ရ။
အတိုၚ်လိက်ဒုၚ်စဳရေၚ် ဂကောံမၚ်လ္ၚတ် ကေၚ်ကာဍုၚ်ဗၟာ ကေုာံ ပဋိပက္ခ BACS ဂှ်မ္ဂး သွက်တန်ဗ္တောန်ကွတ်ပၞာန် လၟေၚ် (၁) ကဵု လၟေၚ် (၂) ဂှ် ပ္ဍဲတွဵုရးဍုၚ်မန်ဂှ် ညးသၟတ်ဗ္ဒါဲ ၄၀၀ ဒးဒုၚ်ပကောံလဝ်ကောန်ပၞာန်တုဲ ဗွဲမဂၠိုၚ်ဝွံ ဒှ်ကောန်ကလောန်ဆုဲပြံၚ်တံဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−MOI