ကံၚ်ဇြဳပၞာန် ပ္တိတ်ဇြဟတ် သွက်ဂွံကၟာတ်ထောံ ပရေၚ်ရပ်စပ် Facebook

မတ်မလီု၊ ဂျောန် ၁

Facebook မၞိဟ်ရပ်စပ်ဂၠိုၚ်အိုတ် ပ္ဍဲဍုၚ်ဗၟာဂှ် ကံၚ်ဇြဳပၞာန် ကၟာတ်လဝ်ဂှ်ဝွံ စဵုကဵုရပ်စပ်ဟွံဂွံ ဂွံကၟာတ်ထောံမွဲတဲဓဝ်ဂှ် ထပ်ပ္တိတ်ကၠုၚ်ဇြဟတ်ရ။

ဇာဇၞိက်ပရေၚ်မၞိဟ် Facebook ဝွံ ပလှ်ဖျေံဒၟံၚ် အကံက်ပ္တောံ ပရေၚ်ဂကူတံကီု၊ ပလှ်ဖျေံဒၟံၚ် Post တံ နွံဂးတုဲ နကဵုဟိုတ်သာ်ဏံ ကံၚ်ဇြဳပၞာန်သီအဝဵု ကၟာတ်လဝ် Facebook အပ္ဍဲဍုၚ်ရ။

လ္ပာ်ကံၚ်ဇြဳပၞာန် ကၟာတ်လဝ် Facebook ကီုလေဝ် ညးဍုၚ်ကွာန်တံဝွံ သုၚ်စောဲဒၟံၚ် နကဵု VPN မကော်ဂး Virtual Private Network ရ။

ဒုၚ် VPN တုဲ သုၚ်စောဲဒၟံၚ် Facebook တံဂှ် သွက်ဂွံကၟာတ်ထောံဒတုဲတုဲ စနူဂိတုမေ ၃၀ တုဲ ကံၚ်ဇြဳပၞာန် ထပ်ကၟာတ်လဒဵု ထပိုတ်ကၠုၚ် VPN တံဂှ်ရ ညးဍုၚ်ကွာန်ဂမၠိုၚ် ဂွံသုၚ်စောဲ Facebook ဂှ် ဒှ်ကၠုၚ်အခက်အခုဲအိုတ်ရ။

ကိုဝ်မေန်လွေန်ဥူ ကမ္မတဳဗကပ်ဗဗေၚ်ခရိုၚ်ထဝါဲဂှ် ကၟာတ်လဒဵုထောံ ပွမသုၚ်စောဲ Facebook ဂှ်ဝွံ ကံၚ်ဇြဳပၞာန် ဝးပ္ကဝ်ဒၟံၚ် အခေါၚ်ဟီုဂးဗွဲမဗၠးၜး ကောန်ဍုၚ်မွဲမွဲတံဂှ်ကဵု ဝးပ္ကဝ်ဒၟံၚ် ၚုဟ်မးအစာံဒဳမဝ်ကရေဇြဳတံ မံက်က်ထေၚ်ၚ်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ဍေံတံ (စကစ) ဂှ် နူစသီအဝဵုတေံဂှ်လေဝ် ဂ္စါန်ကၟာတ်လဝ် မုက်လိက်ဇာဇၞိက်ပရေၚ်မၞိဟ်ဂှ်နွံ။ အဏံဂှ်လေဝ် အေန်တာနိတ်တံဂှ် ဒုၚ်ကဵု VPN တုဲ ပိုယ်တံ ရပ်စပ်ကၠုၚ်လဝ်ရ။ လၟုဟ်ဂှ် ဍေံတံကၠောန်ကၠုၚ် ဗက်ကၟာတ်အာ သီု VPN တံရ။ အေ ဂှ်တှ်ေ အခေါၚ်ဟီုဂးဗွဲမဗၠးၜး မၞိဟ်မွဲမွဲ ကောန်ဍုၚ်မွဲမွဲ၊ ၚုဟ်မးအစာံဒဳမဝ်ကရေဇြဳတံ၊ ၚုဟ်မးအစာံဂၠးတိတံဂှ်တှ်ေ ဝးပ္ကဝ်ဒၟံၚ် အခေါၚ်ဟီုဂးဗွဲမဗၠးၜးတံ မံက်က်ထေၚ်ၚ်ရ” သာ်ဝွံ သ္ဂးရ။

သ္အာၚ်နူဂှ်ပၠန် ကံၚ်ဇြဳပၞာန်ဝွံ ပ္ဍဲဗလးတိဏံ အခေါၚ်ဟီုဂးဗွဲမဗၠးၜးတံဂှ် ဝးပ္ကဝ်ဒၟံၚ် တၟံကၠံပေၚ်ၚ်တုဲ လၟုဟ်လေဝ် ကၟာတ် VPN တုဲ ညံၚ်ရပ်စပ် Facebook ဟွံဂွံ ကၠောန်ဒၟံၚ်ဂှ်ဝွံ မိက်ဂွံကၟာတ်လဒဵု အမှုရာဇဝတ်ဍေံတံ မဒှ်ရောၚ်ဂှ် ညးဆက်ဟီုရ။

ညးမၞုံအခေါၚ်ဟီုဂး ကံၚ်ဇြဳပၞာန် သ္ကိုပ်ဗိုလ်ဇြဝ်မေန်ထောန်ဂှ် ကၟာတ် Facebook တုဲ သွက်ဂွံထ္ပက်အဇာ ကုမဳဒဳယျာပရေၚ်မၞိဟ်မွဲမွဲဂှ် တၠပညာတံ၊ ဌာနဝန်ဇၞော်အပ္ဍဲဍုၚ် ပိတံ ပံၚ်တောဲတုဲ ကၠောန်ဒၟံၚ်ရောၚ် အပ္ဍဲဂိတုအဝ်ဂါတ် သၞာံ ၂၀၂၂ တုဲကၠုၚ်တေံ ဟီုလဝ် ဗွဲမကၠးဖ္ဍးရ။

ညးဍုၚ်ကွာန်မွဲတၠဂှ် လ္ပာ်ကံၚ်ဇြဳပၞာန် ယဝ်ရကၟာတ်ထောံ အခေါၚ်ရပ်စပ် Facebook တံဂှ်မ္ဂး ဇီုကပိုက်ကၠုၚ် သီုပရေၚ်ပိုန်ဒြပ်၊ ပရေၚ်မၞိဟ် ကေုာံ ပရေၚ်ပညာ ညးဍုၚ်ကွာန်ဒေသတံမာန်ဏောၚ်ဂှ် ဟီုလဴထ္ၜးလဝ်လညာတ်ညး သာ်ဏံရ။

“ဇၟာပ်ပ်မၞိဟ် ရပ်ဖုၚ်ဟီုဂှ် မိက်ဂွံသုၚ်စောဲ Facebook တုဲ ရပ်ဒၟံၚ်အိုတ်ရ။ Youtube တံ၊ Telegram တံ၊ Network သှ်ေတံဂှ်တှ်ေ စွံလက္ကရဴ။ ပြဟ်ဟ်ဏံ အဓိကပၟိက်ဇၞော်ဂှ်တှ်ေ Facebook ဏံရဏောၚ်။ ဟွံဂွံ Facebook ရပုဟ်ဟီုတှ်ေ ပရေၚ်ပိုန်ဒြပ်ပါဏောၚ်၊ ပရေၚ်မၞိဟ်ပါဏောၚ်။ ကောန်ၚာ်တံဟီုမ္ဂး ပရေၚ်ပညာပါကၠုၚ်ဏောၚ်။ သီုဖအိုတ်ဂှ် ဒးဗ္ဒဗ္ဒါဲဒၟံၚ် Facebook ဏံရဏောၚ်လေဝ်။ နကဵုညးဍုၚ်ကွာန်မွဲ ညအ်ဟွံဂွံရပုဟ်ဟီုမ္ဂး ကြေပ်လ္တူကြေပ် ဒှ်အာလ္ပာ်ပရေံယျ” သာ်ဝွံ သ္ဂးရ။

ညးမရပ်စပ် ဇာဇၞိက်ပရေၚ်မၞိဟ် Facebook ဗွဲမဂၠိုၚ်ဂှ်ဝွံ နူ Online မွဲကဆံၚ် ကၠောန်သ္ပပရေၚ်သွံရာန်တံကီု၊ လ္ၚတ်စပ်ကဵုပရေၚ်ပညာတံကီု၊ အကာဲအရာပရေၚ်ဍုၚ်ကွာန်၊ ပရေၚ်ပိုန်ဒြပ် မက္တဵုဒှ်ဒၟံၚ်လၟုဟ်တံဂှ် ဗွဲမဂတာပ်အခိၚ် ဂွံတီကေတ်မာန် ဒးသုၚ်စောဲဒၟံၚ်ရ။

ကံၚ်ဇြဳပၞာန် ကၟာတ်လဒဵုဒၟံၚ် Facebook ဂှ်ဝွံ အပ္ဍဲကာလသီအဝဵုပွိုၚ်ပိသၞာံပြၚ်ဏံ အလုံဍုၚ်မွဲ ပ္ဍဲကဵုပွိုၚ်ဍုၚ် ဗ္ဒါဲ ၉၀ ဂှ် ထပိုတ်လဝ် လာၚ်ဖုၚ် ကေုာံ လာၚ်အေန်တာနိတ်တံရောၚ် ဂကောံ(အသံ) လလောၚ်ပ္တိတ်လဝ် လိက်ဒုၚ်စဳရေၚ် ပ္ဍဲဂိတုမေ ၇ တုဲကၠုၚ်တေံရ။

အတိုၚ်တၚ်နၚ် ဂကောံ (အသံ) ဂှ်မ္ဂး နူသၞာံ ၂၀၂၁ စဵုကဵုသၞာံ ၂၀၂၄ ဂိတုမာတ်အိုတ်ဂှ် ပါဲနူလ္ဂုၚ်ကဵု နေဗျဳဒဝ်တုဲ ပ္ဍဲကဵုပွိုၚ်ဍုၚ် ကေုာံ တွဵုရးသှ်ေတံဂှ် ဒးဒုၚ်ထပိုတ်လဝ် လာၚ်ဖုၚ် ကေုာံ လာၚ်အေန်တာနိတ်တံတုဲ ပ္ဍဲကဵုဏံ  ရးသက်ကိုၚ်ကဵု တွဵုရးရခေၚ် ဂၠိုၚ်အိုတ် မဒှ်ရ။

ဟိုတ်ဍေံဂှ်တှ်ေ ပ္ဍဲကဵုဒေသ ပေါဲဗ္တိုက်သ္ကာတ်မြဟ်တံဂှ် ရပ်စပ်ဗျူဟာကံၚ်ဇြဳပၞာန် ထပိုတ်ပန်ထပိုတ်ဂှ်တုဲ သွက်ဂွံကၟာတ်လဒဵု တၚ်နၚ်ပရိုၚ်ဇွောဝ်စှ်ေ ဇရေၚ်ညးဍုၚ်ကွာန်ဒေသတံဂှ်မာန်ကီု၊ သွက်ဂွံထပိုတ်ထောံ အရာမဆက်စၠောံ ကုကမၠောန်ပရေၚ်ပၠန်ဂတးတံမာန်တုဲ နကဵုတၚ်ရန်တၟံနွံနွံ ဍဵုဍိုက်ဒၟံၚ်ရောၚ် ဂကောံ (အသံ) သ္ဂးလဝ်ရ။

ပ္ဍဲဍုၚ်ဗၟာ လၟိဟ်မၞိဟ် ၅၀ ပြကောဋိကိုဋ်ပြၚ်နွံဂှ် ညးမရပ်စပ် Facebook ဗ္ဒါဲ ၂၀ ပြကောဋိကိုဋ် နွံဒၟံၚ်ရောၚ် ဂွံတီကေတ် အတိုၚ်တၚ်နၚ် ဝါပ်သာ် DataReportal ရ။

ပရိုၚ်−သြၚ်လောန်တိုၚ်(မ်)

ဗီု−CJ