ကြုၚ်ဒဵု၊ ဨပရဴ ၃
ဟိုတ်နူဘဲဒဏ်ပၞာန်ကဵု ဘဲတိချဳတုဲ ညးဍုၚ်ကွာန် မဒှ်ဒၟံၚ်ဒဒိုက်တံဂှ် ဒပ်ကံၚ်ဇြဳပၞာန် ဟွံညှာတာမွဲသာ် ပ္ဍဲဂိတုဨပရဴ ၁ တေံ ပန်ပှော်ကၠုၚ်လွဟ်ဇၞော် ပ္ဍဲကဵုကွာန်ဒၞါဲညးဍုၚ်ကွာန်တံ မံၚ်စံၚ်တံဂှ်တုဲ ညးဗြဴမွဲတၠ ချိုတ်အာလဝ်ရောၚ် ခရိုၚ်ဒူပလာယာ KNU လလောၚ်ပ္တိတ်လဝ်ပရိုၚ်ရ။
ပ္ဍဲဂိတုဨပရဴ ၁ အခိၚ်ဇိုၚ်သဝ်တ္ၚဲ ၅ နာဍဳဝိုက်ဂှ် နူကဵုကုန်အမၠံက် ဒပ်တၟိ သၟဝ်တဲဒပ်ကံၚ်ဇြဳပၞာန် စကခ ၁၂ ဂှ် ပန်ခ္ဍိုၚ်နၚ် လွဟ်ဇၞော် ၁၂၀ မမ မသုန်မ အပ္ဍဲကွာန်ဝိဇ္ဇာကုန်း ဂကောံကွာန်(မြောက်ကြာအၚ်း) ပွိုၚ်ဍုၚ်ကြုၚ်ဒဵု ဒပ်မဟာ ၆ ခရိုၚ်ဒူပလာယာဂှ်ရောၚ် သ္ဂးလဝ် ပ္ဍဲတၚ်လလောၚ်တြးဂှ်ရ။
ဟိုတ်နူဒပ်ကံၚ်ဇြဳပၞာန် ပန်ပှော်ကဵုလွဟ်ဇၞော်တုဲ ညးဗြဴမွဲတၠ အာယုက် ၅၇ သၞာံ ဒၟံၚ်ကွာန်ဝိဇ္ဇာကုန်းဂှ် ယဲကောန်တၟအ်က္တဵု ဒေါမ်စှ်ေအာတုဲ ဟိုတ်နူဘဲဝပ် ဇီုဒးခုၚ်ဍိုတ်တုဲ ဒးချိုတ်အာလဝ်ရောၚ် ပါလုပ် ပ္ဍဲတၚ်လလောၚ်တြးဂှ်ရ။
ဟိုတ်နူဘဲဒဏ်သဘာဝ ကေုာံ ဘဲဒဏ်ပၞာန်တံဂှ်တုဲ ညးဍုၚ်ကွာန်အလုံဍုၚ်မွဲ ဒးဆောံလေၚ်လဝ် လမျီုပိုန်ဒြပ်ဂမၠိုၚ်တုဲ အခိၚ်ဒှ်ဒၟံၚ်ဒဒိုက်ဂှ် ဒပ်ကံၚ်ဇြဳပၞာန် ဟွံမွဲကဵုပရေၚ်ဗ္စာရဏာမွဲသာ် စမြိုၚ်သာသနာ ရုၚ်ဂဥုဲဗ္ဒမ်ဂဥုဲညးဍုၚ်ကွာန် ဘာဗ္တောန်လိက် ကေုာံ ဒၞါဲညးဍုၚ်ကွာန်ကောန်အရာပ်တံ မံၚ်တန်တဴ မဒှ်ပွန်ပရေၚ်ပၞာန်ဟွံသေၚ်တံဂှ်လေဝ် ဗ္တိုက်ပန်ပှော်ဒၟံၚ် နကဵုတၚ်ရန်တၟံနွံနွံရောၚ် ခရိုၚ်ဒူပလာယာ KNU သ္ဂးရ။
ပ္ဍဲကဵုကွာန်ခယဲ ပွိုၚ်ဍုၚ်ကျာ်ထဝ် တိဍာ်ဒပ်မဟာ ၁ KNU ဂှ်လေဝ် တုဲကၠုၚ်ပ္ဍဲဂိတုမာတ် ၂၉ တေံ ဒပ်ကံၚ်ဇြဳပၞာန် ပန်ပှော်လဝ် နကဵုလွဟ်ဇၞော်တံဂှ်တုဲ ကောန်ကွာန်ဒေသမွဲတၠ ဇီုကပိုက်ဒးအာဝပ်တုဲ ပ္ဍဲဂိတုဨပရဴ ၁ ဂှ်လဝ် ဒပ်ကံၚ်ဇြဳပၞာန် ကၠုၚ်စိုပ်ထောံဏာလဝ်မခတိုဟ် ၂ မ နကဵုက္ၜၚ်ကျာ ပ္ဍဲကဵုကအ်ကြိက် သ္ကုတ်သၠုၚ်ကျာ တိဍာ်ဒပ်မဟာ ၆ KNU ဂှ်ရောၚ် ဂွံတီကေတ် ဇရေၚ်တမ်ရိုဟ်ပရိုၚ် အပ္ဍဲဒေသတံရ။
ဟိုတ်နူဘဲအန္တရာယ်တိချဳတုဲ အခိၚ်ညးဍုၚ်ကွာန်ဂမၠိုၚ် ဒှ်ဒၟံၚ်ဒဒိုက်နာနာဂှ် ဒပ်ကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာ ပ္ဍဲဒေသဒပ်ပၠန်ဂတးတံ မထိၚ်ဒက်လဝ်ဂှ်တုဲ ပန်ပှော်ဒၟံၚ် နကဵုလွဟ်ဇၞော် ဟွံပိုတ်သ္ကုတ်တုဲ ပ္ဍဲတိဍာ် KNU ထိၚ်ဒက်ဂှ်လေဝ် ပန်ပှော်ဗ္တိုက်ဒၟံၚ်တံ နွံရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−KNU