ဒးမံင်ဘဲဒဏ်တိချဳကီုလေဝ် ဆက်ဗ္တိုက်ပၞာန်ဏောၚ် က္ဍိုပ်သ္ကိုပ်ပၞာန် ခၠေဝ်ကၠုၚ်

နေဗျဳဒဝ်၊ ဨပရဴ ၃

ပ္ဍဲဍုၚ်ဗၟာ ကသဳတိ ဇြဟတ်ဇၞော်မွဲ ချဳဇတဝ်အာတုဲ အခိၚ်ဒးဆေၚ်ဒၟံၚ်မုက်ကဵု အကြေပ်အဂြတ်ဂမၠိုၚ် ဍုၚ်သ္အာၚ်တံလေဝ် အခိၚ်ဖ္တိုက်ဖ္အောဝ်ဒၟံၚ် သွက်ဂွံဒေါအ်ပရေၚ်ဗ္တိုက်တံဂှ် က္ဍိုပ်သ္ကိုပ်ပၞာန်ဂှ်တှ်ေ ဆက်ကၠောန်အာပရေၚ်ပၞာန်တံဏောၚ် ခၠေဝ်ကၠုၚ်လဝ်ရ။

နကဵုဂကောံရပ်လွဟ်ကောန်ဍုၚ်အရၚ်လ္ၚဵုတံ ပ္ဍဲအကာဲအရာလၟုဟ် ထ္မံက်ကၠုၚ်ပေါဲဗ္တိုက် ဟွံမွဲကီုလေဝ် သ္ဂောံကၠောန်ပရေၚ်ဗ္တိုက်တံဂှ် ပကောံဒပ်၊ ပ္ကတ်ပ္ကေၚ်ပလေဝ်ပလေတ်တံ ကၠောန်ၜိုတ်ဒၟံၚ်ရောၚ် ပ္ဍဲဂိတုဨပရဴ ၁ တေံ ဟီုရ။

ကၠောန်ဒၟံၚ်သာ်ဏံဂှ်ဝွံ တုပ်တဴညံၚ်ရဴဗ္တိုက်ဒၟံၚ်ရဏောၚ်ဂှ်ရ နကဵုဒပ်ပၞာန် ဆက်ရေၚ်တၠုၚ်အာ ကမၠောန်စပ်ကဵုပရေၚ်စဵုဒၞါ မနွံပၟိက်တံဂှ်ဏောၚ်ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုဂးလဝ်ရ။

ဂကောံမဟာမိတ်ကောဒေံပိဂကောံ MNDAA, TNLA, AA တံဂှ်တှ်ေ သွက်ဂွံရေၚ်တၠုၚ်ကမၠောန်ဟံၚ်ပြာ်ဘဲတိချဳတံမာန် သွက်ဂွံရေၚ်တၠုၚ် ဗွဲမစိုပ်တရဴ ဗွဲမပြဟ်မာန်ဂှ် ဒၞါဲပေါဲဗ္တိုက်ဒှ်ဒၟံၚ်တံဂှ် ကၠောန်သ္ပအာပၞာန်ထ္ပက်တံဟွံသေၚ်တုဲ အပ္ဍဲဂိတုဨပရဴပွိုၚ်မွဲဂိတုဏံ လလောၚ်တြးလဝ် ဒေါအ်ပန်ပှော်မွဲလ္ပာ်ဓဝ် ပ္ဍဲဂိတုဨပရဴ ၁ အခိၚ်ဗ္တံဂှ်ရ။

လအာတုပ်သာ်ဂှ်ကီု အလဵုအသဳညဳသၟဟ်ဂကူ NUG ဂှ်လေဝ် လလောၚ်တြးလဝ်ဒေါအ်ပန်ပှော် ပွိုၚ်ၜါသတ္တာဟတုဲ က္ဍိုပ်သ္ကိုပ်ပၞာန်ဂှ်တှ်ေ ရုဲစှ်လဝ် သ္ဂောံသောၚ်ကလးပြဒ္ဒညာ နကဵုနဲကဲပကီုပရာပ်ဂှ်ရ နကဵုဒပ်ပၞာန် ဆက်ကၠောန်အာ အတိုၚ်လၟေၚ်ကမၠောန် မဖျေံစၟတ်လဝ်ဂှ်ဏောၚ် သ္ဂးရ။

ဣဏံဝွံ အခိၚ်ညးဍုၚ်ကွာန်ဒးဘဲတိချဳတံ ဒှ်ဒၟံၚ်ဒဒိုက်ဂှ် ညးချဳဒရာၚ်ကတိုၚ်ကၟဟ်ပရေၚ်ၜိုဟ်လလမ်တံကီု ညးစၞးဂကောံအလဵုအသဳဍုၚ်သ္အာၚ်တံကီု စပ်ကဵုစၟဳစအာတ်မိက်ကၠုၚ် ပ္ဍဲဍုၚ်ဗၟာ ဒေါအ်ပန်ပှော်တုဲ သွက်ဂွံစွံအာရီု လ္တူကမၠောန်ဟံၚ်ပြာ် ကေုာံ သွက်ဂွံကၠောန် ဒဵုကဵုပရေၚ်ၜိုဟ်လလမ်ဂှ်တုဲ က္ဍိုပ်သ္ကိုပ်ပၞာန် တးပါဲလဝ်ရ။

အတိုၚ်တၚ်နၚ် ဂကောံသုတေသနဗၠးၜ ဂကောံသုတေသနညာန်လေန်တေတ်ဂှ်မ္ဂး ပ္ဍဲဂိတုမာတ် ၂၈ တ္ၚဲတိချဳဇၞော်ကဵုဇြဟတ် က္တဵုဒှ်လဝ်ဂှ် ကံၚ်ဇြဳပၞာန် ကၠောန်သ္ပချဳဒရာၚ်ကၠုၚ်ပရေၚ်ပၞာန်တုဲ စွံကၠုၚ်လဝ်ပွန် လ္တူကောန်အရာပ်တံဂှ်ရောၚ် သ္ဂးရ။

အတိုၚ်စရၚ် နူဂိတုမာတ် ၂၈ စဵုကဵုဂိတုမာတ် ၃၀ ဂှ်မ္ဂး ဟိုတ်နူပရေၚ်ဗ္တိုက်ပၞာန် ကေုာံ လွဟ်ဇၞော် ပါလုပ်သီုကဵုက္ဍိုၚ်ကျာ စုတ်လဝ်စက်တံဂှ်တုဲ ကောန်အရာပ် ပန်တၠ ဒးချိုတ်အာတုဲ ၁၂ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်နၚ်ဂမၠိုၚ်ရ။

တုဲကၠုၚ် ပ္ဍဲဂိတုဨပရဴ ၁ တေံဂှ်လေဝ် ရေၚ်ယာန်ကွဳစက် ၉ ဖ္ဍိုက် နူကဵုဂကောံဇိုၚ်ခ္ဍာ်ဍုၚ်ကြုက် မယိုက်နၚ်ကပေါတ်ထံက်ပၚ်ဂှ် ဒပ်ကံၚ်ဇြဳပၞာန် ပန်ဏာလဝ် ပ္ဍဲကွာန်အုမ္မတဳ ပွိုၚ်ဍုၚ်နံၚ်ချဵုရ။

စပ်ကဵုပရေၚ်ဏံတုဲ ညးမၞုံအခေါၚ်ဟီုဂးကံၚ်ဇြဳပၞာန် သ္ကိုပ်ဗိုလ်ဇၞော်ဇြဝ်မေန်ထောန်ဂှ်တှ်ေ အခိၚ်တာဒၞါ ရေၚ်ယာန်ကွဳစက်ဏံဂှ် ဟိုတ်နူဟွံဒေါအ်တုဲ ပန်ပစူဏာလဝ်သေနာတ် လ္တူအကး ပိတဲဂှ် ပ္ဍဲဂိတုဨပရဴ ၂ ဂှ် ဒုၚ်ဝန်ဟီုလဝ်ရ။

ပရိုၚ်−သြၚ်လောန်တိုၚ်(မ်)

ဗီု−MRTV