မတ်မလီု၊ ဨပရဴ ၃
အလုံဍုၚ်မွဲ ပ္ဍဲကဵုဒၞါဲဒေသ ၆ ဂှ် ဒးဒုၚ်စသိုၚ်ဒၟံၚ်ဘဲဒဏ်တိချဳ ဇၞော်ကဵုဇြဟတ်တုဲ ပရေၚ်ဇီုကပိုက်လီုလာ်တံကဵု ပရေၚ်မၞိဟ်ချိုတ်တံ အခိၚ်သၠုၚ်တိုန်ဒၟံၚ်ဂှ် ထဝ်ဒကောၚ်မဳဠေန်အပ္ဍဲဍုၚ် မွဲဒ္ကေဝ်ဂှ် သၠုၚ်တိုန်ကၠုၚ် စဵုကဵု ၇၀ ကိုဋ်ဒ္ကေဝ်ရောၚ် တၠကမၠောန်ထဝ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်ထဝ်ဝွံ ကၠာဘဲတိချဳဏံ ဟွံဂွံဒှ် ပ္ဍဲဂိတုမာတ် ၂၇ တေံဂှ် ထဝ်ဒကောၚ်မဳဠေန် မွဲဒ္ကေဝ်ဂှ် နွံလဝ် ၜိုတ် ၆၉ ကိုဋ်ဒ္ကေဝ်တုဲ ပ္ဍဲဂိတုဨပရဴ ၂ ဂှ် ၚုဟ်သၠုၚ်တိုန်ကၠုၚ် စဵုကဵု ၇၀ ကိုဋ်ဒ္ကေဝ်ရ။
ၚုဟ်ထဝ်အပ္ဍဲဍုၚ် သၠုၚ်တိုန်ကၠုၚ်ဂှ်ဝွံ ဒှ်ဟိုတ်နူၚုဟ်ထဝ်ဂၠးတိ သၠုၚ်တိုန်ကၠုၚ်တုဲ မွဲလ္ပာ်ဂှ်ပၠန်လေဝ် ဟိုတ်နူဖေက်ဘဲဒဏ်သဘာဝတုဲ ရာန်ပကောံကၠုၚ်ထဝ် ဂၠိုၚ်ကၠုၚ်ဂှ်ရောၚ် တၠကမၠောန်ထဝ်ဂမၠိုၚ် ဟီုရ။
“ဗွဝ်ဖျာဇၞော် အဓိက နွံၜါ။ လ္ဂုၚ် ကဵု မာန္တလေဝ်။ ဗွဝ်ဖျာမာန္တလေဝ်ဂှ်လေဝ် ကၟာတ်ဒၟံၚ်။ ဗွဝ်ဖျာလ္ဂုၚ်ဏံဂှ်လေဝ် တိထပ်ချဳကၠုၚ်မာန်ဏောၚ်။ လဗိုတ်ကျာဂှ်လေဝ် ထပ်ကၠုၚ်မာန်ဏောၚ် အခိၚ်ဟီုဒၟံၚ်ဂှ် မၞိဟ်တံဂှ်တှ်ေ သွံကၠုၚ်ခဒမ်ညးတံ၊ ကောန်ဒိုဝ်ညးတံတုဲ ရာန်ထောံလဝ်ထဝ်။ ယဝ်ဒှ်ကၠုၚ်မွဲမွဲမ္ဂး မိန်စိုက်ထဝ်တုဲ ဂြိပ်ညးသ္ကအ်ဏောၚ် ထေၚ်ကေတ်သာ်ဏံရ” သာ်ဝွံ တၠကမၠောန်ထဝ်မွဲတၠ ဟီုရ။
ၚုဟ်ထဝ်ဂၠးတိဂှ်လေဝ် ကၠာဘဲတိချဳဟွံဂွံဒှ်ဏံ ထဝ်မွဲအံက်သ နွံကၠုၚ်လဝ် ၜိုတ် ၃၀၇၀ ဒဝ်ဠာဓဝ်ဂှ် ပ္ဍဲဂိတုဨပရဴ ၂ ဂှ် ၚုဟ်သၠုၚ်တိုန်ကၠုၚ် စဵုကဵု ၃၁၂၀ ဒဝ်ဠာတုဲ ၚုဟ်ထဝ်အပ္ဍဲဍုၚ် သာတုဲသ္ဂောံသၠုၚ်တိုန်ကၠုၚ်နွံဂှ် တၠကမၠောန်ထဝ်ဂမၠိုၚ် သ္ဂးရ။
ၚုဟ်ထဝ်အပ္ဍဲဍုၚ် သၠုၚ်တိုန်ကၠုၚ်ကီုလေဝ် အပ္ဍဲဗွဝ်ဖျာထဝ်ဂၠးတိဂှ်တှ်ေ နကဵုညးဟွံမိက်ဂိုၚ်စွံသြန်အပ္ဍဲတဲဂမၠိုၚ် ရာန်ပကောံကၠုၚ်ထဝ် နွံဒၟံၚ်တုဲ ဌာနမဆေၚ်စပ် နူကံၚ်ဇြဳပၞာန်တံဂှ်လေဝ် ကၠုၚ်စိုပ်မၚ်ရံၚ်ဒၟံၚ်တံ နွံဒၟံၚ်ရောၚ် ဂွံတီကေတ်ရ။
အတိုၚ်ၚုဟ်စၞောန် နူကဵုကမ္မတဳခုတ်ပ္တန်ၚုဟ်ထဝ် ကံၚ်ဇြဳပၞာန် ပ္ဍဲဂိတုဨပရဴ ၂ တေံဂှ်မ္ဂး ထဝ်ဒကောၚ်မဳဠေန် မွဲဒ္ကေဝ်ဂှ် ခုတ်လဝ် ၅၆ ကိုဋ်ဒ္ကေဝ်တုဲ ယဝ်ဒးၜတ်ကၞာတ်ကဵုဗွဝ်ဖျာမ္ၚးမ္ဂး ဍေံတၞဟ်ခြာမံၚ် ၁၄ ကိုဋ်ပြၚ်ရ။
ပ္ဍဲဍုၚ်ဗၟာဂှ်တှ်ေ ၚုဟ်ထဝ်အပ္ဍဲဍုၚ်ဂှ်ဝွံ ပ္ဍဲလက်ထက်အလဵုအသဳကၠာတေံ ထဝ်ဒကောၚ်မဳဠေန်မွဲဒ္ကေဝ်ဂှ် နွံကၠုၚ် ပွဳပွူ ၁၃ ကိုဋ်ဒ္ကေဝ်တုဲ ကြဴနူဒပ်ပၞာန်သီအဝဵုတုဲ ၚုဟ်ထဝ်တိုန်ကၠုၚ် မသုန်ဆပြၚ်တုဲ ၚုဟ်ထဝ်ဟွံညိၚ်ဝတ်တံလေဝ် က္တဵုဒှ်ဒၟံၚ် အရိုဟ်ဒဒှ်တ္ၚဲရ။
ပရိုၚ်−သြၚ်လောန်တိုၚ်(မ်)
ဗီု− CJ