သေတ်တိုဲ၊ ဂျောန် ၇
ပ္ဍဲသတ္တာဟတုဲကၠုၚ်တေံ ဒပ်ကံၚ်ဇြဳပၞာန် လုပ်စိုပ်ဍိုက်ဗ္တိုက် ကွာန်ဗျာၚ်ဖျူ တွဵုရးရခေၚ်ဂှ်တုဲ ပြိုက်ဂစိုတ်ထောံလဝ် ကောန်ကွာန် ၅၀ ပြၚ်ရောၚ် ဂကောံရပ်လွဟ်တံကဵု ကောန်ကွာန်ဂမၠိုၚ် ဟီုလဝ်ရ။
ကောန်ကွာန်ဂမၠိုၚ်ဝွံ ဒးဒုၚ်ဍဵုဍိုက်ပျဲပျာံလဝ် ပွိုၚ်ၜါတ္ၚဲကဵုမွဲဗ္ဂါပ်တုဲ ကောန်ပၞာန်တံဂှ်တှ်ေ ကၟာတ်လဝ်မတ်ကောန်ကွာန်ဂမၠိုၚ် နကဵုယာတ်တုဲ ၜုၚ်တက်လဝ်တုဲ ညံၚ်စၞာံဇကု ဂွံတဴ စဝ်ကဵုကၠေၚ်ဓာတ် စံၚ်လဝ်ရောၚ် ညးဂွံညာတ်ကဵုနမတ်တံ ဟီုလဝ်ကဵု BBC ရ။
ကောန်ပၞာန်တံဂှ် သီုကဵုသုၚ် ဍာ်တရဴသၟတ်ဍေံတံဂှ်လေဝ် ညးဂွံညာတ်နမတ်တံ ဟီုလဴထ္ၜးလဝ်ရ။
ဒပ်ပၞာန်တံဏံ အာဂၠါဲလဝ် ညးထံက်ဂလာန် ဒပ်ပၞာန်ရခေၚ် AA မဒှ်ဒပ်ရပ်လွဟ် မၞုံကဵုအစောံစရာဲဗ္တိုက်ခိုဟ်အိုတ် ပ္ဍဲဍုၚ်ဗမာဏံဂှ်ရောၚ် ဂွံတီကေတ်ရ။
ကံၚ်ဇြဳပၞာန် ပျဲပျာံ ပြိုက်ဂစိုတ်ထောံလဝ် မၞိဟ်အကြာ အာယုက် ၁၅ ကဵု ၇၀ သၞာံ ၅၁ တၠဂှ် NUG လလောၚ်ပ္တိတ်လဝ် တၚ်လလောၚ်တြးရ။ AA ဂှ်တှ်ေ လၟိဟ်ညးဒးဒုၚ်ပြိုက်ဂစိုတ်ဂှ်ဝွံ ၇၀ ပြၚ်ဒၟံၚ်ရောၚ် ချိၚ်ခယျလဝ်ရ။
ပၞောဝ်ကဵုပရေၚ်ဂစိုတ်ဂယိုၚ်နဂအုံဗွဝ် ပရေံအိုတ် အပ္ဍဲပၞာန်အပ္ဍဲဍုၚ် ပွိုၚ်ပိသၞာံပြၚ်ဏံဂှ် ဒဒှ်မပြိုက်ဂစိုတ်မၞိဟ် ပရေၚ်ဏံဂှ်ဝွံ ညးမၞုံအခေါၚ်ဟီုဂးကံၚ်ဇြဳပၞာန် သ္ကိုပ်ဗိုလ်ဇြဝ်မေန်ထောန် တးပါဲလဝ်ရ။
ကောန်ဒပ် AA တံ နွံပ္ဍဲကွာန်ဟာ ဒဒှ်ရကောန်ပၞာန်ဂမၠိုၚ် သၟာန်လဝ်ကောန်ကွာန်တံဂှ် ညးဗြဴမွဲတၠ ကလေၚ်လဴထ္ၜးလဝ်ရ။
သာ်လဵုသှ်သှ် AA တံ နွံပ္ဍဲကွာန်ဟာ၊ ဟွံမွဲဟာ ညးတံဟွံတီပုဟ်ဂှ် သာ်လဵုသှ်သှ် ကောန်ပၞာန်တံဂှ် ၜုၚ်တက်လဝ် ကောန်ကွာန်ဂမၠိုၚ်ရောၚ် ညးဗြဴဂှ် လဴထ္ၜးလဝ်ရ။
ကော်ပ္တိုန်ဏာ တၠသ္ၚိညး လ္တူကွဳစက်ပၞာန်ဂှ် အလဵုညး ဂွံညာတ်လဝ်ဂှ်ကီု၊ စွံလဝ်ကောန်ဗၠာဲညး ဗွဲတၞဟ်ခြာ နူကဵုမိမၜါဂှ်ကီု၊ ကောန်ကဵု တၠသ္ၚိညး ချိုတ်အာယျဟာ ဂျိုၚ်ဒၟံၚ်ဏီဟာ ဒဒှ်ရဟွံတီကေတ်ဏီဂှ်လေဝ် ညးဗြဴဂှ် ထပ်ဟီုလဝ်ရ။
ကွာန်ဗျာၚ်ဖျူ သ္ၚိ (၁၀၀၀) ပြၚ် နွံဂှ် ဇၟာပ်မၞိဟ် ကဵုတိတ်မ္ၚး စဲလဝ်တ္ၚဲတုဲ မၞိဟ်တြုံတံဂှ်တှ်ေ ကၟာတ်လဝ်မတ်ကဵုယာတ်တုဲ လ္ၚဵုတံဂှ် ကော်ဏာလဝ် နကဵုကွဳစက်ပၞာန်ရောၚ် ကောန်ကွာန်ဂမၠိုၚ် ဟီုတဴရ။
ကောန်ကွာန် နူကဵုကောန်ပၞာန်တံ ကော်ဏာတံဂှ် ချိုတ်ဟာ၊ ဂျိုၚ်ဟာ ဟွံဂွံတီကေတ်ဏီပုဟ်ဂှ် ကောန်ကွာန်ဂမၠိုၚ် သ္ဂးရ။
ဇွကောန်ကွာန် ဍေံတံဂစိုတ်ထောံလဝ်တံဂှ် ကဵုကောန်ကွာန်သှ်ေဒၟံၚ်တံ တိုပ်လဝ်တိဂှ် ဂွံတီကေတ်ရ။
ကွာန်ဗျာၚ်ဖျူ နွံမံၚ်မ္ၚးဍုၚ်သေတ်တိုဲဂှ် ကောန်ပၞာန် နကဵုဇြဟတ် ၁၀၀ ပြၚ် လုပ်ဍိုက်ဗ္တိုက်လဝ် ပ္ဍဲဂိတုဂျောန် ၅ တေံရ။
Ref: BBC