မာန္တလေဝ်၊ ဂျောန် ၈
ပ္ဍဲထံၚ်မာန္တလေဝ် ယၟုဒယှ်ဒၟံၚ် နကဵုပရေၚ်ဝးပ္ကဝ်အခေါၚ်အရာမၞိဟ်၊ ဍဵုဍိုက်လ္တူကောန်ထံၚ်တံဂှ် ကောန်ထံၚ်ဂမၠိုၚ် က္တဵုဒှ်ဒၟံၚ်ယဲခၞော်စော် နကဵုဂအုံဗွဝ်နွံဒၟံၚ်ရောၚ် ဂွံတီကေတ် ဇရေၚ်ဇာဇၞိက်ကောန်ထံၚ်ပရေၚ်ဍုၚ်ကွာန် အလုံဍုၚ်ဗၟာ PPNM ရ။
ထံၚ်မာန္တလေဝ်ဝွံ ဒှ်ထံၚ် စုတ်ကော်ထံၚ် ဗၞတ် ၃၀၀၀ ဂွံမွဲတုဲ ကြဴနူသီအဝဵု သၞာံ ၂၀၂၁ တုဲ ဒၟါနူကံၚ်ဇြဳပၞာန် ရပ်ဒက်ဟွံဗဗွဲကဵုသၞောဝ်တံဂှ်တုဲ သီုကောန်ထံၚ်ပရေၚ်ဍုၚ်ကွာန်တံ မပါလုပ် ကောန်ထံၚ် ၅၀၀၀ ပြၚ်ဂှ် ရပ်ထိၚ်လဝ်ရ။
ပ္ဍဲထံၚ်စာတ်လၟုဟ်ဂှ် ပ္ဍဲဗ္ဒမ် စွံကၠုၚ်လဝ် ကောန်ထံၚ် ၜိုတ် ၅၀ ဓဝ်တံဂှ် ကရေပ်စုတ်လဝ် လၟိဟ်မၞိဟ်ဗ္ဒါဲ ၁၀၀၊ ၁၅၀ တုဲ ပ္ဍဲကဵုဗ္ဒမ် ထပ်ကၠတ်နွံတံဂှ် သိက်စုတ်လဝ် စဵုကဵု ၂၀၀ ရောၚ် PPNM သ္ဂးရ။
ကိုဝ်တိုက်ထောန်ဥူ ညးမၞုံအခေါၚ်ဟီုဂး ဇာဇၞိက်ကောန်ထံၚ်ပရေၚ်ဍုၚ်ကွာန် အလုံဍုၚ်ဗၟာ PPNM ဂှ် ကောန်ထံၚ်ဂမၠိုၚ်ဝွံ ဒးတိက်ဒၟံၚ် အကြာမွဲပေဘာ်ကဵု ထပှ်ပေ ၜိုတ်ဒၞါဲညးစွံ မၞိဟ်ချိုတ်တ်တံဓဝ်ဂှ်ရ တုပ်တဴညံၚ်ရဴ ဂျိုၚ်ညံၚ်ကဵုချိုတ်ဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဥပမာ ကောန်ထံၚ်ပရေၚ်ဍုၚ်ကွာန်ပိုယ်တံလၟုဟ် ဒးတိက်ဒၟံၚ် ၜိုတ်ဒၞါဲညးစွံကဠာဇွတံဂှ်ဓဝ်ရဏောၚ်။ ဒးဟီုမ္ဂး တုပ်တဴညံၚ်ရဴ ဂျိုၚ်ညံၚ်ချိုတ်ဒၟံၚ်ကီု ဒၞါဲဂွံဂှ် ဒးကြေပ်တိက်ဒၟံၚ် ၜေတ်တ်ကြေပ်ပ်အိုတ်ရ” သာ်ဝွံ သ္ဂးရ။
ဟိုတ်ဂှ်ရ ကောန်ထံၚ်ဂမၠိုၚ်ဝွံ အခိၚ်တိက်ဗ္တံ မွဲကဵုမွဲ ကြပ်ဍိုက်ဒးဒၟံၚ်ညးသ္ကအ် ဒးတိက်ဒၟံၚ်တုဲ ဘဲဒဏ်ကတဴ အခိၚ်ကညၚ်ဂှ်လေဝ် ဒးဒုၚ်စသိုၚ်လဝ် ဗွဲမသ္ကာတ်မြဟ်တုဲ အခိၚ်ကာလဗြဲလၟုဟ်ဂှ်လေဝ် ဂၠိက်ယာတ်ဂွံကှ် ဟွံလောဲတုဲ ဟွံဂွံဂၠိက်ယာတ် ရုမ်မ်ဂပ်ပ်ကဵု ဒးလ္တက်ဒၟံၚ် ဂၠိက်ယာတ်ဍုက်က်တံဂှ်ရ ဒးဒုၚ်စသိုၚ်ဒၟံၚ် ယဲခၞော်စော်တံကဵု ယဲကသံက်တံရောၚ် ညးဆက်ဟီုရ။
မွဲလ္ပာ်ဂှ်ပၠန် ကောန်ထံၚ်ဗြဴဗြဴ ညးဗြဴမၞုံကဵုဒၟုၚ်ဒၠေၚ်တံကဵု ကောန်ထံၚ်ပရေၚ်ဍုၚ်ကွာန် သၠးလဝ်ဂဝ် ၅၀ ပြၚ်တံဂှ်လေဝ် ဖန်ဇန်ကဵုလဝ် ဒၞါဲဂဇအ်ချိုတ်တ်ပၠိုတ်တ်တံ ဟွံမွဲဂှ်ရ ကောန်ထံၚ်ဗြဴဗြဴတံကဵု ကောန်ၚာ်သၟတ်တံဂှ်လေဝ် ဂမ္တဴတိတ်၊ မြန်နာ်က္တဵုတံ ဒှ်ဒၟံၚ်ရောၚ် သ္ဂးရ။
ကောန်ထံၚ်ဂမၠိုၚ်ဝွံ က္တဵုဒှ်ဒၟံၚ် ယဲခၞော်စော်၊ ယဲကသံက်၊ ဂမ္တဴတိတ်၊ မြန်နာ်တံဏံကီုလေဝ် လ္ပာ်ညးဇၞော်ထံၚ်တံဂှ် ဟွံကဵုဂဥုဲလွဳလွတ်ကဵုတုဲ ရပ်စပ်နဲကဲနာနာတုဲ ဍဵုဍိုက်ဒၟံၚ်ရ။
ကြဴနူပရေၚ်ပၞာန်သီအဝဵုတုဲ ထံၚ်စာတ်ကံၚ်ဇြဳပၞာန်တံဝွံ ပရေံစှ်ေဒၟံၚ် ညံၚ်ရဴဗလးမုက်ပၞာန်ဂှ်တုဲ ပွမဝးပ္ကဝ်အခေါၚ်အရာမၞိဟ် လ္တူကောန်ထံၚ်ဂမၠိုၚ်၊ ဂစိုတ်ဂယိုၚ် ဟွံမွဲကဵုသၞောဝ်တံ မပါလုပ် ညးဇၞော်ထံၚ်တံ စလာပ်တံဂှ်လေဝ် က္တဵုဒှ်ဒၟံၚ် ဇၞော်ကဵုဇြဟတ်ရ။
PPNM ဂှ်တှ်ေ သွက်ဂွံသောၚ်ကလး ပြသၞာဒးဆေၚ်ဒၟံၚ်မုက် ပ္ဍဲထံၚ်ဍုၚ်ဗၟာတံဂှ်တုဲ ကမ္မတဳဇိုၚ်ခ္ဍာ်ဍုၚ်နာနာ ICRC ၊ ဍုၚ်လုပ်ဂကောံ ကုလသမဂ္ဂတံကဵု ဂကောံအခေါၚ်အရာမၞိဟ်ဍုၚ်သ္အာၚ်တံလေဝ် သွက်ဂွံစွံကဵုအာရီု ရေၚ်တၠုၚ်ကဵုအိုတ်ဂှ် ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ