ရေဝ်၊ ဂျောန် ၉
အထံက်ဒပ်ဗိုလ်ဇၞော် နူတမ်ဒပ်ခလရ စၟတ် ၁၀၆ ဖျေံသ္ဇိုၚ်ကွာန်တၟအ်ကၞေၚ် ပွိုၚ်ဍုၚ်ရေဝ် တွဵုရးဍုၚ်မန်ဂှ်ဝွံ ပ္ဍဲဂိတုဂျောန် ၇ တေံ ပအပ်လွဟ်တုဲ ကၠုၚ်စိုပ်ပံၚ်တောဲလဝ်ရောၚ် ခရိုၚ်ဒူပလာယာ ဒပ်မဟာ ၆ KNU လလောၚ်ပ္တိတ်လဝ်ပရိုၚ်ရ။
ညးဝွံ ပ္ဍဲအရာကၠုၚ်စိုပ်ပအပ်လွဟ် ဇရေၚ် KNU ဂှ် သေနာတ် MA3 မွဲဇကိုအ်၊ ဖျေဲလွဟ်မွဲ၊ မကမ် ၁၃၀ ဒကောၚ်၊ သေနာတ် MA 5 မွဲဇကိုအ်၊ ဖျေဲလွဟ်မွဲ၊ မကမ် ၁၁ ဒကောၚ် ကေုာံ ဗုမ် အဳနာဂါ ၄ မတံဂှ်လေဝ် ကေတ်နၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
အထံက်ဒပ်ဗိုလ်ဇၞော် ကျဝ်မျေတ်လွေန် ကၠုၚ်စိုပ်ပံၚ်တောဲလဝ် သီုလွဟ်လက်နက်မကမ်ဂှ် နူဒပ်မဟာ ၆ KNLA ကလေၚ်ပအပ်ကဵုလဝ် သြန်ထံက်ပၚ် ၇၀ ကိုဋ်ဒ္ကေဝ်တုဲ အတိုၚ်ဆန္ဒညး သွက်ဂွံမံၚ်စံၚ်စသုၚ်အာ ပ္ဍဲတိဍာ်ဗၠးၜးမွဲဒၞါဲဂှ် စဳဇန်ကဵုလဝ်ရောၚ် ဂွံတီကေတ်ရ။
အပ္ဍဲတိဍာ်ထိၚ်ဒက် ဒပ်မဟာ ၆ KNU ဂှ် အရိုဟ်ဟ်တ္ၚဲ ပေါဲဗ္တိုက်က္တဵုဒှ်ဒၟံၚ် ပြးဇးတုဲ ဗ္ဒိုပ်ဒပ်ကံၚ်ဇြဳပၞာန် ဗွဲမဂၠိုၚ်ဂၠေၚ်ဂှ်လေဝ် ဒပ်ပံၚ်ကောံ ဂကောံဇြဟတ်ပၠန်ဂတး သၟဝ်ပၠတရဴ KNLA တံ ဗ္တိုက်သီဂွံလဝ်နွံရောၚ် သ္ဂးရ။
ကောန်ဒပ်ကံၚ်ဇြဳပၞာန် စိုပ်ဒၟံၚ်သၟဝ်တိဍာ်ထိၚ်ဒက် ဒပ်မဟာ ၆ တံဂှ်ဝွံ ပရေင်ဒက်ပ္တန် ၝောံဒပ်ဂမၠိုၚ် လီုအာတုဲ ဇြဟတ်လွဟ်၊ ဇြဟတ်မၞိဟ်တံ အောန်စှ်ေကၠုၚ်သၟးဟွံက စိုတ်ဓာတ်လေဝ် စှ်ေကၠုၚ်ဒၟံၚ်နွံဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး KNU ရ။
တုဲကၠုၚ်ဂိတုဂျောန် ၅ တေံဂှ်လေဝ် သ္ကိုပ်ဗိုလ် တာန်နာၚ်သဵု မဒှ်သ္ကိုပ်တမ်ဒပ် နူတမ်ဒပ်ခလရ စၟတ် ၁၀၆ ဖျေံသ္ဇိုၚ်ကွာန်တၟအ်ကၞေၚ်ဂှ် တိတ်ကၠုၚ်ရာန်ဇွောံမ နကဵုကွဳစက် ညးမွဲတၠဓဝ်ဂှ် ဒပ်ပၠန်ဂတး သၟဝ်ပၠတရဴ KNLA တံ ရပ်ဂွံလဝ် ဗ္ဒါဲတမ်ဒပ်ညးတံရ။
ပရိုၚ်−သြၚ်လောန်တိုၚ်(မ်)
ဗီု−KNU