နေဗျဳဒဝ်၊ ဂျောန် ၉
ပြဝပကီုပရာပ် မက္တဵုဒှ်ဒၟံၚ် ပ္ဍဲရးဒေသ ကေုာံ တွဵုရးတံဂှ် သၟာပကီုရာပ်ဒေသတံ ကၠောန်ၜိုတ်ဒၟံၚ်ဏောၚ်တုဲ ဒှ်ရဲပလီုပလာ် ဒေသဇကုတံရဂှ် က္ဍိုပ်သ္ကိုပ်ပၞာန် ကၟာတ်ဒုဟ်ညးတုဲ စောဲစပ်လဝ် ဇြဟတ်ပၠန်ဂတးရပ်လွဟ်တံရ။
ပ္ဍဲကောံဓရီုကံၚ်ဇြဳပၞာန် မကၠောန်ဗဒှ်လဝ် ပ္ဍဲဂိတုဂျောန် ၇ ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ် ညးမကၠောန်ၜိုတ် သွက်ဒေသမွဲမွဲ ဂွံလီုလာ်တံဂှ်ဝွံ ဒှ်ရဲပလီုပလာ် မမံၚ်တန်တဴဒၟံၚ် ပ္ဍဲဒေသတံဏံရဂှ် သ္ဂးလဝ်ရ။
ဍုၚ်မွဲမွဲ ဂွံတောတက်ခိုဟ်ဂေါဝ်ကၠုၚ်ဂှ် ညးမမံၚ်တန်တဴ ပ္ဍဲဍုၚ်ဂှ်ရဟေၚ် ဒးကၠောန်ၜိုတ်ဏောၚ်တုဲ ညံၚ်ဍုၚ်ဂွံလီုဂှ်လေဝ် ကောန်ဍုၚ်မၞုံကဵုစိုတ်ဓာတ် သၟာပလီုပလာ်တံရ ကၠောန်သ္ပအဓိကဂှ် ညးက္ဍိုက်ပ် ဒပ်ကံၚ်ဇြဳပၞာန် ရပ်ဒက်ဂစိုတ်ဂယိုၚ်ဒၟံၚ် ညးဍုၚ်ကွာန်တံ နကဵုနဲကဲနာနာသာ်ဂှ် သ္ဂးရ။
ဥူအံၚ်သာန်မျေတ် ညးအုပ်ကာ လၟိဟ်−၂ ဗော်တောတက်ကောန်ဂကူကရေၚ်ဍာဲ KNPP မပၠန်ဂတးဒၟံၚ် သၞောတ်တၠအဝဵုပၞာန်ဂှ် ကံၚ်ဇြဳပၞာန် စကၠောန်လဝ် ကမၠောန်ပကီုပရာပ်တံဂှ်တုဲ ပကီုပရာပ်ကၠုၚ် အပ္ဍဲဒေသပိုယ်တံဂှ် ဆၜိုတ်ကလေၚ်ခၠေဝ်လဝ်ညိကီုဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ကံၚ်ဇြဳပၞာန်ဂှ် နကဵုဇြဟတ်လွဟ် ပကီုပရာပ် ရပ်ဒက် ညးဍုၚ်ကွာန် သၟတ်ဍောတ်တ်သွတ်တ်ပိုယ်တံကီု၊ ဖျေံထံၚ်ကီု၊ ဂစိုတ်ဂယိုၚ်ကီု။ အရာတံဏံဂှ် ဍေံတံ (စကစ) ရ ကၠောန်လဝ်။ လၟုဟ်တှ်ေ သာပရေံရ။ ပြိုက်ဂစိုတ် နကဵုဂအုံဗွဝ်ကီု၊ စံၚ်ပလီုပလာ် ကွာန်တံကီု။ အရာတံဏံဂှ် ဒှ်ကမၠောန်ပကီုပရာပ်တံရ။ ပိုယ်တံဂှ် မံၚ်တန်တဴဒၟံၚ် အပ္ဍဲဒေသ အပ္ဍဲတွဵုရးပိုယ်ရဏောၚ်။ ကုပူဂဵု ကၠုၚ်ပကီုပရာပ်စိုပ် ဒေသပိုယ်တံသာ်ဏံဂှ် ပိုယ်တံ ဆၜိုတ်ကလေၚ်ခၠေဝ်ရနွံ။ ပကီုပရာပ်ဍာံဍာံဂှ် ဍေံတံဏောၚ်” သာ်ဝွံ ကလေၚ်ခၠေဝ်လဝ်ရ။
က္ဍိုပ်သ္ကိုပ်ပၞာန်သီအဝဵုဂှ် နကဵုဒပ်ပၞာန် ကေုာံ ကောန်ဒပ်ဗၠာဲသၟိၚ်တံ တြးအလုံဍုၚ်မွဲတုဲ ရေၚ်တၠုၚ်ဒၟံၚ် ကမၠောန်ပရေၚ်ဂီုကၠီုတံဂှ်ဝွံ ယိုက်ဂၠေၚ်ဒၟံၚ်တာလျိုၚ် သွက်အဝဵုအပိုၚ်အခြာကၟိန်ဍုၚ် ဂွံတန်ကြန်ဗိုန်ခိုၚ်ဏောၚ်ဂှ် ထ္ၜးလဝ်ဟိုတ်ရ။
အတိုၚ်စရၚ် ဂကောံမၚ်မွဲရီုဗၚ်ကောန်ထံၚ်ပရေၚ်ဍုၚ်ကွာန် AAPP ဂှ်မ္ဂး အပ္ဍဲကာလသီအဝဵု ပွိုၚ်ပိသၞာံပြၚ်ဏံ ဟိုတ်နူဂကောံပၞာန် ကေုာံ ကောန်ရဲတဝ်ခွါဍေံတံဂမၠိုၚ်တုဲ ညးဍုၚ်ကွာန် ၅၂၄၀ တၠ ဒးချိုတ်အာလဝ်တုဲ ပ္ဍဲကဵုညးဒးဒုၚ်ရပ်ထိၚ် ၂၀၅၇၀ ပြၚ်ဂှ် ၉၁၀၀ ပြၚ်ဝွံ ဒးဒုၚ်ဖျေံလဝ်ထံၚ်ရ။
ပ္ဍဲပေါဲရုဲမာဲ သၞာံ ၂၀၂၀ ဂှ် နကဵုဟိုတ် စရၚ်မာဲဗၠေတ်မှာတုဲ ကံၚ်ဇြဳပၞာန် သီကေတ်လဝ်အဝဵုကၟိန်ဍုၚ်ဂှ် ညးဍုၚ်ကွာန်ဂမၠိုၚ် ဟွံမွဲပၟိက် ကုသၞောတ်တၠအဝဵုပၞာန်တုဲ ထ္ၜးကၠုၚ်လဝ်ဆန္ဒ ဗွဲမၜိုဟ်လလမ်ရ။
ဆ္ဂး ကောန်ဒပ်ကံၚ်ဇြဳပၞာန်ကဵု ကောန်ရဲတဝ်ခွါဍေံတံဂမၠိုၚ် ရပ်စပ်စကာနဲကဲနာနာတုဲ ပကီုပရာပ်ဒၟံၚ် ညးဒစဵုဒစး သၞောတ်တၠအဝဵုပၞာန်တံဂှ်တုဲ ပ္ဍဲကဵုရးဒေသ ကေုာံ တွဵုရးတံဂှ် နူပၠန်ဂတးညးဍုၚ်ကွာန်ဂှ် ဓရိုဟ်ပလံၚ်ဏာလဝ် နဒဒှ်ပၠန်ဂတးရပ်လွဟ်ရ။
ကံၚ်ဇြဳပၞာန်ဂှ် သွက်ဂွံဂါံကွာ် လ္တူဂၠံၚ်တရဴသၞောတ်ဒဳမဝ်ကရေဇြဳဗော်ဇဳဂှ် ထ္မံက်ဒၟံၚ်ရုပ်ရဴကီုလေဝ် နကဵုသၟာပကီုပရာပ်ဂမၠိုၚ် သောၚ်ကလးဒၟံၚ် ကိစ္စပရေၚ်ဍုၚ်ကွာန် နကဵုနဲကဲပကီုပရာပ်တံဏောၚ်ဂှ် က္ဍိုပ်သ္ကိုပ်ပၞာန် စောဲစပ်လဝ် ဂကောံပၠန်ဂတးရပ်လွဟ်တံရ။
ဥူဖေတာန် သၟာပရေၚ်ဍုၚ်ကွာန်ဝှ်ကြံၚ်ဂှ် ပေါဲဗ္တိုက်ဂှ် ညံၚ်ဂွံတုပ်ကဵုပေါဲဗ္တိုက် ဟွံဗ္တိုက်မွဲသာ် ကၠောန်သ္ပညးဍုၚ်ကွာန်တံ နဒဒှ်ဇွောံစဵုဒၞါပၞာန်၊ စံၚ်ယတ်ကီု၊ ပန်လွဟ်ဇၞော်၊ ထောံမခတိုဟ်တံဂှ် ကၠောန်ဒၟံၚ်အဆက်က်ဂှ်ဝွံ ဒှ်ကောန်ဒပ်ကံၚ်ဇြဳပၞာန်တံရောၚ် ထံက်ထ္ၜးလဝ်ရ။
“ပေါဲဗ္တိုက်ဂှ် ညံၚ်ဂွံတုပ်ကဵုပေါဲဗ္တိုက် ဟွံဗ္တိုက်တုဲ ကဵုဒၟံၚ်ဒဒိုက် ညးဍုၚ်ကွာန်တံဂှ် ညးဂှ်ရော။ ကောန်ပၞာန်ရေၚ်သ္ကအ်ဗ္တိုက်ဂှ် ညးဂှ်ချိုတ်တ်ရ။ ညအ်ဂှ် ပကီုပရာပ်ဏောၚ် ဟီုဟွံဂွံပုဟ်။ ဆ္ဂး သ္ပဒၟံၚ်ညးဍုၚ်ကွာန်တံ နဒဒှ်ဇွောံစဵုဒၞါပၞာန်၊ လုပ်ကွာန်တုဲ ဂစိုတ်ဒၟံၚ်ညးဍုၚ်ကွာန်တံ အလုံကွာန်မွဲကီု၊ စံၚ်ယတ်ကီု၊ ပန်ကဵုလွဟ်ဇၞော် ကေုာံ ဂြာတ်ကဵုက္ၜၚ်ကျာတံ။ ညအ်ဂှ် ရဲကၠောန်ကၠုၚ်ဒၟံၚ်ဟွံပိုတ်သ္ကုတ်ဂှ် ညးဂှ်ရောဟီုဂှ် မံက်ကၠးဒၟံၚ်ရ။ ကောန်ပၞာန် ကံၚ်ဇြဳပၞာန်တံရ ကၠောန်ဒၟံၚ်” သာ်ဝွံ သ္ဂးရ။
ပ္ဍဲကဵုပြဝဒပ်ကံၚ်ဇြဳပၞာန် ကလိလောန်ဒၟံၚ်အမှုရာဇဝတ်ပၞာန် ညံၚ်ဂကူမၞိဟ်တံ ဂွံဇီုကပိုက်ဂမၠိုၚ် ပရူဒဒှ်ကွာန်ဗျာၚ်ဖျူ နူရခေၚ် က္တဵုဒှ်လဝ်ပြဟ်ဟ်ဏံကဵု ပရူဒဒှ် ပေါဲမ္ၚဵုထပ်တဲ နူရးသက်ကိုၚ်တံဂှ်ဝွံ ဒှ်သက်သဳ မထ္ၜးဒၟံၚ် နကဵုဆီဍာ်ရမတ်တံရ။
တုဲကၠုၚ်ဂိတုမေ ၂၉ တေံ ပ္ဍဲကွာန်ဗျာၚ်ဖျူ ပွိုၚ်ဍုၚ်သေတ်တိုဲ တွဵုရးရခေၚ်ဂှ် ဒၟါနူဒပ်ကံၚ်ဇြဳပၞာန်ကဵု ဒပ်ပံၚ်ကောံဂမၠိုၚ် ရပ်ဒက်ဂစိုတ်ဂယိုၚ်လဝ် ဟွံဗဗွဲကဵုသၞောဝ်တုဲ ညးဍုၚ်ကွာန်ကောန်အရာပ် ၇၆ တၠ ဒးချိုတ်အာလဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး ဒပ်ပၞာန်ရခေၚ် AA ရ။
ဂိတုဂျောန် ၃ တေံဂှ်လေဝ် ရးသက်ကိုၚ် ပွိုၚ်ဍုၚ်မေန်ကေန် နူကွာန်မတဝ် အခိၚ်ကၠောန်သ္ပဒၟံၚ်ပေါဲမ္ၚဵုထပ်တဲ ဟိုတ်နူဒပ်ကံၚ်ဇြဳပၞာန် ဂြာတ်ထောံမခတိုဟ် နကဵုပၞာန်ကျာတုဲ သီုကဵုကောန်ၚာ် ပါလုပ်ဂှ် ညးဒးချိုတ်အာ ဗ္ဒါဲ ၃၀ တၠ နွံလဝ်တုဲ ညးကလိဂွံဝပ် ဟွံအောန်နူကဵု ၅၀ တၠ နွံလဝ်ရ။
သမ္မတယာယဳ အလဵုအသဳညဳသၟဟ်ဂကူ NUG ဒူဝါလယှဳလဂှ် အကာဲအရာလၟုဟ် ကံၚ်ဇြဳပၞာန် မကျဒၟံၚ် ပရေၚ်ပၞာန်ဂှ် နှဴရဴထောံ ကောန်အရာပ်ကဵု ပွန်ပရေၚ်ပၞာန်တံဂှ်တုဲ ကိစ္စဂစိုတ်ဂယိုၚ်ဒၟံၚ် ညးဍုၚ်ကွာန်ကောန်အရာပ်တံ ကဵုဂအုံဗွဝ်ဂှ်ဝွံ ဓဇန်ကြမ်ကြ ယုတ်မာပပ်ပဳ ဗွဲမလောန်ဂှ် ဂွံဆဵုကေတ်ရောၚ် ပါ်ပါဲလဝ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media