ဍာ်ဗု၊ ဂျောန် ၁၁
အပ္ဍဲပေါဲဗ္တိုက် မက္တဵုဒှ်လဝ် ပ္ဍဲကွာန်(ရာဖူးရွာသစ်) ပွိုၚ်ဍုၚ်ဍာ်ဗု ခရိုၚ်ထဝါဲ ရးတၞၚ်သဳဂှ် သၞာဲဒဴလ္ပာ်ကံၚ်ဇြဳပၞာန်မွဲတၠ မပါလုပ် ၇ တၠ ချိုတ်အာလဝ်ရောၚ် ဂွံတီကေတ် ဇရေၚ်ကရောၚ်ပၞာန်ပံၚ်တောဲ မဟာမိတ်ပၠန်ဂတးတံရ။
တုဲကၠုၚ်ဂိတုဂျောန် ၇ တေံ ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် နကဵုဇြဟတ်ဒပ် ဗၞတ် ၂၀၀ ဂှ်ကဵု ဒပ်ပံၚ်ကောံ ဇြဟတ်ပၠန်ဂတး ရေၚ်တၠုၚ်ဒၟံၚ် ပရေၚ်ဂီုကၠီုအကြာဂၠံၚ်တံဂှ် က္တဵုဒှ်လဝ်ပေါဲဗ္တိုက် ဗ္ဒါဲကွာန် ( ရာဖူးရွာသစ်) ရ။
ပ္ဍဲကဵုပေါဲဗ္တိုက် မက္တဵုဒှ်လဝ် ပွိုၚ်မွဲနာဍဳပြၚ်ဂှ် လ္ပာ်ဒပ်ကံၚ်ဇြဳပၞာန် သၞာဲဒဴမွဲတၠကဵု ကောန်ဒပ် ၆ တၠ ချိုတ်အာလဝ်တုဲ ၆ တၠ ဇီုကပိုက်ကလိဂွံလဝ်ဝပ်ရောၚ် ညးတာလျိုၚ် ကရောၚ်ပၞာန်ပံၚ်တောဲမဟာမိတ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲကဵုပေါဲဗ္တိုက်ဂှ် ဟိုတ်နူဒပ်ဍာ်မဝ်ရဝတဳ ကံၚ်ဇြဳပၞာန် ပန်ပှော်လွဟ်ဇၞော်တုဲ ဒတုံဗ္တိုဟ်ထ္ကးအာလဝ် လ္တူသ္ၚိဒၟံၚ် ကွာန် ( ရာဖူးရွာသစ်) မွဲမတုဲ သီုကောန်ၚာ်ဟွံပေၚ်သၞာံမွဲတၠ မပါလုပ် ကောန်ဂြောဝ်ဂတာပန်တၠ ဒးတုဲချိုတ်အာလဝ်ရောၚ် ဂွံတီကေတ် အတိုၚ်ဂလာန် ညးဒေသတံရ။
သ္အာၚ်နူဂှ်ပၠန် ပ္ဍဲကဵုတ္ၚဲဂှ်ရ ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော်ကြာန်န်တုဲ ဒတုံဗ္တိုဟ်ထ္ကးအာလဝ် ပ္ဍဲကၠအ်ထၜိုတ် ကွာန် ( ရာဖူးရွာသစ်) ကဵု ကွာန် (သာယာမွန်) တုဲ မၞိဟ်တြုံမွဲတၠ ကေုာံ သီုမၞိဟ်ဗြဴလေဝ် ဇီုကပိုက်ကလိဂွံလဝ်ဝပ်ရောၚ် သ္ဂးရ။
မ္ၚးနူကဵုပေါဲဗ္တိုက်ဂှ် ဒၟါနူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်တုဲ ညးဒေသ ဂၠိုၚ်ကဵုလ္ၚီ နူကွာန် ( ရာဖူးရွာသစ်၊ သာယာမွန်၊ မိုင်ခြောက်ဆယ်၊ မရမ်းချောင်း) တံဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရ။
အခိၚ်လၟုဟ် ဒပ်ကံၚ်ဇြဳပၞာန်ဝွံ ဖျေံဒၟံၚ်ဒပ် မံၚ်တန်တဴဒၟံၚ် ပ္ဍဲကွာန် ( ရာဖူးရွာသစ်) ကဵု ပ္ဍဲဘာလကျာ်တံဂှ်တုဲ ဆက်ကၠောန်သ္ပဒၟံၚ် သွက်သ္ဂောံအုပ်ဓလီုတိဍာ် မွဲဒမြိပ်ဒေသဂှ်ရောၚ် ဂွံတီကေတ်ရ။
သ္ကုတ်ဂၠံၚ် ရေဝ်−ထဝါဲ ဇြဟတ်ပၠန်ဂတးတံ မထိၚ်ဒက်လဝ်ဂှ် ကံၚ်ဇြဳပၞာန် ပ္တိတ်ကၠုၚ်ဇြဟတ် သွက်ဂွံကလေၚ်ထိၚ်ဒက်ဂှ်ရ ဂၠံၚ်ဏံဂှ် စနူဂိတုဂျောန် ၉ တုဲ ဟွံမွဲပၟိက်မ္ဂး လ္ပရပ်စပ်အာကၠုၚ်အိုတ်ညိဂှ် ဒပ်ပံၚ်ကောံမဟာမိတ်တံ လလောၚ်ပ္တိတ်လဝ်ရ။
ပရေၚ်ဗ္တိုက်ဏံဂှ် ဂကောံစဵုဒၞါညးဍုၚ်ကွာန် မပ္တံကဵု ကရောၚ်ပၞာန်ဒဝ်န၊ ဒပ်ပၠန်ဂတးဍုၚ်မန် MSRF ၊ ဗော်ဍုၚ်မန်တၟိ NMSP AD ၊ ဒပ်ပၞာန်ကဝ်တူလေဝ် KTLA ကေုာံ ဂကောံဒပ်ဒရုၚ် ဗွဲတၟေၚ် SDDF တံ ပံၚ်တောဲကၠောန်သ္ပလဝ်တုဲ လ္ပာ်ကရောၚ်ပၞာန်ပံၚ်တောဲ မဟာမိတ်တံ ဇီုကပိုက်ဒးဟွံမွဲပုဟ်ဂှ် ဂွံတီကေတ်ရ။
တုဲကၠုၚ် ဂိတုမေ ၃၁ တေံဂှ်လေဝ် ဒပ်ပံၚ်ကောံ ဇြဟတ်ပၠန်ဂတး မရေၚ်တၠုၚ်ဒၟံၚ်ပရေၚ်ဂီုကၠီု သ္ကုတ်ဂၠံၚ်ကလိန်အံၚ်−ထဝါဲကဵု ဒပ်ကံၚ်ဇြဳပၞာန်တံဂှ် ပေါဲဗ္တိုက်ၜါလ္ပာ် က္တဵုဒှ်လဝ်တုဲ ကောန်ဒပ်ကံၚ်ဇြဳပၞာန်မွဲတၠ ချိုတ်တုဲ ပိတၠ ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်လလောၚ်တြး ဂကောံဇြဟတ်ပၠန်ဂတးတံရ။
ပရိုၚ်−သြၚ်လောန်တိုၚ်(မ်)
ဗီု−CJ