ရေဝ်၊ ဂျောန် ၁၁
ပ္ဍဲသ္ကုတ်ဂၠံၚ်ရေဝ်−ထဝါဲဂှ် ပေါဲဗ္တိုက်ၜါလ္ပာ်တံ သ္ကာတ်မြဟ်ကၠုၚ်မာန်တုဲ နကဵုညးဍုၚ်ကွာန်ဂမၠိုၚ် ဟွံမွဲပၟိက်မွဲသာ် လ္ပသုၚ်စောဲဂၠံၚ်ဏံညိဂှ် ဒပ်ပံၚ်ကောံမဟာမိတ်ပၠန်ဂတးတံ ကဵုသတိ လလောၚ်ပ္တိတ်လဝ်ရ။
ကံၚ်ဇြဳပၞာန်ဝွံ သွက်ဂွံကလေၚ်ထိၚ်ဒက် ဂၠံၚ်ရေဝ်−ထဝါဲတုဲ ပ္ဍဲအရာမထ္ပက်ကၠုၚ်ပၞာန်ဂှ် ရပ်စပ်စကာညးဍုၚ်ကွာန်ကောန်အရာပ်တံကီု၊ ပြံၚ်လှာဲလွေဟ်ကောန်အရာပ်တုဲ ဗပေၚ်ဒၟံၚ်ဇြဟတ်ပၞာန်တံ ကၠောန်သ္ပဒၟံၚ်ရောၚ် ဒပ်ပံၚ်ကောံမဟာမိတ်ပၠန်ဂတးတံ သ္ဂးရ။
ဟိုတ်ဂှ်ရ ညးဍုၚ်ကွာန်ဂမၠိုၚ် ညံၚ်ဟွံဂွံကလိဂွံဝပ် မသက္ကုဟိုတ်ဂှ် ဒးကၟာတ်လဝ် ဂၠံၚ်ရေဝ်−ထဝါဲ ယာယဳရောၚ် ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF နာဲနဂါ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဍေံတံ (စကစ) သုၚ်စောဲကၠုၚ်လဝ် ဂၠံၚ်ဍာ်တုဲ လၟုဟ်တှ်ေ စိုပ်ကၠုၚ်ရာသဳဗြဲတုဲ ဂၠံၚ်ဍာ်ဂှ် အာကၠုၚ် ဟွံပြေပြံၚ်ရပုဟ်။ ဟိုတ်ဂှ်ရ ဂွံကလေၚ်ထိၚ်ဒက် ဂၠံၚ်ဏံဂှ် ထ္ပက်ကၠုၚ်ပၞာန်တံ နွံကၠုၚ်ရ။ ဍေံတံဂှ် ဝးပ္ကဝ်ဒ္ဂေတ်ဝတ်ပၞာန်တုဲ ကၠောန်ဒၟံၚ်လၟိုန်ရဏောၚ်။ ပပၞညံၚ်ကောန်အရာပ် လ္တက်ကယျိုၚ်အရာပ် သုၚ်စောဲကွဳစက်အရာပ်တုဲ ချဳဒရာၚ်ဒၟံၚ်နွံဂှ်ရ ပန်ဒးဗၠေတ်မှာအာကီု ညးဍုၚ်ကွာန်တံ ညံၚ်ဟွံဂွံဇီုကပိုက်ကလိဂွံဝပ် မသက္ကုဟိုတ်ဂှ် ပိုယ်တံ ဒးကၟာတ်ထောံလဝ် ယာယဳသာ်ဏံရောၚ်” သာ်ဝွံ သ္ဂးရ။
ဒပ်ပံၚ်ကောံ မဟာမိတ်ပၠန်ဂတး မချဳဒရာၚ်ဒၟံၚ် လ္ပာ်ပွိုၚ်ဍုၚ်ရေဝ် တွဵုရးဍုၚ်မန်ကဵု လ္ပာ်ပွိုၚ်ဍုၚ်ဍာ်ဗု ရးတၞၚ်သဳဂှ် ပပ္တံနူကၞောတ်သၞာံတုဲကၠုၚ်တေံတုဲ စဵုကဵုတ္ၚဲဏံ ထိၚ်ဒက်လဝ် ဂၠံၚ်ဇၞော်ပျဳထံၚ်သု ရေဝ်−ထဝါဲ ပေၚ်ၚ်ရ။
နကဵုကံၚ်ဇြဳပၞာန် စပ်ကဵုဒးဗလးလဝ်တဲ ဂၠံၚ်ရေဝ်−ထဝါဲဂှ်တုဲ ပ္ဍဲကဵုပရေၚ်ပၞာန် ကေုာံ ပရေၚ်ပလံၚ်ဗစိုပ်တံဂှ် အခက်အခုဲနွံအာဂှ်ရ ဂွံကလေၚ်ထိၚ်ဒက် ဂၠံၚ်တံဏံမာန်ဂှ် စနူဂိတုဂျောန် ၈ တုဲ ထ္ပက်ကၠုၚ်ကရောၚ်ပၞာန် နကဵုဇြဟတ်လၟိဟ်ဗွဲမဂၠိုၚ်ဂၠေၚ်ဂှ် နာဲနဂါ ဟီုရ။
သ္အာၚ်နူဂှ်ပၠန် ဒပ်ကံၚ်ဇြဳပၞာန်ဝွံ နူလ္ပာ်ကလိန်အံၚ် ထပ်ဗပေၚ်ကၠုၚ်ဇြဟတ် နကဵုကွဳစက် (မှန်လုံ) ၊ ကွဳစက်ကောန်အရာပ်၊ ကွဳစက်ဖ္ဍိုက်တၟအ်တံ နွံဒၟံၚ်တုဲ မွဲဒမြိပ်ဒေသရေဝ်−ထဝါဲဂှ် အခိၚ်ဟွံရုဲ ပေါဲဗ္တိုက်ဂမၠိုၚ် သ္ကာတ်မြဟ်ကၠုၚ်မာန်ရောၚ် သ္ဂးရ။
နကဵုဒပ်ပံၚ်ကောံမဟာမိတ်ပၠန်ဂတးတံ ဂကောံဒပ်တမ်ဒပ် တြးလဝ် ပ္ဍဲဂၠံၚ်ရေဝ်−ထဝါဲတံဂှ် သၠုၚ်ပ္တိုန်အသိၚ်ပရေၚ်ပၞာန်တုဲ စဳဇန်ဒၟံၚ် သွက်ဂွံကလေၚ်ထ္ပက်ပၞာန် ဗွဲမသ္ကာတ်မြဟ်ယျဂှ် ကဵုလဝ်သမ္တီ ပ္ဍဲတၚ်လလောၚ်တြးဂှ်ရ။
နကဵုညးဍုၚ်ကွာန်ဂမၠိုၚ် ညံၚ်ဂွိုအ်ဇီုကပိုက်ဒးဂှ်ကီု၊ လ္ပာ်ဒပ်ပံၚ်ကောံ မဟာမိတ်ပၠန်ဂတးတံ ညံၚ်ဂွံဝေၚ်ပၞာန်လောဲသွာဂှ်ကီု ပပ္တံနူဂိတုဂျောန် ၉ ဏံတုဲ လုကဴဟွံပ္တိတ်တၚ်လလောၚ်တြးမွဲမွဲသာ်ဏီ ပၟိက်ဟွံမွဲမ္ဂး လ္ပသုၚ်စောဲဂၠံၚ်ရေဝ်−ထဝါဲဏံအိုတ်ညိဂှ် အာတ်မိက်လဝ်ညးဍုၚ်ကွာန်တံရ။
ရန်ကဵုဒတုဲဖဵုညးဍုၚ်ကွာန်တံတုဲ ညးဍုၚ်ကွာန်ဂမၠိုၚ် ညံၚ်ပရေၚ်ဇီုကပိုက်ဒးဟွံဂွံမွဲ သွက်ဂွံဒ္ဂေတ်ဗက်အာ တၚ်လလောၚ်တြးကဵုသတိ ဗွဲတၟေၚ်ဂှ်ကီု၊ ယဝ်ရဟွံဒ္ဂေတ်ဗက်မ္ဂး ဖဵုအဆက်မက္တဵုဒှ်ကၠုၚ်တံဂှ် ဒပ်ပံၚ်ကောံမဟာမိတ်ပၠန်ဂတးတံ ကေတ်တာလျိုၚ်ဟွံသေၚ်ပုဟ်ဂှ် ကဵုလဝ်သတိရ။
ပရိုၚ်−သြၚ်လောန်တိုၚ်(မ်)
ဗီု−File Photo (Social Media)