(ဘုတ်ပြင်း) ၊ ဂျောန် ၁၂
ပ္ဍဲကွာန်ဒံၚ်ၚေဝ် ဂကောံကွာန်(မနိုးရုံး) ပွိုၚ်ဍုၚ်(ဘုတ်ပြင်း) ရးတၞၚ်သဳဂှ် ဂိတုဂျောန် စၟတ်တ္ၚဲ ၁၁ အခိၚ်နူဂယး ၜိုတ် ၉ နာဍဳ ကောန်ကလောန်ၚးတးဒၟံၚ်ကၠအ်မွဲတၠ ဒၟါနူမာၚ်တိုပ်တိဗ္တိုဟ်ထ္ကးတုဲ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် ဇရေၚ်ညးဒေသတံရ။
ဥူကျဝ်တိတ်နာၚ် အာယုက် ၄၆ သၞာံဂှ်ဝွံ အခိၚ်ၚးတးဒၟံၚ်ကၠအ် ပ္ဍဲကၠအ်ထၜိုတ် ဥူဇြဝ်မေန်တာန် နွံသ္ကဲဂၠံၚ်လုပ်ကွာန်ဒံၚ်ၚေဝ်ဂှ် ဒးဂဗလဝ်ကဵု မာၚ်တိုပ်တိဗ္တိုဟ်ထ္ကးရ။
အတိုၚ်ဂလာန်ညးဒေသတံဂှ်မ္ဂး ဥူကျဝ်တိတ်နာၚ်ဝွံ အခိၚ်ၚးတးဒၟံၚ်ကၠအ် နကဵုစက်ဗာ်ချောဲဂှ် အာဗာ်ဒးလဝ်မာၚ်တိုပ်တိ နကဵုစက်ဗာ်ချောဲဂှ်တုဲ ပရေၚ်ဗ္တိုဟ်ထ္ကး က္တဵုဒှ်လဝ်ရ။
ဟိုတ်နူမာၚ်ဗ္တိုဟ်ထ္ကးအာတုဲ ဥူကျဝ်တိတ်နာၚ်ဝွံ ဂဒအ်ဗြာတ်လ္ပာ်ပါဲ သၟဝ်တံၚ်ၜံၚ် ဒးအာကဝေက်မာၚ်၊ သော်ကၞေၚ်မတ်ပိုတ် ကလိဂွံလဝ်ဝပ်ရောၚ် ညးဒေသတံ ဟီုရ။
ဥူကျဝ်တိတ်နာၚ် ဒးအာလဝ်မာၚ် ကလိဂွံလဝ်ဝပ်ဂှ် ဂကောံရီုဗၚ်ပရေၚ်မၞိဟ်ဒေသတံ ပလံၚ်ဗစိုပ်ကဵုလဝ် ရုၚ်ဂဥုဲပွိုၚ်တိုက် (ပြည်ကြီးမဏ္ဍိုၚ်) တုဲ ဒုၚ်လွဳလွတ်ဒၟံၚ်ဂှ် ဂွံတီကေတ်ရ။
တုဲကၠုၚ်ဂိတုမေ ၂ တေံဂှ်လေတ် ဟိုတ်နူမာၚ်တိုပ်တိ ဒပ်ပၞာန်ပစူလဝ် ပ္ဍဲကွာန်(လေညာ) ပွိုၚ်ဍုၚ်(ဘုတ်ပြင်း) ဂှ် ဗ္တိုဟ်ထ္ကးအာတုဲ သၟတ်ဗြဴမွဲတၠ ဇိုၚ်ပိုတ်အာလဝ်ရ။
အတိုၚ်လိက်ဒုၚ်စဳရေၚ် ဂကောံသုတေသန FE5 Tanintharyi ပ္တိတ်လဝ်ဂိတုမေ ဂှ်မ္ဂး ပ္ဍဲရးတၞၚ်သဳ ပ္ဍဲကၠအ်ဂူယာတံကဵု ဒၞါဲဂၠံၚ်မၞိဟ်အာကၠုၚ်တံဂှ် ကံၚ်ဇြဳပၞာန် ပစူကၠုၚ်မာၚ်တိုပ်တိတံ သာဂၠိုၚ်ကၠုၚ်ဂှ်ကီု၊ ရဲဒးမာၚ်တုဲ အာတ်ဒၟံၚ်သြန်လေဲတံဂှ်လေဝ် ပလီုလဝ်ခဠာတ်မာၚ်ဂးတုဲ အာတ်မိက်ဒၟံၚ်သြန်တံ နွံဒၟံၚ်ရောၚ် ဂွံတီကေတ်ရ။
အတိုၚ်တၚ်နၚ် ဂကောံသြန်ဗွဝ်ကောန်ၚာ် ကုလသမဂ္ဂ UNICEF ဂှ်မ္ဂး ကၠာဒပ်ပၞာန်ဟွံဂွံသီအဝဵု သၞာံ ၂၀၂၀ တေံဂှ် ဟိုတ်နူမာၚ်တိုပ်တိတုဲ လၟိဟ်ကောန်အရာပ် ဇီုကပိုက်ချိုတ်အာတံဂှ် ၂၅၂ တၠရ နွံလဝ်ကီုလေဝ် အပ္ဍဲပၞာန်သီအဝဵု ပွိုၚ်ပိသၞာံပြၚ်ဏံ သၠုၚ်တိုန်ကၠုၚ် စဵုကဵု ၁၇၂၆ ဗ္ဒါဲဒ္စါံဆရ။
ပရိုၚ်−သြၚ်လောန်တိုၚ်(မ်)
ဗီု−CJ