မတ်မလီု၊ ဂျောန် ၁၁
ပ္ဍဲဍုၚ်ဗၟာ အပ္ဍဲကာလဒပ်ပၞာန်သီအဝဵုဏံ ကရောံၚုဟ်ဗၞိက်သၠုၚ်တိုန်ကၠုၚ်ဂှ် ဟိုတ်နူအကြေပ်အဂြတ်နာနာတုဲ ညးအဝဲဟွံခိုၚ်ကၠိုက်တံ ဂွံဂျိုၚ်လမျီုမံၚ်စံၚ်အာဂှ် ဒှ်ကၠုၚ်အခက်အခုဲရောၚ် ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်ညးအဝဲဟွံခိုၚ်ကၠိုက်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးအဝဲဟွံခိုၚ်ကၠိုက်တံဝွံ အပ္ဍဲကာလဒပ်ပၞာန်သီအဝဵုပွိုၚ်ပိသၞာံဏံ အခေါၚ်အရာကမၠောန်ကၟိတ်အောန်စှ်ေကၠုၚ်ကီု၊ ၚုဟ်ဗၞိက်က္ဍၚ်တိုန်ကၠုၚ်ကီု၊ သီုကဵုပြသၞာ ဆက်စပ်ကဵုစိုတ်၊ ကာယတံသၟးဟွံက ဒးဒုၚ်စသိုၚ်ကၠုၚ် သီုကဵုပွပကီုပရာပ်အပ္ဍဲသ္ၚိတံရ။
သ္အာၚ်နူဂှ်ပၠန် ဟိုတ်နူအခက်အခုဲ ပရေၚ်စသုၚ်မံၚ်စံၚ်ဂြောဝ်ဂတာတုဲ ဟွံဂွံပွမမၚ်မွဲပရေၚ်ထတ်ယုက် ပေၚ်ၚ်ကီု၊ မ္ၚးနူကဵုကပေါတ်မဆက်စပ်ကဵု ဂဥုဲဇဗတံဂှ် စၞစဓာတ်အာဟာရတံဂှ်လေဝ် ရာန်ဟွံမာန်ဂှ်ရ ဒးဒုၚ်စသိုၚ်ဒၟံၚ် ပြသၞာစပ်ကဵုပရေၚ်ထတ်ယုက်တံရ။
ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်ညးအဝဲဟွံခိုၚ်ကၠိုက်မွဲတၠဂှ် အပ္ဍဲကာလသီအဝဵုဏံ ကဆံၚ်ဒၟံၚ်ညးအဝဲဟွံခိုၚ်ကၠိုက်တံ သဝ်စှ်ေကၠုၚ်တုဲ ဟိုတ်နူပြသၞာပရေၚ်မံၚ်စံၚ်စသုၚ် ကေုာံ ပရေၚ်ထတ်ယုက်တံဂှ်တုဲ ဂွံမံၚ်အာယုက်ပေၚ်ၚ် ဝါတ်ဂါတ်ကၠုၚ်ဂှ် ဟီုရ။
“အခိၚ်လၟုဟ် ပရေၚ်စသုၚ်မံၚ်စံၚ်ပိုယ်တံ ကျာတ်ဝါတ်ကၠုၚ်ရ။ ကမၠောန်ကၟိတ်ဟွံမွဲပုဟ်။ ပရေၚ်ရံၚ်စံၚ်ပရေၚ်ထတ်ယုက်တံ အောန်စှ်ေဒၟံၚ်ကွေံကွေံဏောၚ်။ ညအ်ဂှ် ဒဒိုက်ဇၞော်ဇၞော်ဟဂှ်ရ။ ကဆံၚ်ဒၟံၚ်ညးအဝဲဟွံခိုၚ်ကၠိုက်တံဏံဂှ်တှ်ေ သဝ်စှ်ေအာတၟာဂလိုၚ်ရ။ အခါဂှ်တှ်ေ ညးအဝဲဟွံခိုၚ်ကၠိုက်တံဂှ် တော်ကဵုညးတၞဟ်သ္အာၚ်တှ်ေ အခေါၚ်အရာအောန်စှ်ေအာ ကွေံကွေံရ။ ရံၚ်စံၚ်ကီု မၚ်မွဲပရေၚ်ထတ်ယုက်ကီု စၞစအာဟာရဍိုန်လျကီု သွက်ပရေၚ်မၞိဟ်မံၚ်စံၚ်တံသီုဖအိုတ်ရဏောၚ်လေဝ်။ ဂွံမံၚ်အာယုက်ပေၚ်ၚ်ဂှ် ညးအဝဲဟွံခိုၚ်ကၠိုက်တံဂှ် တၚ်ကော်ဆဴ သာဂၠိုၚ်ကၠုၚ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ညးအဝဲဟွံခိုၚ်ကၠိုက်တံဝွံ ဟိုတ်နူအခက်အခုဲ ပရေၚ်စသုၚ်မံၚ်စံၚ်တုဲ ပ္ဍဲအရာလုပ်ကၠောန် ကလောန်မဂွံမကၠောန်တံဂှ် ဗ္ၜတ်ဍေံကဵုဍေံ ခါန်ကၞက်ပ္တိုန်ကလောန် ဗီုကၠာတေံ ဟွံမွဲရတုဲ ကမၠောန်ပူဂဵုတံဂှ်လေဝ် ဟိုတ်နူၚုဟ်ဗၞိက်သၠုၚ်တိုန်ဒၟံၚ် ဂၠိုၚ်ကဵုဆဂှ်တုဲ ဒးဒှ်ကၠုၚ်ကြပ်ဒးဒေါအ်ဒေၚ်အိုတ်ရဂှ် ညးဆက်ဟီုရ။
ညးအဝဲဟွံခိုၚ်ကၠိုက်မွဲတၠဂှ် သွက်ဂွံသောၚ်ကလး ညံၚ်ပရေၚ်စသုၚ်မံၚ်စံၚ် ဂွံပြေပြံၚ်ဂှ် ဗီုကဵုကၠာတေံ ကမၠောန်မွဲဂကူဓဝ်ဂှ် ဟွံရုမ်ဂပ်ရတုဲ ညးအဝဲဟွံခိုၚ်ကၠိုက်လ္ၚဵုတံဝွံ ကမၠောန်ကၟိတ်ဟွံပြေပြံၚ်ရတုဲ ဒးတိတ်ဂၠံၚ် ဒှ်ကၠုၚ်ကဆံၚ် စဵုကဵုဒးအာတ်စရဂှ် ဟီုရ။
“ပိုယ်ညးအဝဲဟွံခိုၚ်ကၠိုက်တံဂှ်တှ်ေ သွက်ဂွံသောၚ်ကလး ပရေၚ်စသုၚ်မံၚ်စံၚ် ညံၚ်ဂွံပြေပြံၚ်ဂှ် သာတုဲခက်ခုဲအာယျ။ ကဵုအကာဲအရာဍုၚ်ကွာန် ကဵုအကာဲအရာ ၚုဟ်ဗၞိက်တိုန်မံၚ်ဏံ ကဵုသြန်လုပ်ဓမ္မတာဏံဂှ်တှ်ေ ဟွံရုမ်ဂပ်ရပုဟ်။ တုဲပၠန် ဒးဂၠါဲဂၠိုၚ်နူဏံဏီဏောၚ်။ အရိုဟ်ဂၠါဲဂၠိုၚ်ၚ်လေဝ် သြန်လုပ်အပဵုဂှ် ဟွံဂွံကၠုၚ်ပုဟ်။ လၟုဟ်ဂှ် ကၠောန်ကလောန်ၜါရဲမှဟေၚ် ဂွံပြေပြံၚ်ပွိုၚ်မွဲတ္ၚဲ စိုပ်ဒၟံၚ်ဍာ်ဏံယျ။ ညးအဝဲဟွံခိုၚ်ကၠိုက်လ္ၚဵုတံဂှ်တှ်ေ ဟွံပြေပြံၚ်တုဲ တိတ်ဂၠံၚ် စိုပ်အာကဆံၚ် ဒးအာတ်ဂရၚ်စရ” သာ်ဝွံ သ္ဂးရ။
ညးအဝဲဟွံခိုၚ်ကၠိုက်ဂမၠိုၚ်ဝွံ ကမၠောန်ကၟိတ် ဝါတ်ဂါတ်တုဲ ဒးရုန်ဂ္စါန်ဒၟံၚ် သွက်ပရေၚ်စသုၚ်မံၚ်စံၚ်သၟးဂှ်ရ ပရေၚ်မၚ်မွဲရံၚ်စံၚ် ပရေၚ်ထတ်ယုက် ဗီုကၠာတေံဂှ် အလဵုညးတံ သ္ပဟွံမာန်ရတုဲ ဒးဆေၚ်ဒၟံၚ်မုက်ကဵု ပရေၚ်ထတ်ယုက်ပရေံနူကၠာတေံရ။
သ္အာၚ်နူဂှ်ပၠန် ဟိုတ်နူအကာဲအရာပရေၚ်ထတ်ယုက်ကဵု ပရေၚ်စသုၚ်မံၚ်စံၚ်တံဂှ်တုဲ ညးအဝဲဟွံခိုၚ်ကၠိုက်ဂမၠိုၚ်ဝွံ ပရေၚ်ဇီုကပိုက် သီုစိုတ်၊ သီုကာယာတံ နွံကၠုၚ်တုဲ အခိၚ်ဟွံစိုပ်ဏီ လမျီုဒးအိုတ်တံ နွံကၠုၚ်ဂှ်လေဝ် ညးမရီုဗၚ်ရေၚ်တၠုၚ်ဒၟံၚ် ပရေၚ်ညးအဝဲဟွံခိုၚ်ကၠိုက်တံ ဟီုဂးလဝ်အိုတ်ရ။
မွဲလ္ပာ်ဂှ်ပၠန် ကြဴနူဒပ်ပၞာန်သီအဝဵုတုဲ ညးအဝဲဟွံခိုၚ်ကၠိုက်ဂမၠိုၚ်ဝွံ မ္ၚးနူကဵုပရေၚ်စသုၚ်မံၚ်စံၚ်၊ ပရေၚ်ပညာ၊ ပရေၚ်ထတ်ယုက်၊ အခေါၚ်အရာကမၠောန်ကၟိတ်တံဂှ် စနူကဵုပရေၚ်မံၚ်စံၚ် ဂွံဂျိုၚ်အာလမျီုတံဒှ်တမ် ဒးဆောံလေၚ်ဒၟံၚ်တုဲ လ္ပာ်ကံၚ်ဇြဳပၞာန်တံ ဖ္ဍိုက်ဗပေၚ်ရေၚ်တၠုၚ်ကဵုလေဝ် စဵုကဵုဟွံမွဲ အောန်ဒၟံၚ်ရ။
အတိုၚ်စရၚ်လၟိဟ်မၞိဟ်သ္ဂါဗ္တံ သၞာံ ၂၀၁၉ ဂှ်မ္ဂး လၟိဟ်မၞိဟ်ကၟိန်ဍုၚ် ၁၂ ဒဿမ ၈ တၟံကၠံဂှ်ဝွံ ဒှ်ညးအဝဲဟွံခိုၚ်ကၠိုက်တံတုဲ ဟိုတ်နူပဋိပက္ခရပ်လွဟ် မက္တဵုဒှ်ဒၟံၚ်လၟုဟ်တံဂှ်တုဲ ညးအဝဲဟွံခိုၚ်ကၠိုက် ဂၠိုၚ်ကဵုလ္ၚီ ထပ်ဂၠိုၚ်တိုန်ကၠုၚ်ဂှ် ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်ညးအဝဲဟွံခိုၚ်ကၠိုက်တံ သ္ၚဳဂၠိပ်လဝ်အိုတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ