ဗြဝတဳ၊ ဂျောန် ၁၃
ပယျဵုသေံ−ဗၟာ ပ္ဍဲဍုၚ်ဗြဝတဳ တွဵုရးကရေၚ်ဂှ် သီုတၚ်အခက်အခုဲ ပရေၚ်ဆက်စၠောံဂၠံၚ်ဍာန် သီုဒၟါနူပရေၚ်ကြံၚ်မ္ၚိုဟ် ပရေၚ်ပၞာန်ၜါလ္ပာ်တုဲ စနူဂိတုဂျောန်မံက်တုဲ သ္ၚုပိုတ်က္တဵုဒှ်ဒၟံၚ်ရောၚ် ညးဒေသလ္တူဍုၚ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲဍုၚ်ဗြဝတဳ၊ တေန်ဂါန်ညဳနံၚ်၊ ကအ်ကြိက် နွံဒၟံၚ်လ္တူဂၠံၚ်သွံရာန်ဗၞိက်ပယျဵုတံဂှ် ဟိုတ်နူအကာဲအရာပရေၚ်ပၞာန်ၜါလ္ပာ် မက္တဵုဒှ်လဝ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံတံဂှ်တုဲ ဂၠံၚ်ဇၞော်အာယှ ဗြဝတဳ−ကအ်ကြိက် ပၟိက်ဇၞော် သွက်ပရေၚ်သွံရာန်ဗၞိက်ပယျဵုတံ မပါလုပ် ဂၠံၚ်တြေံလ္တူဒဵုဒဝ်နတံဂှ်ဝွံ ဒးကၟာတ်လဝ် ကဵုဂိတုရ။
ဂၠံၚ်ဇၞော်အာယှကဵု ဂၠံၚ်တြေံ လ္တူဒဵုဒဝ်နတံဂှ် ကၟာတ်လဝ်တုဲ သွက်ပရေၚ်သွံရာန်ဗၞိက်ပယျဵု ကေုာံ ပရေၚ်အာကၠုၚ်တရဴတံဂှ် ညးဍုၚ်ကွာန်တံ ဒးအာကၠုၚ်သုၚ်စောဲဒၟံၚ် ဂၠံၚ်လ္တူဒဵု ထိုအ်ဂဝ်ကိုဝ် သ္ကုတ်သၟဝ်ကျာဍုၚ်ကအ်ကြိက်ဂှ်ကီု၊ ဂၠံၚ်လ္တူဒဵု ဒဵုခၟာဲစာၚ် (သေ့ကတေ) ဂှ်ကီု၊ ဂၠံၚ်လ္တူဒဵု ၁၀၁၈ တံဂှ်တုဲ ပ္ဍဲအရာအာကၠုၚ်သုၚ်စောဲသာ်ဏံဂှ် ဒးကဵုဒၟံၚ်သြန် သီုဒပ်ကံၚ်ဇြဳပၞာန် မပါလုပ် သီုဂကောံရပ်လွဟ်တံသီုဖအိုတ်ရ။
ပြဟ်ဟ်ဏံ ပ္ဍဲကာလကသီု ဗြဲဂူရိုပ်ဒၟံၚ်တုဲ ဂၠံၚ်ထိုအ်ဂဝ်ကိုဝ်၊ ဂၠံၚ်ဒဵုခၟာဲစာၚ် (သေ့ကတေ) ကေုာံ ဂၠံၚ်ဒဵု ၁၀၁၈ တံဂှ် ဂၠံၚ်လီုလဝ်တုဲ ယာန်ဗွဲမဂၠိုၚ်ဂၠေၚ် အာကၠုၚ်ဝါတ်ဂါတ်၊ ဗၠိုက်တံ က္တဵုဒှ်လဝ်တုဲ ဂၠံၚ်လ္တူဒဵုဒဝ်နတြေံဂှ်လေဝ် က္တဵုဒှ်ဒၟံၚ်သီုတိလာ်တုဲ ယာန်ဗွဲမဂၠိုၚ်ဂၠေၚ် အာကၠုၚ်ဟွံဂွံ ကၟာတ်ဆိုအ်ဒၟံၚ်ရ။
ဟိုတ်နူဂၠံၚ်ဒဵုလီု၊ ယာန်ဂမၠိုၚ် ကၟာတ်ဆိုအ်က္တဵုဒှ်လဝ်တုဲ သီုသ္ၚု သီုကပေါတ်ဗၞိက်အိုဿီု မယိုက်ပလံၚ်ဗစိုပ်နၚ် ဍုၚ်ဗြဝတဳတံဂှ်ဝွံ အခိၚ်လအ်လတံ က္တဵုဒှ်လဝ်တုဲ ပြဟ်ဟ်ဏံ လ္တူဍုၚ်ဗြဝတဳ သ္ၚုပိုတ် က္တဵုဒှ်လဝ်ရ။
“ကွဳစက်ဗၞိက်တံ ဟွံစိုပ်တုဲ သ္ၚုဂှ်တှ်ေ လအ်အာညိညရ။ ၜိုတ်ပန်မသုန်တ္ၚဲပၠန်တှ်ေ စိုပ်ဏောၚ် ကွဳစက်ဗၞိက်တံ ဟီုရ” သာ်ဝွံ သၟာဗၞိက်သ္ၚု နူဍုၚ်ဗြဝတဳမွဲတၠ ဟီုရ။
ဟိုတ်နူသ္ၚုပိုတ်တုဲ သ္ၚုတဲခိုဟ်မွဲရိုက်ဂှ် ၚုဟ်သၠုၚ်တိုန်ကၠုၚ် စဵုကဵုၜါကိုဋ်ပြၚ်တုဲ သ္ၚုတဲကြံၚ်မွဲရိုက်မ္ဂး ၚုဟ်မၞုံဒၟံၚ် စဵုကဵုဗ္ဒါဲမွဲကိုဋ်ၜါဠက်ဒ္ကေဝ်တုဲ တန်တဴကဵုလ္တူဂကူသ္ၚုတုဲ ၚုဟ်ဍေံတၞဟ်ခြာအာနွံရောၚ် ဂွံတီကေတ်ရ။
ညးဒေသဍုၚ်ဗြဝတဳမွဲတၠဂှ်လေဝ် “ဆေၚ်နွံဂှ်တှ်ေ နွံ။ ဆေၚ်ဟွံမွဲဂှ်တှ်ေ ဟွံမွဲပုဟ်။ သ္ၚုဍုၚ်ဗၟာဂှ် တိုန်ကၠုၚ် နူသၟဝ်တေံဟွံသေၚ်ပုဟ်။ ကွဳစက်လ္ပာ်သၟဝ်တေံဂှ် ဟွံပြေပြံၚ်ပုဟ်။ တိုန်ဟွံဂွံပုဟ်။ ဂၠံၚ်ဂှ် ဟွံခိုဟ်ပုဟ်” သာ်ဝွံ သ္ဂးရ။
ဂိတုဂျောန် ၁၂ ဂှ် အပ္ဍဲဍုၚ်ဗြဝတဳ ကွဳစက်ဗၞိက် ဖ္ဍိုက်ပ္တိုန်နၚ်သ္ၚု စိုပ်ကၠုၚ်ကီုလေဝ် စိုပ်ဂွံမွဲလစုတ် လွာဲဂှ်ရ ရဲရာန်ဂၠိုၚ်တုဲ အိုတ်အာလဝ်ရောၚ် ညးဒေသတံ ဟီုဂးလဝ်အိုတ်ရ။
အတိုၚ်ဆက်စၠောံသၟာန်သၟုက်ဂွံ ညးဒေသဗြဝတဳလ္ၚဵုတံဂှ်မ္ဂး ပ္ဍဲဂၠံၚ်လ္တူဒဵု ယိုက်နၚ်သ္ၚုတံဂှ် ဒပ်ကံၚ်ဇြဳပၞာန် တာဒၞါကၟာတ်လဒဵုလဝ် အခေါၚ်ယိုက်သ္ၚုတံဂှ်တုဲ အာတ်သ္ၚု၊ အာတ်လှုဲတံ ကၠောန်ၜိုတ်ဒၟံၚ်ရောၚ် ဂွံတီကေတ်ရ။
ဍုၚ်ဗြဝတဳ မဒှ်ဍုၚ်ပယျဵု သေံ−ဗၟာ လၟိဟ်မၞိဟ်မွဲကိုဋ်ပြၚ် မံၚ်ဒၟံၚ်ဂှ်ဝွံ အပ္ဍဲကာလဒပ်ပၞာန်သီအဝဵု ပွိုၚ်ပိသၞာံပြၚ်ဏံ သ္ၚုပိုတ် ဒှ်အလန်ကိုပ်ကၠာအိုတ်ဂှ်လေဝ် ဂွံတီကေတ် အတိုၚ်ဂလာန်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−CJ