ဍာ်ဗု၊ ဂျောန် ၁၄
ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲကွာန်သာယာမန်၊ ကွာန်ယာဖူတၟိ ကေုာံ ကွာန်ယာဖူတြေံ ပွိုၚ်ဍုၚ်ဍာ်ဗု ရးတၞၚ်သဳဂှ်ဝွံ လုပ်စိုပ်ကေတ်ဏာလဝ် ကပေါတ်မၞုံကဵုၚုဟ်မး နူကဵုသ္ၚိဒၟံၚ်ညးဒေသတံဂှ်ရောၚ် ဂွံတီကေတ် ဇရေၚ်ညးဒေသတံရ။
ဒပ်ကံၚ်ဇြဳပၞာန် ဇြဟတ်ဒပ် ၜိုတ် ၄၀၀ ပြၚ်ပါဂှ်ဝွံ သွက်ဂွံကလေၚ်ထိၚ်ဒက် သ္ကုတ်ဂၠံၚ်ရေဝ်−ထဝါဲဂှ်တုဲ စနူဂိတုဂျောန် စၟတ်တ္ၚဲ ၇ တေံတုဲ ထ္ပက်ကရောၚ်ပၞာန် လုပ်စိုပ်ကၠုၚ် အပ္ဍဲပွိုၚ်ဍုၚ်ဍာ်ဗုတုဲ အကြာဒပ်ပံၚ်ကောံ ဂကောံဇြဟတ်ပၠန်ဂတးတံဂှ် ပေါဲဗ္တိုက်ၜါလ္ပာ် က္တဵုဒှ်လဝ်ရ။
ဟိုတ်နူပေါဲဗ္တိုက်ၜါလ္ပာ်တုဲ ညးဒေသ နူကဵုကွာန်ပိကွာန်ဂှ်ဝွံ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံ ကြပ်အလုံကွာန်မွဲရ။
ကြဴနူဂှ်တုဲ ဒပ်ကံၚ်ဇြဳပၞာန်ဝွံ လုပ်စိုပ်မံၚ်တန်တဴ အပ္ဍဲကွာန်တုဲ ကၠတ်ဂၠံက်ကေတ်ဏာ ကပေါတ်မၞုံကဵုၚုဟ်မး နူသ္ၚိဒၟံၚ်ညးဒေသတံဂှ်ကီု၊ ညးဍုၚ်ကွာန်ဒေသ ကလေၚ်စဴကၠုၚ် အပ္ဍဲကွာန်တံဂှ်လေဝ် ပန်ပှော်ကဵုသေနာတ်တံဂှ် ကၠောန်ၜိုတ်ဒၟံၚ်ရောၚ် သ္ဂးရ။
အတိုၚ်ဂလာန်ညးဒေသတံဂှ်မ္ဂး ပ္ဍဲကွာန်ယာဖူတၟိ ပေါဲဗ္တိုက်ၜါလ္ပာ် သ္ကာတ်မြဟ်လဝ်ဂှ် သ္ၚိဒၟံၚ် ဒးဒုၚ်ကၠတ်ဂၠံက်လဝ် ဂၠိုၚ်အိုတ်တုဲ ကောန်ဒပ်ကံၚ်ဇြဳပၞာန်တံ ဒၟါနူဆက်နွံဒၟံၚ်တုဲ ဟွံဂွံတီကေတ် လၟိဟ်ချိုတ်တ်ပၠိုတ်တ်ဏီရ။
အပ္ဍဲပေါဲဗ္တိုက်ဍာ်ဗုဂှ် ဟိုတ်နူပရေၚ်ပန်ပှော်လွဟ်ဇၞော် နူဒပ်ကံၚ်ဇြဳပၞာန်တံတုဲ ကောန်ၚာ်သၟတ် နူကွာန်ယာဖူတၟိ မွဲတၠ မပါလုပ် ဂြောဝ်ဂတာ ၄ တၠ ဇီုကပိုက်ချိုတ်အာလဝ်တုဲ ညးဍုၚ်ကွာန်ဒေသ ဂၠိုၚ်ကဵုလ္ၚီ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရ။
ပေါဲဗ္တိုက်ဍာ်ဗုဝွံ နူဂိတုဂျောန် ၇ စဵုကဵုဂိတုဂျောန် ၁၃ ပေါဲဗ္တိုက်ၜါလ္ပာ် ဆက်က္တဵုဒှ်ဒၟံၚ်တုဲ အပ္ဍဲပေါဲဗ္တိုက်ဂှ် လ္ပာ်ကံၚ်ဇြဳပၞာန် ဟွံအောန်နူကဵု ၆ တၠ ချိုတ်အာလဝ်ရောၚ် ဂွံတီကေတ် အတိုၚ်တၚ်လလောၚ်တြး ကရောၚ်ပၞာန်ဒဝ်နရ။
ပရိုၚ်−သြၚ်လောန်တိုၚ်(မ်)
ဗီု−CJ