ကျာ်မြဟ်၊ ဂျောန် ၁၄
ပ္ဍဲတွဵုရးဍုၚ်မန် ပွိုၚ်ဍုၚ်ကျာ်မြဟ် ပ္ဍဲထံၚ်ကျာ်မြဟ် ကြဴနူထံၚ်ဟွံညိၚ်ဝတ်က္တဵုဒှ်တုဲ ဒပ်ကံၚ်ဇြဳပၞာန် သၠုၚ်ပ္တိုန်လဝ် ပရေၚ်ဂီုကၠီုရောၚ် ညးမစုက်လုက်ကဵု ထံၚ်စာတ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဂျောန် ၁၂ အခိၚ်ဇိုၚ်သဝ်တ္ၚဲဂှ် ပ္ဍဲထံၚ်ကျာ်မြဟ် ညးဇၞော်ထံၚ်ဂမၠိုၚ် ကဵုကောန်ထံၚ်မွဲတၠ ဗ္စိန်စမြိုၚ်ၜါထပ်မွဲတုဲ ဒၟါနူဗြဲဂူလဝ်တုဲ ဓတ်ဓါတ်လလဳဗက်တုဲ ကောန်ထံၚ်ဂှ် ဒတုံစှ်ေလဝ်ရ။
ကြဴနူဂှ်တုဲ ကောန်ထံၚ်ဓတ်ဓါတ်လလဳဗက် ဒတုံစှ်ေတုဲ ဝိုတ်ဒၟံၚ်ဂှ် ဟွံကဵုအခေါၚ်လွဳ ပ္ဍဲရုၚ်ဂဥုဲမ္ၚးထံၚ်မွဲသာ် စွံလဝ်အတိုၚ်ဂှ်တုဲ ကောန်ထံၚ်ပရေၚ်ဍုၚ်ကွာန်ဂမၠိုၚ် နူကဵုအာတ်မိက် သွက်ဂွံကဵုအခေါၚ်လွဳယဲဂှ် ထံၚ်ဟွံညိၚ်ဝတ် က္တဵုဒှ်လဝ်ရ။
“ထံၚ်ဟွံညိၚ်ဝတ်ဒှ်ဟီုဂှ် စကာကောန်ထံၚ်မွဲတၠ ကဵုဗ္စိန်ပသဲ ၜိုတ်ဇိုၚ်သဝ်တ္ၚဲ ၅ နာဍဳရ။ တုဲတှ်ေ ဗြဲဂှ်လေဝ် ဂူမံၚ်ပြဳပြဳတုဲ ယှတ်အာရ။ ယှတ်အာတုဲ ဒတုံစှ်ေသၟဝ်တေံ နူကဵုၜါထပ်ဏောၚ်။ ဇှ်ဂှ် စွံလဝ်အတိုၚ်ဏံတုဲ ကောန်ထံၚ်ပရေၚ်ဍုၚ်ကွာန်တံဂှ် ဟွံလွဳကဵုမၞိဟ်ဏံဂးတုဲ ရုသံၚ်တိုန်ရ။ အလုံထံၚ်မွဲ ဟွံညိၚ်ဝတ် ဒှ်အာရ” သာ်ဝွံ ညးမစုက်လုက်ကဵုထံၚ်စာတ်မွဲတၠ ဟီုရ။
ထံၚ်ဟွံညိၚ်ဝတ်ဂှ်ဝွံ က္တဵုဒှ်အာလဝ် နူဇိုၚ်သဝ်တ္ၚဲ ၅ နာဍဳ စဵုကဵု ဗ္တံ ၇ နာဍဳတုဲ ကြဴနူဂှ်တုဲ ညးဇၞော်ထံၚ်ဂမၠိုၚ် ကဵုလဝ်အခေါၚ်လွဳ ကောန်ထံၚ်ဂှ် ပ္ဍဲရုၚ်ဂဥုဲညးဍုၚ်ကွာန်မတ်မလီုတုဲ ကလေၚ်ညိၚ်ဝတ်အာလဝ်ရ။
ထံၚ်ဟွံညိၚ်ဝတ်က္တဵုဒှ်တုဲ စနူဂိတုဂျောန် ၁၃ အခိၚ်နူဂယးတုဲ ဒပ်ကံၚ်ဇြဳပၞာန် သၠုၚ်ပ္တိုန်လဝ် ဇြဟတ်ဒပ် ပ္ဍဲထံၚ်ကျာ်မြဟ် ဗွဲမဂၠိုၚ်ဂၠေၚ်တုဲ မၚ်ရံၚ်ဒၟံၚ်ကောန်ထံၚ်တံဂှ်လေဝ် ကၠောန်သ္ပဒၟံၚ်ရောၚ် ဂွံတီကေတ် အတိုၚ်ဂလာန် ညးမစုက်လုက်ကဵု ထံၚ်စာတ်တံရ။
ထံၚ်ကျာ်မြဟ်ဝွံ ဟွံကဵုအခေါၚ်မၚ်မွဲရံၚ်စံၚ် ပရေၚ်ထတ်ယုက် ကောန်ထံၚ်ဂမၠိုၚ် ပေၚ်ၚ်ဂှ်ကီု၊ ကၟာတ်လဒဵုလဝ် အခေါၚ်လွဳယဲဂှ်ကီု၊ စနူကဵုစၞစသုၚ် ကေုာံ ဍာ်ရပ်ဍာ်သုၚ်တံ ဒှ်တမ် ဟွံကဵုရုမ်မ်ဂပ်ပ်မွဲသာ် မွဲဏှမွဲဏှဟီုဂွံ ကလိလောန် ဖံက်ပ္ကဝ်ဒၟံၚ် အခေါၚ်အရာမၞိဟ်ရ။
သ္အာၚ်နူဂှ်ပၠန် ပပ္တံနူကဵုပလံၚ်ဗစိုပ် စၞစသုၚ် ကေုာံ အရပ်အစပ်တံဒှ်တမ် ပတေၚ်ဂြတ်ဂၠိုၚ်ကၠုၚ် နူကဵုကၠာတေံတုဲ ထ္ပက်အဇာမၞိဟ်တုဲ ပလံၚ်ဗစိုပ်တံဂှ် ဟွံကဵုအခေါၚ်ရတုဲ စၟဳတ်ထပ်ကဵုထပ်တုဲမှ ကောန်ဇာတ်ဂြောဝ်ဂတာတံသၟးရဟေၚ် ကဵုအခေါၚ်ပလံၚ်ဗစိုပ်အိုတ်ဂှ် ဂွံတီကေတ်ရ။
ပ္ဍဲထံၚ်ကျာ်မြဟ် တွဵုရးဍုၚ်မန်ဂှ် သီုကောန်ထံၚ်ပရေၚ်ဍုၚ်ကွာန်တံ မပါလုပ် ကောန်ထံၚ်ဒးဒၟံၚ်ထံၚ် နကဵုၝောံပိုဒ်နာနာဂှ် ၂၀၀၀ ပြၚ် နွံဒၟံၚ်ရောၚ် ဂွံတီကေတ် ဇရေၚ်ညးမစုက်လုက်ကဵု ထံၚ်စာတ်တံရ။
ပရိုၚ်−သြၚ်လောန်တိုၚ်(မ်)
ဗီု−CJ