ပ္ဍဲတွဵုရးဍုၚ်မန် ဒပ်ကံၚ်ဇြဳပၞာန် သၠုၚ်ပ္တိုန် ပရေၚ်ပလေဝ်ပလေတ်ပရေၚ်ပၞာန်

မတ်မလီု၊ ဂျောန် ၁၄

ဟိုတ်နူပၞာန်ထ္ပက် ဂကောံဇြဟတ်ပၠန်ဂတးရပ်လွဟ်တံ အလုံဍုၚ်မွဲဂှ်တုဲ ဒပ်ကံၚ်ဇြဳပၞာန် ကျဒၟံၚ်ပၞာန်ဂှ်ဝွံ ပ္ဍဲတွဵုရးဍုၚ်မန် ညံၚ်တိဍာ်ဆောံလေၚ်ဟွံဂွံမွဲ သၠုၚ်ပ္တိုန်အသိၚ်ကၠောန်ၜိုတ်ဒၟံၚ် ပရေၚ်ပလေဝ်ပလေတ် စပ်ကဵုပရေၚ်ပၞာန်တံရောၚ် ညးတာလျိုၚ် ဂကောံပၠန်ဂတးအပ္ဍဲဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

တွဵုရးဍုၚ်မန်ဝွံ ကြဴနူဒပ်ပၞာန်သီအဝဵုတုဲ ပ္ဍဲကဵုပွိုၚ်ဍုၚ်သဓီု၊ ကျာ်ထဝ်၊ ၜဳကလေၚ်၊ ကျာ်မြဟ် ကေုာံ ပွိုၚ်ဍုၚ်ရေဝ် ဒးဒုၚ်လလောၚ်တြးလဝ် အမိၚ်အုပ်ဓုပ်ပၞာန်မွဲဓဝ်တံဂှ် ဒှ်ဒေသ ပရေၚ်ချဳဒရာၚ်ပၠန်ဂတးရပ်လွဟ်တံ ဇြဟတ်ခိုဟ်မွဲရ။

ပ္ဍဲကဵုဏံ အပ္ဍဲခရိုၚ်သဓီု မဒှ်တိဍာ်ထိၚ်ဒက် ဗော်သွးကောန်ဂကူကရေၚ် KNU ဂှ် လ္ပာ်ကံၚ်ဇြဳပၞာန် ပလေဝ်ပလေတ်ကၠုၚ် ဗီုပြၚ်ပၞာန်ဒုၚ်တံတုဲ ယိုက်ဏာနၚ် လွဟ်လက်နက် ကေုာံ ဇွောံမတံဂှ်လေဝ် ကၠောန်ကၠုၚ်ဒၟံၚ် နဗီုပြၚ်နာနာရောၚ် ညးဒုၚ်တာလျိုၚ် ခရိုၚ်သဓီု PDF ကိုဝ်အေမေန်ထောန် ဟီုရ။

“လ္ပာ်ခရိုၚ်သဓီုပိုယ်တံဂှ် ကံၚ်ဇြဳပၞာန်ဂှ်တှ်ေ ဍေံတံ ပလေဝ်ပလေတ်ကၠုၚ်နွံ။ ကၠောန်ဒၟံၚ်ဗီုပြၚ်ပၞာန်ဒုၚ်တံရ။ တုဲပၠန် သိုၚ်ပ္တိုန် ဗာန်ကာတံ ဗွဲမခိုၚ်ကၠိုက်ဂှ်နွံ။ တုဲပၠန် ယိုက်ဏာနၚ် ဇွောံမ လွဟ်လက်နက်တံ နဗီုပြၚ်နာနာရ။ ယိုက်ကဵု ကွဳစက်ကောန်အရာပ်တံနွံ။ ယိုက်ကဵုကွဳစက်ဖ္ဍိုက်ဗၞိက်တံလေဝ် နွံ။ ဍေံတံ ကၠောန်ဒၟံၚ် သာ်ဏံရ” သာ်ဝွံ သ္ဂးရ။

သ္အာၚ်နူဂှ်ပၠန် ဗ္ဒိုပ်ဒပ် ဂကောံဒပ်ပၠန်ဂတးတံဂှ်လေဝ် ထံၚ်ပရိုၚ်ကီု၊ ပန်ကဵုလွဟ်ဇၞော်တံကီုဂှ် ကၠောန်သ္ပဒၟံၚ်တုဲ တီဒၞါဲဒတန်ဗ္ဒိုပ် ချိုတ်တ်ပၠိုတ်တ်မ္ဂး ဗ္တိုက်ကၠုၚ်ကဵုပၞာန်ကျာတံဂှ် ကၠောန်သ္ပဒၟံၚ်ရောၚ် ညးဆက်ဟီုရ။

သီုကဵုခရိုၚ်သဓီု မပါလုပ် ဒေသဂကောံပၠန်ဂတးရပ်လွဟ်ဂမၠိုၚ် ချဳဒရာၚ်ပရေၚ်ပၞာန် ဇြဟတ်ခိုဟ်တံဂှ် စနူဂိတုအံက်တဝ်ဗာကြပ်အိုတ် သၞာံတုဲတေံဂှ်တုဲ ကံၚ်ဇြဳပၞာန် ဒေါအ်ဇူလဝ် ပၞာန်ထ္ပက်တံရ။

ဆ္ဂး အခိၚ်လၟုဟ် ကံၚ်ဇြဳပၞာန်ဝွံ ပ္ဍဲဒေသကောန်ဍုၚ်အရၚ်ဗွဲမဂၠိုၚ်ဂှ် နူဗ္ဒိုပ်ကၚ် စဵုကဵုဌာန်ဂအုပ်တမ်ဒပ်ဂှ် ဒးဗလးလဝ်တဲ ဗ္ဒိုပ်ဒပ်ဂၠိုၚ်ကဵုကၠံတုဲ ဒးဆောံလေၚ်လဝ် ၆၀ ဍုၚ်ယျဂှ်ရ ပ္ဍဲတွဵုရးဍုၚ်မန် ဒၞါဲမထိၚ်ဒက်ဂွံလဝ် တိဍာ်အုပ်ဓလီုတံဂှ် ကၠောန်သ္ပကၠုၚ် ပရေၚ်ပလေဝ်ပလေတ် အရာမနွံပၟိက်တံရ။

နာဲဗညာမန် ညးမၞုံအခေါၚ်ဟီုဂး ဗော်ဍုၚ်မန်တၟိ AD ဂှ် ပြဟ်ဟ်ဏံ လ္ပာ်ညးတံဏံ စပ်ကဵုပရေၚ်ချဳဒရာၚ်ပရေၚ်ပၞာန် ကံၚ်ဇြဳပၞာန်တုဲ တၟေၚ်ၚ်တၟဟ်ဟ် ဟွံဂွံဆဵုကေတ်ကီုလေဝ် ပ္ဍဲတိဍာ်ချဳဒရာၚ်ပရေၚ်ပၞာန်တၞဟ်သ္အာၚ်တံဂှ် ယိုက်ဏာနၚ်ဒၟံၚ်ဇွောံမတံ နွံဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဗော်ဍုၚ်မန်တၟိ AD ပါ်တိတ်လဝ် နူဗော်မိမဂှ်ဝွံ ပ္ဍဲတွဵုရးကရေၚ် ဒေသလှာဒကှ် မပါလုပ် ပ္ဍဲတွဵုရးဍုၚ်မန် ပွိုၚ်ဍုၚ်ကျာ်မြဟ်၊ မုဟ်ဍုၚ်၊ ဇြပ်ဗု ကေုာံ ဒေသရေဝ်သၟဝ်ကျာတံဂှ် ချဳဒရာၚ်ဒၟံၚ်ပရေၚ်ပၞာန်ရ။

နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ် ပ္ဍဲဗ္ဒိုပ်ဒပ်ကံၚ်ဇြဳပၞာန် နွံဒၟံၚ် ပ္ဍဲပွိုၚ်ဍုၚ်ရေဝ်တံဂှ် အမၠံက်လွဟ်ဇၞော် ဟွံကေၚ်ရပ်စပ် ကၠာတေံတံဂှ် ဗ္ဂပ်စုတ်လဝ်တုဲ ကောန်ဒပ်ဂမၠိုၚ်လေဝ် သွက်ပရေၚ်ထိၚ်ဒဝ်တိဍာ်တံဂှ် စချဳဒရာၚ်ကၠုၚ်ယျဂှ် ဟီုတဴရ။

“လ္ပာ်ပွိုၚ်ဍုၚ်ရေဝ်ဂှ်တှ်ေ အမၠံက်ဟံၚ်ဝေတ်ဇြာဇၞော်ဇၞော် ၁၂၀ မွဲလှ်ေမှဟွံကေၚ်သုၚ်စောဲတံဂှ် ဗ္ဂပ်စုတ်လဝ် (ပ္ဍဲဗ္ဒိုပ်ဒပ်ကံၚ်ဇြဳပၞာန်) ဂှ် ဂွံဆဵုကေတ်ရ။ နူဂိတုအံက်တဝ်ဗာ သၞာံတုဲကၠုၚ်တေံ ဒပ်ကံၚ်ဇြဳပၞာန် ဟွံဂွံကၠောန်ကၠုၚ်လဝ် ပရေၚ်ၚးတးတိဍာ် ကေုာံ ပရေၚ်ထိၚ်ဒက်တိဍာ်တံဂှ် လၟုဟ်စချဳဒရာၚ်ကၠုၚ်ဂှ် ဂွံဆဵုကေတ်ရ။ တိတ်မ္ၚးဒပ်တုဲ မၚ်တောပ်ဗ္တိုက်ကၠုၚ်တံဂှ် ဂွံဆဵုကေတ်ရ။ ညအ်ဂှ် ဒှ်အရာဍေံတံ ပလေဝ်ပလေတ်လဝ်ရ” သာ်ဝွံ သ္ဂးရ။

သ္အာၚ်နူဂှ်ပၠန် ကောန်ဒပ်ဍောၚ်ကၠုၚ်ပၞာန် နူသ္ကုတ်သၟဝ်ကျာတံကီု ကောန်ဒပ်စှ်ေနူဘာကွတ်ပၞာန် အတိုၚ်သၞောဝ်ယိုက်လျိုၚ်ပၞာန် တၟိတၟိတံဂှ် ထပ်ဗပေၚ်လဝ်ဇြဟတ် ပ္ဍဲဗ္ဒိုပ်ဒပ်ကံၚ်ဇြဳပၞာန် နွံပ္ဍဲရေဝ်ကဵု လ္ပာ်ဍာ်ဗုတံရောၚ်ဂှ် နာဲနဂါ ဟီုရ။

အတိုၚ်တၚ်နၚ် ဂကောံလ္ၚတ်ကေၚ်ကာဍုၚ်ဗၟာ ကေုာံ ပဋိပက္ခ BACS မဒှ်ဂကောံသုတေသနမွဲဂှ်မ္ဂး သွက်တန်ဗ္တောန်ကွတ်ပၞာန်ကံၚ်ဇြဳပၞာန် လၟေၚ် (၁) ကဵု လၟေၚ် (၂) ဂှ် သၟတ်နူတွဵုရးဍုၚ်မန် ၃၅၀ ပြၚ် ဒးဒုၚ်ပကောံလဝ် နဒဒှ်ကောန်ဒပ်ရ။

မွဲလ္ပာ်ဂှ်ပၠန် သ္ကုတ်ဂၠံၚ်ရေဝ်−ထဝါဲ ဒပ်ပၠန်ဂတးဍုၚ်မန် MSRF ကေုာံ ဒပ်ပံၚ်ကောံမဟာမိတ်တံ ထိၚ်ဒက်ဂွံလဝ်ဂှ် စနူဂိတုဂျောန် စၟတ်တ္ၚဲ ၈ တုဲ ဒပ်ကံၚ်ဇြဳပၞာန် သ္ပလွေဟ်ကောန်အရာပ်တုဲ ဂ္စါန်ကၠုၚ်သ္ဂောံကလေၚ်ထိၚ်ဒက်ဂှ်ရ ပေါဲဗ္တိုက်ၜါလ္ပာ် က္တဵုဒှ်လဝ်ပၠန်ရ။

ဟိုတ်ဂှ်ရ ဒပ်ပံၚ်ကောံမဟာမိတ်ပၠန်ဂတး မတြးလဝ် လ္ပာ်ဂၠံၚ်ရေဝ်−ထဝါဲဂှ် သၠုၚ်ပ္တိုန်အသိၚ်ပရေၚ်ပၞာန်တုဲ သွက်ဂွံကလေၚ်ထ္ပက်ပၞာန် ကုကံၚ်ဇြဳပၞာန် ဗွဲမသ္ကာတ်မြဟ်ဂှ် စဳဇန်လဝ်တုဲဂှ်ရ လ္ပရပ်စပ်ဂၠံၚ်တံဏံအိုတ်ညိဂှ် ကဵုလဝ်သတိရ။

နာဲနဂါဂှ် “ နူဂိတုအံက်တဝ်ဗာ သၞာံတုဲကၠုၚ်တေံရ ကံၚ်ဇြဳပၞာန်တံ ကၠောန်ကၠုၚ်ပရေၚ်ၚးတးတိဍာ် ဟွံမာန်တုဲ လၟုဟ်တှ်ေ လ္ပာ်သ္ကုတ်သၟဝ်ကျာတေံ ၜိုဟ်သြိုဟ်အာညိညတုဲ ဂွံကလေၚ်ထိၚ်ဒက် လ္ပာ်ပိုယ်တံမာန်ဂှ် နကဵုဍေံတံ ဒုၚ်ဂိုၚ်ကေတ် နဒဒှ် Soft Target ပေါဲဗ္တိုက်ဂှ်တုဲ စထ္ပက်ကၠုၚ်ဒၟံၚ်ပၞာန်ယျ။ ပေါဲဗ္တိုက်ဂှ်လေဝ် ဆက်ဒှ်ဒၟံၚ်ရ။ ဗွဲကြဴလေဝ် ဂွံဒှ်ကၠုၚ်တၟာဂလိုၚ် နွံကၠုၚ်မာန်ရ” သာ်ဝွံ သ္ၚဳဂၠိပ်လဝ်ရ။

ဒဵုကဵုအခိၚ်လၟုဟ် ပ္ဍဲတွဵုရးဍုၚ်မန် ညံၚ်ရဴဒေသကောန်ဍုၚ်အရၚ်တၞဟ်သ္အာၚ်တံဂှ် လုပ်ပေါဲဗ္တိုက်သီဍုၚ်သီဗ္ဒိုပ်တံ ဟွံမာန်ဏီကီုလေဝ် ဗ္ဒိုပ်ဗၠာဲသၟိၚ်လ္ၚဵုတံကဵု သၞေဟ်ကၚ်စၟဳတ် ဗ္ဒိုပ်ကၚ် ကောန်ဒပ်ကံၚ်ဇြဳပၞာန်တံ ဖျေံလဝ်ဒပ်တံကဵု ကရောၚ်ယာန်ကွဳစက်တံဂှ် မွဲဏှမွဲဏှ လုပ်စိုပ်ဗ္တိုက်ဒၟံၚ်တံ နွံဒၟံၚ်ရ။

ပရိုၚ်−သြၚ်လောန်တိုၚ်(မ်)

ဗီု−SAC Telegram