မတ်မလီု၊ ဂျောန် ၁၅
အပ္ဍဲသၞာံဏံ နူဂိတုဂျာန္နဝါရဳ စဵုကဵုဂိတုဨပရဴ အလုံဍုၚ်မွဲ လၟေၚ်ဒဒှ်ပြိုက်ဂစိုတ်လဝ်မၞိဟ် လ္တူ ၅ တၠ နကဵုဂအုံဗွဝ်ဂှ် ဂကောံပၞာန်တံ ကလိလောန်လဝ် ၄၆ ဝါတုဲ ညးဍုၚ်ကွာန်ကောန်အရာပ် ၃၆၀ ပြၚ် ဒးချိုတ်အာလဝ်ရောၚ် လိက်ဒုၚ်စဳရေၚ် ဂကောံသုတေသန ညာန်လေန်တေတ် ထ္မံက်ထ္ၜးလဝ်ရ။
အတိုၚ်လိက်ဒုၚ်စဳရေၚ်ဂှ်မ္ဂး ဂကောံပၞာန်ဝွံ ရပ်စပ်ပၞာန်ကျာ၊ လုပ်စိုပ်ထ္ပက်ကရောၚ်ပၞာန်၊ ပန်ကဵုလွဟ်ဇၞော်၊ ရပ်စပ်စကာ လွဟ်ဇၞော်ကဵု ပၞာန်ကျာတံ မွဲအခိၚ်ဓဝ်သၟးဟွံက နကဵုဗီုပြၚ်တၞဟ်ဟ်တံလေဝ် ကလိလောန်လဝ် ပရေၚ်ဂစိုတ်ဂယိုၚ် နဂအုံဗွဝ်တံရ။
ပ္ဍဲကဵုပရေၚ်ကလိလောန်ဂမၠိုၚ် ဟိုတ်နူဂကောံပၞာန် ရပ်စပ်ဗ္တိုက်ကဵုပၞာန်ကျာတံတုဲ လၟေၚ်ဒဒှ်ကောန်အရာပ် ဒးချိုတ်အာလဝ် နကဵုဂအုံဗွဝ်ဂှ် ဒှ်လဝ်ဂၠိုၚ်အိုတ်တုဲ လၟိဟ်ချိုတ်အာဂှ်လေဝ် နွံလဝ် စဵုကဵု ၁၆၈ တၠ ဂၠိုၚ်အိုတ်ရ။
ပ္ဍဲပရေၚ်ဗ္တိုက်တရဴကျာတံဂှ် ပ္ဍဲကဵုရးသေံသ္ကုတ်သၟဝ်ကျာ၊ ရခေၚ်၊ သက်ကိုၚ်၊ ကရေၚ်၊ ကရေၚ်ဍာဲ၊ ချေၚ် ကေုာံ ဗဂေါတံဂှ် က္တဵုဒှ်လဝ် ၂၃ ဝါတုဲ ပ္ဍဲညးဍုၚ်ကွာန်ကောန်အရာပ် ဒးချိုတ်အာလဝ် နဂအုံဗွဝ်တံဂှ် နူရခေၚ်ဂှ် လၟိဟ်မၞိဟ် ၄၀ တၠ ဒှ်ဂၠိုၚ်အိုတ်ရ။
သ္အာၚ်နူဂှ်ပၠန် အပ္ဍဲကဵုကွာန် နွံဗ္ဒါဲဒေသပေါဲဗ္တိုက်က္တဵုဒှ်တံကဵု အပ္ဍဲကွာန် မထေၚ်ဂွံ ဂကောံဒပ်စဵုဒၞါညးဍုၚ်ကွာန်တံ ဇြဟတ်ခိုဟ်တံဂှ် ဂကောံပၞာန်တံကဵု ပျူသဝ်ထဳတံ လုပ်စိုပ်ထ္ပက်ကရောၚ်ပၞာန် ရပ်စပ်ကောန်အရာပ်တုဲ ဟိုတ်နူၜုၚ်တက်ပျဲပျာံလဝ်တံဂှ်တုဲ ကောန်အရာပ် ၉၁ တၠ ဒးချိုတ်အာလဝ်ရ။
မွဲလ္ပာ်ဂှ်ပၠန် ဟိုတ်နူလၟေၚ်ဒဒှ် ဂကောံပၞာန်တံ ပန်ကဵုလွဟ်ဇၞော်တံဂှ်တုဲ စမြိုၚ်သ္ၚိဒၟံၚ် ကောန်အရာပ်တံ ဒးလီုလာ်အာလဝ်တုဲ သီုကောန်ၚာ်သၟတ်မပါလုပ် ကောန်အရာပ် ၅၂ တၠလေဝ် ဒးချိုတ်အာလဝ် နဂအုံဗွဝ်ရ။
ဂကောံပၞာန်ဝွံ ပရေၚ်ဂစိုတ်ဂယိုၚ်ကောန်အရာပ် နဂအုံဗွဝ်ဂှ် နကဵုဗီုပြၚ်တၞဟ်သ္အာၚ်လေဝ် ကလိလောန်လဝ်နွံဂှ်ရ အပ္ဍဲပွိုၚ်ပန်ဂိတု ကောန်အရာပ် ဒးချိုတ်အာလဝ်ဂှ် နွံလဝ် စဵုကဵု ၂၂ တၠရောၚ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ်ဂှ်ရ။
အခိၚ်ဒှ်ပေါဲဗ္တိုက် ကုဂကောံဇြဟတ်ပၠန်ဂတးတံဂှ် စွံပွန်ကဵုသ္ၚိဌာန် ကောန်အရာပ် မၞုံပ္ဍဲကွာန်တံကဵု အရာပ်လ္တူဍုၚ်တံဂှ်တုဲ ဟိုတ်နူပန်ပှော်ကဵုလွဟ်ဇၞော် သီုကဵုပၞာန်ကျာတံဂှ်တုဲ ညးဒးချိုတ်အာ နဂအုံဗွဝ်ဂှ် ၃၁ တၠ နွံလဝ်ရ။
နူအခိၚ်ပၞာန်သီအဝဵု စဵုကဵုဂိတုဨပရဴ သၞာံ ၂၀၂၄ ဏံ အပ္ဍဲပွိုၚ်ပိသၞာံ လၟေၚ်ဒဒှ်ဂကောံပၞာန် ဂစိုတ်ဂယိုၚ်လဝ် နဂအုံဗွဝ်ဂှ် ကလိလောန်လဝ် ၂၆၀ ဝါဂှ်ရ ညးဍုၚ်ကွာန်ကောန်အရာပ် ၂၄၀၀ ပြၚ် ဒးချိုတ်အာလဝ်ရောၚ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ် ညာန်လေန်တေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ