တၞၚ်သဳ၊ ဂျောန် ၁၅
ပ္ဍဲရးတၞၚ်သဳ ပေါဲဗ္တိုက်ၜါလ္ပာ် ကလေၚ်သ္ကာတ်မြဟ်ကၠုၚ်ဒၟံၚ်ဂှ် ညးဒဒိုက်ပါဲဒဴဘဲပၞာန် မဒးဂြိပ်ဒဴပါဲဒလေတ်ဒၟံၚ်တံ နွံကၠုၚ် စဵုကဵုဗ္ဒါဲတြဴဠက်ဂှ် ဂွံတီကေတ် ဇရေၚ်ဂကောံသုတေသနဖျေံသ္ဇိုၚ်ဒေသ FE5 Taninthayi ရ။
အတိုၚ်လိက်ဒုၚ်စဳရေၚ် FE5 Taninthayi လလောၚ်ပ္တိတ်လဝ် နကဵုစၟတ်တ္ၚဲ ဂိတုဂျောန် ၁၂ ဂှ်မ္ဂး ဟိုတ်နူပေါဲဗ္တိုက် အပ္ဍဲဂိတုမေတုဲ ညးဒဒိုက်ပါဲဒဴဘဲပၞာန် ထပ်ဂၠိုၚ်တိုန်ကၠုၚ် ၄၀၀၀ ပြၚ်တုဲ ပံၚ်ထောံ ကဵုညးဒဒိုက်ပါဲဒဴဘဲပၞာန်ကၠာတေံမ္ဂး ညးဒဒိုက်ပါဲဒဴဘဲပၞာန် နွံကၠုၚ်လဝ် စဵုကဵု ၅၈၃၀၀ ရ။
ညးဒဒိုက်ပါဲဘဲပၞာန် ၄၀၀၀ ပြၚ်ဝွံ ဟိုတ်နူပေါဲဗ္တိုက်မက္တဵုဒှ်လဝ် အပ္ဍဲဂိတုမေတုဲကၠုၚ်တေံတုဲ ထောံလသာဌာန်ဒၟံၚ် ဒးဂြိပ်ဒဴပါဲဒလေတ်လဝ်တုဲ ညးတံဝွံ ဒှ်ညးဍုၚ်ကွာန်ဒေသ နူကဵုပွိုၚ်ဍုၚ်ထဝါဲ၊ ဍာ်ဗု ကေုာံ ပွိုၚ်ဍုၚ်ပဠဝ်တံရောၚ်ဂှ် ဂွံတီကေတ်ရ။
ညးဒဒိုက်ပါဲဘဲပၞာန်ဂမၠိုၚ်ဝွံ အပ္ဍဲပေါဲဗ္တိုက်သီဗ္ဒိုပ် ဒပ်ပံၚ်ကောံဇြဟတ်ပၠန်ဂတးတံဂှ် ဟိုတ်နူဒပ်ကံၚ်ဇြဳပၞာန် ပန်ကဵုလွဟ်ဇၞော် ကေုာံ ဗ္တိုက်ကဵုပၞာန်ကျာတံဂှ်တုဲ ထောံလသာသ္ၚိဌာန် ဒးဂြိပ်ဒဴပါဲဒလေတ်လဝ်ရောၚ် ညးတာလျိုၚ် ဂကောံ FE5 Taninthayi မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးဒးဂြိပ်ဒဴပါဲဒလေတ်ဂမၠိုၚ်ဝွံ ဒးမံၚ်ဒၟံၚ် ပ္ဍဲဒဵုဂြိုပ် ကေုာံ ကၠအ်ဂူယာ ဒၞါဲမကြပ်တံဂှ်တုဲ ဒၟါနူဒှ်အခိၚ်ကသီုဂှ်ရ နွံပၟိက်ဒၟံၚ်ကဵု အရီုဗၚ်ဇွောံမစၞစ၊ ဂဥုဲဇဗ ကေုာံ ဖ္ဍာန်ဒဒၚ်တံရောၚ် သ္ဂးရ။
အတိုၚ်တၚ်နၚ် နူသြၚ်လောန်တိုၚ်(မ်) စၟဳတ်ဂွံလဝ်ဂှ်မ္ဂး အပ္ဍဲဂိတုမေ တုဲကၠုၚ်တေံ ဒပ်ပံၚ်ကောံဂကောံဇြဟတ်ပၠန်ဂတးတံ ဗ္တိုက်သီဂွံလဝ် ဗ္ဒိုပ်ဒပ်ကံၚ်ဇြဳပၞာန် စဵုကဵုပိဗ္ဒိုပ် နူကဵုပွိုၚ်ဍုၚ်တယိတ်ချံၚ်ကဵု ပွိုၚ်ဍုၚ် (ဘုတ်ပြင်း) ရးတၞၚ်သဳတံဂှ်ရ။
အတိုၚ်လိက်ဒုၚ်စဳရေၚ် UNOCHA လလောၚ်ပ္တိတ်လဝ် ဂိတုဂျောန် ၁၀ တေံဂှ်မ္ဂး ဟိုတ်နူပဋိပက္ခပရေၚ်ပၞာန် မသ္ကာတ်မြဟ်ကၠုၚ်တံဂှ်တုဲ ပ္ဍဲဍုၚ်ဗၟာ လၟိဟ်ညးဒဒိုက်ပါဲဒဴဘဲပၞာန် ဂၠိုၚ်တိုန်ကၠုၚ် စဵုကဵု ၃ ပြကောဋိကိုဋ်ပြၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ