ဍာ်ဗု၊ ဂျောန် ၂၃
ပ္ဍဲကွာန်မျံက်ချဝ် ပွိုၚ်ဍုၚ်ဍာ်ဗု ရးတၞၚ်သဳ ဒၞါဲပေါဲဗ္တိုက်ၜါလ္ပာ် မသ္ကာတ်မြဟ်ဒၟံၚ်ဂှ် လ္ပာ်ဒပ်ကံၚ်ဇြဳပၞာန် ထပ်ဗပေၚ်ကၠုၚ်ဇြဟတ် ဂၠိုၚ်ကဵုကၠံတုဲ ထ္ပက်ကၠုၚ်ကရောၚ်ပၞာန်ဂှ် ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန်ဝွံ ပ္ဍဲကဵုကွာန်မျံက်ချဝ် ပေါဲဗ္တိုက်သ္ကာတ်မြဟ်ဒၟံၚ်ဂှ် မ္ၚးနူကဵုဇြဟတ်ကံၚ်ဇြဳပၞာန် နွံဒၟံၚ်နူကၠာတေံဂှ် အခါလၟုဟ် သီုကဵုဇြဟတ်ဒပ် နူကဵုပၞာန်ဍာ် ကေုာံ ပၞာန်တိုက် ၃၀၀ ပြၚ်ဂှ် ထပ်ဗပေၚ်လဝ်တုဲ အပံၚ်ဖအိုတ် ဇြဟတ်ဒှ်အာ ၅၀၀ ပြၚ်ရ။
ဗပေၚ်ကၠုၚ်ဇြဟတ်ဒပ် သာ်ဏံဂှ်ဝွံ အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် ပ္ဍဲဂိတုဂျောန် ၁၉ တေံဂှ် လ္ပာ်ဒပ်ကံၚ်ဇြဳပၞာန် ၃၀ တၠ ချိုတ်အာလဝ်တုဲ ညးကလိဂွံဝပ် ဗွဲမဂၠိုၚ်ဂၠေၚ်နွံလဝ်ဂှ်ရ ထပ်ဗပေၚ်ကၠုၚ်ဇြဟတ်ဒပ် နူကဵုတရဴဍာ်၊ တရဴတိုက်တံရ။
လ္ပာ်ကံၚ်ဇြဳပၞာန် ထပ်ဗပေၚ်ကၠုၚ်ဇြဟတ်ဒပ်တုဲ ပလေဝ်ပလေတ်ဒၟံၚ် သ္ဂောံထပ်ထ္ပက်ကရောၚ်ပၞာန်ကီုလေဝ် စဵုကဵုဂိတုဂျောန် ၂၂ အခိၚ်နူဂယးဂှ် ပေါဲဗ္တိုက်ၜါလ္ပာ်တံ က္တဵုဒှ်ဟွံမွဲကီုလေဝ် ပရေၚ်ပၞာန်ဆက်သ္ကာတ်မြဟ်ဒၟံၚ်ရောၚ် နာဲနဂါ လဴထ္ၜးလဝ်ရ။
ဒပ်ကံၚ်ဇြဳပၞာန် ဗပေၚ်ဒၟံၚ်ဇြဟတ်ဂှ်ဝွံ ပၠံၚ်ဓာတ်သဘာဝ ပံၚ်တောဲကၠောန်လဝ်ကဵုသေံတံကဵု ဒၞါဲကမၠောန်ထဝ် ဒပ်ပၞာန်ကၠောန်ဒၟံၚ် အပ္ဍဲဒေသပေါဲဗ္တိုက်က္တဵုဒှ်ဒၟံၚ်တံဂှ် ဖေက်ဒပ်ပၠန်ဂတးတံ ထိၚ်ဂွံဏာဂှ် ဒှ်ဓဝိၚ်လေဝ် ဒှ်မာန်ရောၚ် သ္ဂးရ။
ဒၞါဲပွဳပွူဗ္ဒါဲ ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် နကဵုဇြဟတ်လၟိဟ်ဗွဲမဂၠိုၚ်ဂၠေၚ်တံဂှ် ပါလုပ်ဒၟံၚ် ပ္ဍဲတိဍာ်ထိၚ်ဒက်ဗော်ဍုၚ်မန်တၟိဂှ်ရ လ္ပာ်ဗော်ဍုၚ်မန်တၟိလေဝ် ဗပေၚ်ဒၟံၚ်ဇြဟတ်ဒပ်တံရောၚ်ဂှ် ဂွံတီကေတ်ရ။
ဒပ်ကံၚ်ဇြဳပၞာန်ဝွံ နူကၞောတ်သၞာံတုဲကၠုၚ်တေံ သ္ကုတ်ဂၠံၚ်ရေဝ်−ထဝါဲ ဒးဗလးလဝ်တဲတံဂှ် သွက်ဂွံကလေၚ်ထိၚ်ဒက်မာန် စနူဂိတုဂျောန် ၇ တေံတုဲ နူပွိုၚ်ဍုၚ်ဍာ်ဗု ရးတၞၚ်သဳဂှ်မွဲကဆံၚ် ထ္ပက်ကၠုၚ်ဒၟံၚ်ကရောၚ်ပၞာန် နကဵုဇြဟတ်လၟိဟ်ဗွဲမဂၠိုၚ်ဂၠေၚ်ရ။
ဟိုတ်နူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်တုဲ ဒဵုကဵုအခိၚ်လၟုဟ် မွဲဒမြိပ်ဗ္ဒါဲကွာန်မျံက်ချဝ်ဂှ် ပေါဲဗ္တိုက်ၜါလ္ပာ်တံ က္တဵုဒှ်ကၠုၚ်စေအ်အ်တုဲ ဟိုတ်နူဒပ်ကံၚ်ဇြဳပၞာန် ဗ္တိုက်ကဵုပၞာန်ကျာတုဲ ညးဍုၚ်ကွာန်ဒေသ ဂၠိုၚ်ကဵုလ္ၚီ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်အိုတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ