ကျာ်ထဝ်၊ ဂျောန် ၂၃
ပ္ဍဲကွာန်ခယဲ ပွိုၚ်ဍုၚ်ကျာ်ထဝ် တွဵုရးဍုၚ်မန်ဂှ် ပေါဲဗ္တိုက်ဟွံမွဲမွဲသာ် ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော်တုဲ ခမဳသၚ်ၜါဇကု ကေုာံ ကောန်အရာပ်ၜါတၠ ကလိဂွံလဝ်ဝပ်ရောၚ် ပဒိုဝ်သဝ်အေနာၚ် ညးမၞုံအခေါၚ်ဟီုဂး ခရိုၚ်သဓီု KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဂျောန် ၂၁ အခိၚ်ဇိုၚ်သဝ်တ္ၚဲ ၜိုတ် ၃ နာဍဳဂှ် နူဒပ်အမၠံက် စၟတ် ၃၁၀ ဖျေံသ္ဇိုၚ်ဒုၚ်သယိတ် ပန်စုတ်ဏာလဝ် လွဟ်ဇၞော် ၂ မ အပ္ဍဲကွာန်ခယဲတုဲ ဒတုံဗ္တိုဟ်ထ္ကးအာလဝ် အပ္ဍဲအရှာံဘာလကျာ်ကွာန်ဂှ်ကဵု ဗ္ဒါဲသ္ၚိဒၟံၚ် နွံသကဲဘာလကျာ်တံဂှ်ရ။
ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ်တုဲ ကျာ်ဇၞော်အ္စာနွံပိုန်ဘာဂှ်မွဲဇကု၊ သၚ်မွဲဇကု၊ ဥူသာန်တေန် အာယုက် ၇၅ သၞာံကဵု ဒဝ်သာန်မျေတ်တံ ဒးအာလဝ်ကဝေက်မကမ် ပ္ဍဲဇိုၚ်၊ တဲရ။
အပ္ဍဲကဵုပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်ဂှ် စမြိုၚ်သာသနာအပ္ဍဲဘာလကျာ် လ္ၚဵုတံဂှ်ကဵု သ္ၚိဒၟံၚ်မွဲမ ဇီုကပိုက်လီုလာ်အာလဝ်ရောၚ် ဂွံတီကေတ်ရ။
ပ္ဍဲပွိုၚ်ဍုၚ်ကျာ်ထဝ်ဂှ် စနူတ္ၚဲအကြာတံဏံတုဲ ဟိုတ်နူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်ရ အကြာဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံဂှ် ပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်ရ။
တုဲကၠုၚ် ဂိတုဂျောန် ၁၄ တေံဂှ်လေဝ် အပ္ဍဲခဠာတ် (ကျောက်ဟတ်) နွံအကြာကွာန်အခိုၚ်ကဵု ကွာန်တုၚ်ခွ ပွိုၚ်ဍုၚ်ကျာ်ထဝ်ဂှ် ဒပ်ကံၚ်ဇြဳပၞာန် ဟိုတ်နူပန်ပှော်လွဟ်ဇၞော်တုဲ ကောန်ၚာ်သၟတ် ၂ တၠ ချိုတ်အာလဝ်ဏီရ။
အတိုၚ်တၚ်နၚ် နူလိက်လၟေၚ်လ္ဂန်အိန် ကံက်ကပှ်လဝ်ဂှ်မ္ဂး အပ္ဍဲဂိတုမေ တုဲကၠုၚ်ဏံ ပ္ဍဲတွဵုရးဍုၚ်မန် ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော်တုဲ ကောန်အရာပ် ၁၃ တၠ ချိုတ်တုဲ ၄၁ တၠ ဇီုကပိုက်ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု−CJ